صلاة التراويح في شهر رمضان عالم تاني من الراحة النفسية والسعادة، محدش يقدر يتجاهل اللحظة اللي بنردد فيها دعاء التراويح والمسجد بيترج من صوت آمين، ومن شدة حبنا واهتمامنا بيها بنعمل بحث كل سنة عن كيفية صلاة التراويح رغم إننا عارفينها كويس لكن زيادة تأكيد واطمئنان.
حابين نقول لك إن الصلاة في أي مكان مقبولة وبتقرّبك من ربنا، والمساجد اللي هنذكرها في المقال ده مش شرط تقطعي لها مسافة طويلة من مكان لمكان، لكن لو جنبك واحد فيهم ما تفوتيش فيه الصلاة، خاصة بعد إعلان وزارة الأوقاف استئناف الصلاة فيهم من جديد عكس اللي حصل رمضان اللي فات.
لكن كمان بنفكرك بإجراءات وزارة الأوقاف والخاصة بالحماية من كورونا زي عدم اصطحاب الأطفال للمسجد وغلق دورات المياه، والتباعد الاجتماعي والالتزام بالكمامة قبل دخول أي مسجد، وإنه يكون معاكي سجادة الصلاة الخاصة بيكي، وطبعًا مفيش تهجد ولا اعتكاف في المساجد السنة دي.
اقرأي أيضا: أفكار لتشجيع الأطفال على الصلاة
أفضل مساجد صلاة التراويح في رمضان
- مسجد عمرو بن العاص.
- مسجد الحصري.
- مسجد مصطفى محمود.
- مسجد الحسين.
- مسجد الحمد.
مسجد عمرو بن العاص
- واحدة من أجمل المساجد اللي ممكن تصلي فيها صلاة التراويح، لو انتي من سكان مصر القديمة، أو وسط البلد، لإن مساحته كبيرة، فصوت الصلاة والمصلين بيرج القلب وبيدخّلك في حالة روحانية خاصة، كل حاجة في المكان مميزة، بداية من المدخل الرئيسي للجامع مرورًا بالصحن والميضأة، عالم تاني، المناظر الداخلية والخارجية للجامع حالة من الجمال بتجمع بين الروحانية والجمال اللي يخطف العين والقلب.
- اللوكيشن
مسجد الحصري
- لو انتي من سكان أكتوبر وخصوصًا الحي السابع، فأفضل وأشهر اختيار ليكي هو مسجد الحصري، صحيح هو مش من المساجد الكبيرة لكنه جميل جدًا، سجادتك معاكي وصلي التراويح من قلبك واطلبي كل اللي تتمنيه وانتي ساجدة، مسجد الحصري ملحق بيه جمعية خدمات خيرية هتسهل عليكي التبرع لو حابّة تقدمي تبرعك في مكان موثوق ومحترم.
- اللوكيشن
اقرأي أيضا: أجمد 10 أماكن لشراء إسدالات صلاة شيك
مسجد مصطفى محمود
- مسجد جمعية مصطفى محمود، صحيح مش هتلاقي فيه زخارف عظيمة زي عمرو بن العاص، ولا فيه بهرجة أو أي شكل من الأشكال المبالغ فيه أو رائعة الجمال، غالبًا هتلاقي نفسك بتصلي على حصيرة بره الجامع، في كرفانات معمولة مخصوص للصلاة، لكن صوت شيخ الجامع وحالة التناغم هتحسسك إحساس رائع، المكان عمومًا فيه راحة نفسية عظيمة.
- لو انتي من سكان المهندسين أو الزمالك، أو بولاق الدكرور أو الدقي أو أرض اللواء أو جامعة الدول العربية، فمسجد مصطفى محمود هيكون مناسب جدًا للصلاة، ما تفوتيهاش خاصة العشر الأواخر.
- اللوكيشن
مسجد الحسين
- عن جمال مسجد الحسين وعظمة موقعه جنب الجامع الأزهر وفي المنطقة الأثرية الإسلامية وخان الخليلي واللي فيها هتحسي بأجواء رمضان، وهتقرأي الفاتحة وتخرجي تحسي إنك مغسولة من جواكي، المسجد من التحف المعمارية والهواء في محيطه يرد الروح، ولو ما تعرفيش فمسجد الحسين جواه أقدم نسخة من القرآن الكريم.
- اللوكيشن
مسجد الحمد
- لو انتي من سكان التجمع الخامس، فبننصحك تصلّي التراويح في مسجد الحمد، مش بس مسجد كبير لكنه واحد من أكتر المساجد اللي إدارتها حريصة على الإجراءات الاحترازية، يعني مثلًا بيعلنوا بشكل قاطع إنه ممنوع الدخول بدون كمامة نهائيًا، مش مسموح باصطحاب أطفال نهائيًا. المسجد بيعتبر واحد من أجمل المساجد الجديدة معماريًا، دخوله مش بس راحة للقلب لكن كمان راحة للعين والروح.
- اللوكيشن
اقرأي أيضا: أماكن شراء اسدال صلاة للأطفال
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك