محتويات المقال
لو كنتي أم وبتشتغلي في نفس الوقت، ده بيحط عليكي عبء كبير. لكن لو معاكي آيفون، المجهود ده ممكن يكون أقل مع مجموعة من التطبيقات اللي هنستعرضها معاكي في موضوعنا.
Health App
التطبيق الأول معانا مش بيتحمّل، هو أصلًا موجود بالفعل في نظام التشغيل iOS، ولو عملتي آخر تحديث iOS 14 التطبيق الصحي حصل على تحديث كبير في الطريقة اللي بيشتغل بيها.
تطبيق الصحة في آيفون مش بس بيتابع مؤشراتك الحيوية زي مسافة المشي والجري، لكن كمان بيحصل على بياناتك الصحية اللي بتديهاله زي الضغط وعدد مرات تناول المياه، وغيرها من البيانات ويبدأ يكوّن فكرة عن نظامك الصحي ويديكي ملاحظات ومعلومات عن جسمك. وكمان بيتابع الحالة الصحية زي الدورة الشهرية وغيرها بالإضافة لمتابعة النوم.
يعني مع تطبيق الصحة في آيفون تقدري تتابعي حالتك الصحية وعدم إهمالها تحت ضغط الشغل ورعاية الأطفال.
monefy: money tracker
سواء كنتي بتديري بنفسك ميزانية البيت. أو عندك ميزانية خاصة بمشروع بتشتغلي عليه مثلًا، التطبيق monefy: money tracker يعتبر مثالي لإدارة المشروعات الصغيرة أو ميزانية البيوت. والميزة إنه مش بس بيحسب كام الميزانية الشهرية وباقي منها كام واتصرف منها كام، لكنه كمان بيحلل الأماكن اللي تم الصرف فيها، بحيث تبقي عارفة معدل صرفك على الأكل مثلًا أو صرفك على الترفيه.. وهكذا.
MultiTimer
الأهم من إدارة المال هي ادارة الوقت. تطبيق MultiTimer مدير رائع للوقت. تقدري تحسبي الوقت من تاريخ اليوم لأي تاريخ في المستقبل. ولو بتسرحي في الوقت وبتنسي الشغل اللي وراكي، ممكن تظبطي التطبيق بحيث مثلًا يديكي 10 دقايق راحة كل 60 دقيقة عمل.. وهكذا.
الأكاونت كمان بيحسب عدد مرات الحاجات: يعني لو بتتلخبطي مثلًا شربتي مياه كام مرة، ممكن تضيفي كاونتر بعدد المرات. باختصار: مفيش حاجة لها علاقة بالوقت ممكن MultiTimer ما يحسبهاش لك.
Trello
واحد من أهم التطبيقات الشاملة. يعني بيعمل أكتر من وظيفة حسب رغبتك والطريقة اللي هتستعمليه بيها.
Trello أداة رائعة في تنظيم الشغل اللي وراكي في قوائم. وكمان بيفكرك بيها. الأحلى أنه قابل للمشاركة مع فرق وأشخاص تانيين. يعني لو كنتي تيم ليدر، هينفعك جدًا عمل حسابات لكل الناس اللي معاكي في التيم بحيث توزعي عليهم المهام وتتابعي تنفيذها بدون هرجلة أو اتصالات كتير. كل واحد هيكون عارف وراه إيه وامتى. وانتي هتكوني عارفة مين عمل إيه امتي.
ولو كنتي بتشتغلي في مؤسسة كبيرة في الغالب، هيطلبوا منك تستعملي Trello لتنظيم الوقت والمهام على فرق العمل. أما أنا فكنت باستخدمه لتنظيم المشتريات ومشاركة قوائم المشتريات مع كل أفراد العيلة بحيث كل واحد يضيف الحاجه اللي هو عاوزها واللي ينزل يشتري لكل الأسرة الحاجات اللي عاوزينها.. مش قلت لك Trello قابل للاستخدام بأكتر من شكل تحبيه؟
التعليق باستخدام حساب فيس بوك