محتويات المقال
خلاص رمضان 2021 على الأبواب .. وبمجرد ما بنسمع أول لحن أغنية رمضان جانا، فيه إحساس كده بالألفة ودفا القلب بييجي لنا، من قبل حتى ما تبدأ جملة “رمضان جانا وفرحنا به” بصوت عبد المطلب اللي ارتبطت عند ناس كتير بالفوانيس المتعلقة في الشوارع منورة وزينة رمضان وفرحة قدومه اللي بترجعنا مهما كان عمرنا أطفال بنستنى باستعجال فظيع استطلاع الهلال وأول سحور وصيام أول يوم رمضان. في المقال ده، حبيت أطلع معاكم نوستالجيا أغاني رمضانية قديمة ونسمع مع بعض الأغاني اللي ما بنسمعهاش غير في الأيام الجميلة دي.
أجمل أغاني رمضانية قديمة
رمضان جانا
الأغنية الأيقونة. زي ما قلت كده، مزيكا البداية بتاعتها بس مرتبطة في ذهني، وأتوقع عند كتير منكم، بدخول رمضان. ولمحة الحزن اللي في جملة “بتغيب علينا وتهجرنا.. وقلوبنا معاك.. وفي السنة مرة تزورنا.. وبنستناك” بتحسسنا بانتظار السنة كلها للشهر الفضيل. الأغنية كلمات حسين طنطاوي وألحان محمود الشريف.
مرحب شهر الصوم
زي رمضان جانا، الأغنية أيقونية ومرتبطة دايمًا بدخول رمضان، ودايمًا بنفتكر بها ذكريات دخول رمضان في طفولتنا. لكن مش زيها، الأغنية مافيهاش لمحة حزن ولو إنه بيتكلم عن انتظار رمضان.. “بعد انتظارنا وشوقنا إليك، جيت يا رمضان. مرحب بقدومك ونعيش ونصومك” الأغنية كلمات محمد علي أحمد وألحان عبد العزيز محمود نفسه.
هاتوا الفوانيس يا ولاد
أغنية مزقططة مبهجة بتتكلم عن رمضان عن إنه عريس “هاتوا الفوانيس يا ولاد، هاتوا الفوانيس.. هنزف عريس يا ولاد، هنزف عريس”. الأغنية كتبها عبد العزيز سلام ولحنها وغناها محمد فوزي.
والله بعودة يا رمضان
أغنية مبهجة جدًا برضه وصوت محمد قنديل بيقول “بعودة والله يا رمضااااان” تحسيه فعلًا مبسوط وفرحان قوي، وصوته بيحضن رمضان. الأغنية كلمات عبد الوهاب محمد وألحان جمال سلامة.
بما إننا داخلين رمضان، لازم تستعدي بميزانية رمضان بالتفصيل
وحوي يا وحوي
أهلا يا أهلا بالقمر.. ده معنى اسم الأغنية الجميلة الهادية “وحوي يا وحوي” وهي أغنية من الأغاني القليلة اللي بتوثق الكلمة المصرية القديمة اللي بنستخدمها لحد النهارده.. “وحوي يا وحوي”. الأغنية كلمات حسين المانسترلي وألحان أحمد الشريف وغناها أحمد عبد القادر المغني اللي مش معروف له أغاني كتير ويمكن دي أكتر اغنية مشهورة له.
أهه جاه يا ولاد
أغنية مختلفة شوية لإن مفيش مغني واحد أو مغنية واحدة، هم كورس بنات وكورس ولاد، وبيغنوا كلهم عن فرحة الأطفال بميعاد رمضان اللي جه و”جيبنا الفوانيس أحمر وأخضر، بعد ما نفطر راح نتحضر” ودي بتفكرنا بعادة كانوا بيعملوا الأطفال زمان إنهم بعد الفطار ينزلوا الشارع يلعبوا بالفوانيس ويلفوا بيها في الشوارع. الأغنية من كلمات نبيلة قنديل ولحن علي إسماعيل.
لو خارجة لأي مناسبة فطار أو سحور أو عزومة رمضان، شوفي هنا أزياء رمضان للمحجبات
يا بركة رمضان
من الأغاني اللي بنبدأ نسمعها قرب آخر الشهر الفضيل، بنتحايل على بركة الشهر إنها تفضل موجودة معانا في بيوتنا ومآنسانا في حياتنا بقية السنة. الأغنية من تأليف محمد الشهاوي وألحان حسين فوزي.
والله لسه بدري
“تم البدر بدري .. والأيام بتجري .. والله لسه بدري والله يا شهر الصيام” من أجمل الأغاني الرمضانية وأحزنها، عشان بنودع بيها الشهر الجميل ده كل سنة. “أيامك قليلة، والشوق مش قليل” ما تقعد معانا شوية كمان بقى يا رمضان 🙂 الأغنية من كلمات عبد الفتاح مصطفى وألحان عبد العظيم محمد.
كل سنة وانتم طيبين وبصحة وسلامة.
التعليق باستخدام حساب فيس بوك