لو انتي على جود ريدز Goodreads، هتلاقي كتير من أصحابك عاملين تحدي قراءة الكتب، كل واحدة عاملة رقم معين من الكتب هتخلصها السنة دي. وعشان أسهل عليكي إنك تخلصي التحدي بتاعك، اخترت لك 10 كتب قصيرة وكلها كتب روائية بين قصص قصيرة وروايات هتتسلي بيهم وتقضي مع أبطالهم وقت لطيف وخفيف.
أفضل 10 كتب قصيرة روائية
- البستان – محمد المخزنجي
- حكمة المصريين القدماء – سليم حسن
- لم أعرف أن الطواويس تطير – بهاء طاهر
- لا أنام – إحسان عبد القدوس
- حجرتان وصالة – إبراهيم أصلان
- عتبات البهجة – إبراهيم عبد المجيد
- حروب فاتنة – حسن عبد الموجود
- كحل وحبهان – عمر طاهر
- النداهة – يوسف إدريس
- الحمامة – باتريك زوسكيند
البستان – محمد المخزنجي
كتب قصيرة روائية
البستان هي مجموعة قصصية متقسمة 3 عوالم: عالم المادي وعالم النفسي وعالم ما وراء النفس. هتتبسطي جدًا لو بتحبي الروحانيات، وبتحبي علم النفس وبتحبي الطب، لإن د. محمد المخزنجي بيكتب دايمًا عن التلات عوالم دول وتداخلاتهم مع بعض. الكتاب 113 صفحة.
حكمة المصريين القدماء – سليم حسن
كتب قصيرة روائية
الكتاب بيجمع أهم نصوص الحكمة والأمثال والنصائح والتعاليم المصرية القديمة اللي جمعها وترجمها سليم حسن عميد الأثريين المصريين وصاحب اكتشافات أثرية مهمة اللي أهمها “موسوعة مصر القديمة”. الكتاب 160 صفحة.
لم أعرف أن الطواويس تطير – بهاء طاهر
كتب قصيرة
من أخف وأسهل المجموعات القصصية لبهاء طاهر المؤلف الروائي العظيم. بهاء طاهر من ضمن كتبه الروائية المهمة “خالتي صفية والدير” وده اتحول لمسلسل في التمانينيات، و”واحة الغروب” اللي اتحول لمسلسل في 2017. وبالرغم من عمق وتقل كتبه، إلا إن مجموعة “لم أعرف أن الطواويس تطير” لغته خفيفة وموضوعاته كمان. الكتاب 113 صفحة.
لا أنام – إحسان عبد القدوس
كتب قصيرة
لو بتحبي اللغة الكلاسيكية الرومانسية، يبقى إحسان عبد القدوس هو الإتجاه اللي تروحي له. رواية لا أنام فيها دراما وإثارة أكتر شوية من روايات تانية لإحسان عبد القدوس. طول الرواية 288 صفحة لكن لسهولة لغتها، هتكون قصيرة في وقت القراية.
حجرتان وصالة – إبراهيم أصلان
كتب قصيرة
في 138 صفحة بس وبلغة سهلة وسلسة جدًا، إبراهيم أصلان بيدخلنا عالم أسرة مصرية عايشين في أوضتين وصالة والمواقف اليومية اللي بتحصل بين رجل ومراته عواجيز عايشين مع بعض.
عتبات البهجة – إبراهيم عبد المجيد
كتب قصيرة
رواية عن البسطا اللي حياتهم بسيطة وصعبة في نفس الوقت، ازاي الواحد يبقى ظروفه وحشة كده وقادر يبتسم ويحتفظ بخفة دمه، وبصديقه؟ هتعرفوا الإجابة في الرواية دي. الرواية 250 صفحة لكن لغتها السهلة وطريقة السرد هتخليكي تخلصيها سريعًا جدًا.
حروب فاتنة – حسن عبد الموجود
كتب قصيرة
كتاب قصير جدًا لكن دسم وعميق جدًا. قصصه بتسأل عن الغواية والعزلة والسلطة والحب والخوف. بالرغم إن طول الكتاب 134 إلا إنه محتاج تمعن شوية وقراءة بطيئة. ينفع أكتر في قعدة رايقة في الويك إند.
كحل وحبهان – عمر طاهر
كتب قصيرة
عمر طاهر طبعًا من الأسماء المعروفة جدًا في الكتاب المعاصرين وأسلوبه الخفيف اللطيف معروف لكتير من القراء. بنفس الأسلوب الخفيف ده، عمر بياخدنا لرواية حب كلها روايح جميلة تقدروا تعيشوا جوه الرواية بسببها. الكتاب 179 صفحة.
النداهة – يوسف إدريس
كتب قصيرة
شيء من بعيد نداني وأول ما نداني جرى لي ما جرى لي.. الأغنية المشهورة دي من فيلم النداهة اللي متاخد عن رواية النداهة ليوسف إدريس لكن مختلف عنها شوية. لو عايزة تعرفي الاختلاف فين، ياللا اقري الرواية الـ168 صفحة.
الحمامة – باتريك زوسكيند
كتب قصيرة
رواية قصيرة مترجمة ممكن تخلص منك في قعدة واحدة من كتر ما هي كلها إثارة وتشويق إنك تعرفي البطل المحتار الخايف من مجرد حمامة هيعمل إيه ويخرج من بيته ازاي. الرواية 80 صفحة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك