فصل الصيف هو احلى وقت للسفر والرحلات والترفيه، ومن الأماكن الجميلة والمميزة جدًا في مصر، هي مدينة دهب واللي بتبعد عن شرم الشيخ بحوالي 100 كيلو متر، وهي مدينة سياحية بالدرجة الأولى، بس ميزتها إنها مش مدينة ساحلية تقليدية، لإن فيها طبيعة مدن البحر الأحمر، مع الساحل، مع الطابع البدوي، علشان كده هنقولك على أفضل أماكن مدينة دهب اللي ما ينفعش متروحيهاش.
أفضل أماكن مدينة دهب
- الممشى السياحي في دهب.
- جزيرة لاجونا.
- الـ Blue Hole.
- دوّار خليفة.
- Everyday Cafe.
الممشى السياحي في دهب
الممشى السياحي في دهب
وده طبعًا مهم للناس اللي بتحب التسوق، لإنه مليان بازارات تقدري تشتري منها هدايا تذكارية، ومنتجات تراثية فريدة، وفيه قهاوي شعبية وكافيهات، يعني المشي فيه متعة في حد ذاتها، حتى لو مش ناوية تشتري حاجة، فاشحني موبايلك أو الكاميرا بتاعتك، علشان تقدري تصوري الجمال اللي هتشوفيه.
جزيرة لاجونا
جزيرة لاجونا
وده الشاطئ الرملي الوحيد الموجود في دهب، علشان كده هتلاقيه مقام عليه فنادق ومراكز غوص، لإن المكان جذّاب جدًا للغواصين، والحياة البحرية فيه غنية وبارعة الجمال.
الـ Blue Hole
دهب يعني “Blue Hole”، ولو تشوفي الصورة وتركزي في معنى الاسم، هتتخيلي ده عبارة عن إيه، هو مش فحرة، لكنه نفق أو سرداب جوا المياه، مليان شعاب مرجانية وحياة سمكية، ده غير الكهوف المنتشرة فيه، بس عاوزين نقولك: إن مهما كان عندك حس المغامرة عالي، فلازم تكوني حريصة جدًا، وتدخليه مع محترفين، لإن للأسف في غواصين كتير بيفقدوا طريقهم في الكهوف اللي فيه، لإنها خدّاعة، وبتبان إنها مش عميقة، لكنها متاهة على الحقيقة.
دوّار خليفة
وده مكان للإقامة ريحة دهب الحقيقية، وتجارب اللي حجزوا وأقاموا فيه كلها بتقول إنه يستحق التجربة فعلًا، وتقدري تحجزيه من هنا: airbnb.com ودي صفحة دوار خليفة على فيسبوك
Everyday Cafe
وده كافيه قعدته حلوة ورايقة، وبيعملوا فيه أنشطة كتير مبهجة، هتغير لك جو في رحلتك، وخصوصًا لو في وقت الليل ومش بتعملي نشاط تاني.
لو زرتي دهب قوليلنا إيه الأماكن والأنشطة اللي عملتيها وعجبتك، ولو بتخططي تزوري دهب، فبنتمنى إننا نكون أفدناكي لرحلتك، تروحي وترجعي بالسلامة.
ودي مجموعة مقالات هتفيدك عن الصيف والمصيف:
- ألعاب وأنشطة مسلية ممكن نلعبها على شاطئ البحر
- أجمد أماكن بيع شنط البحر بالأسعار .. دقوا الشماسي
- أفضل أماكن بيع مايوهات الأطفال
التعليق باستخدام حساب فيس بوك