لاحظنا إن أمهات كتير على جروب راحة بالي بتسأل على حشرة صغيرة شكلها غريب لونها مايل للبني بيلاقوها دايمًا فى السرير وبتظهر كل فترة بالرغم من إنهم بيقضوا عليها وبالرغم من إنهم بيهتموا بنظافة البيت، وكانت معظم الإجابات إنها بق الفراش (Bedbug) وللأسف بتتغذى على الدم من خلال القرص.. فى الموضوع ده هنقولك على طريقة إبادة البق وكيفية القضاء على البق.
إيه هي حشرة البق؟
البق عبارة عن حشرة صغيرة جدًا لونها بيبقى بني مايل للإحمرار بتتغذى على دم الإنسان من خلال القرص، اتسمت ببق الفراش لأنها بتفضل إنها تعيش فى عفش البيت زي المراتب والكنب وممكن كمان تعيش فى جسم الحيوانات الأليفة.. من علامات تواجدها فى الفراش هو قرصتها المؤلمة جدًا خلال النوم واللي ممكن تسبب تهيج وحساسية للجلد ومهم إنك تدوري عليها فى الأماكن زي المراتب أو تحت السرير أو الشقوق الموجودة في الخشب عشان تقدري تتخلصي منها.
حل التخلص من البق
للأسف الحشرة دي مش سهل التخلص منها عشان كده يفضل إنك تستعيني بشركة رش متخصصة وتسيبي البيت فترة عشان تتجنبي أضرار الرش خصوصًا لو فيه أطفال.. لو مش هتقدري تعملي الخطوة دي ممكن تعملي شوية خطوات ممكن تساعدك على التخلص والوقاية منها:
- أول حاجة هتعمليها حاولي تدوري على مصدر الحشرة دي وايه هي أكتر الأماكن اللي بتظهر فيها وغالبًا بتكون في السرير، داومي على تغيير الملايات واغسليها على درجة حرارة عالية.
- للأسف البق ممكن يعيش فى المراتب عشان كده ممكن تكنسيها بالمكنسة الكهربائية بعد ما تشيلى الملايات وبعدين تطلعيها فى الشمس فترة كفاية لأن درجة الحرارة العالية بتقضي عليه.
- لازم تنضفي تحت السرير وتهويه كويس كل فترة بالذات لو مخزنة حاجات تحتيه وممكن تحطي حبات الفلفل الأسود أو قرون الشطة فى الأركان تحت السرير كطريقة طبيعية للتخلص منهم لإن ريحتهم النفاذة بتطرد الحشرات.
- لو فيه شقوق فى المكان اللي بتظهر فيه الحشرة لازم تسديها لأنها ممكن تكون بتعيش فيها.
لو منفعتش الطرق دي ممكن تعملي كل خطوات النظافة السابقة وترشي المكان بمبيد حشري ومتدخليش المكان الا بعد ما تتخلصي من الريحة تمامًا.
حشرة البق حشرة مزعجة وقرصتها مؤلمة جدًا، خليكي دايمًا حريصة على تهوية البيت وغرف النوم وتعرضهم للشمس بشكل يومي وتعملي شوية الخطوات البسيطة دي عشان متتعرضيش للتجربة دي.
المصدر:
Cleanipedia
WebMed
التعليق باستخدام حساب فيس بوك