محتويات المقال
من أكتر الحاجات اللي أي أم بتشيل همها مع بداية أي موسم دراسي جديد هي تحضير اللانش بوكس. من أول اختيار اللانش بوكس نفسها لقايمة مشتروات السوبر ماركت، لأفكار الأصناف اللي هنختارها لولادنا على مدار الأسبوع. الموسم الدراسي السنة دي كمان حقيقي مختلف، مليان بالقلق والتوتر والخوف على الأولاد. لكن الحياة لازم تمشي والأولاد محتاجين ده أكتر من الأهل كمان، ونزولهم المدارس مهم وضروري جدًا.
أهم حاجة إننا نوفر لهم كل وسائل الحماية ونحافظ على التعقيم والنظافة باستمرار، ونحاول دايمًا نفهّمهم ونفكرهم عشان ياخدوا كل الاحتياطات اللازمة. وفي النهاية، ربنا يحفظ كل أولادنا جميعًا. كل الظروف دي تخلينا نهتم أكتر باللانش بوكس، وبتغذية الأولاد بشكل عام عشان نحافظ على مناعتهم وصحتهم. والنهارده، هنقول لك مجموعة نصايح وخطوط أساسية مهمة هتساعدك في تحضير لانش بوكس صحي، لذيذ، متنوع وكمان سهل ومش هياخد منك وقت طويل.
نصائح تحضير اللانش بوكس
- في بداية كل أسبوع، اكتبي منيو بأفكار اللانش بوكس تكفيكي على مدار الأسبوع. على أساسها، حددي مشترواتك. وتقدري كمان تخلّي الأولاد يختاروا الأصناف اللي عايزينها من المنيو يوم بيوم. وده هيديهم إحساس بالمشاركة وحرية الاختيار.
- خلّي اللانش بوكس متوازنة بحيث يكون فيها من كل العناصر الغذائية: فواكه، خضراوات، بروتين، نشويات، ومفيش مانع من وقت للتاني تضيفي للأولاد أي نوع حلويات بيحبوها زي الشوكولاتة والكب كيك مثلًا.
- مش لازم تتقيدي بفكرة الساندويتشات في اللانش بوكس، في أفكار كتير بسيطة جدًا بس هتعمل فرق وتغيير للأولاد، زي إنك تستخدمي أي نوع من البسكوت المملح أو الكراكرز مع نوع غموس صحي زي الحمص، أو الجبنة القريش، أو الجبنة الكريمي مع الخضراوات. ولو أولادك بيحبوا السندويتشات أكتر، تقدري تغيري في نوع العيش أو طريقة تقديم الساندويتش نفسه.
- استثمري فلوسك في مجموعة أدوات بسيطة هتساعدك تحضري اللانش بوكس بشكل مختلف ولذيذ يحفز الأولاد إنهم ياكلوا، زي القطعات المتنوعة عشان تشكلي الساندويتشات، العصيان الخشبية المتنوعة في شكلها، سكاكين لتشكيل وتقطيع الخضراوات، قوالب الكب كيك بأحجام وأشكال متنوعة، وغيرها كتير.
- اعملي شوية تحضيرات بسيطة من بالليل، هتساعدك جدًا في فترة الصبح اللي الوقت فيها بيعدي جري، زي إنك تغسلي أي خضار أو فواكه وتصفيهم كويس ويكونوا جاهزين على التقطيع والرص جوه اللانش بوكس. وخلي كل مكوناتك مترتبة في التلاجة بحيث تكون كل حاجة سهلة وقدام عينك. ولو أولادك كبار ممكن تجهزي كل حاجة وهما يرصوا حاجتهم بنفسهم.
- خلي دايمًا يوم أو اتنين في الأسبوع استعيني فيهم بمنتجات جاهزة، عشان ما ترهقيش نفسك أكتر من اللازم. ودلوقتي فيه شركات كتير بتقدم مخبوزات ومنتجات متنوعة كتير جاهزة، أو محتاجة خطوات بسيطة منك عشان تكون جاهزة للأكل.
أفكار اللانش بوكس
1. أكواب التوست بحشوات متنوعة
- فكرة سهلة وبسيطة بنفس مكونات الساندويتشات لكن في شكل جديد.
- هتقطعي التوست بقطاعة دائرية وتضيفي جواها الحشوة اللي تعجب أولادك.
- الحشوة ممكن تكون: أجبان، زيتون، خضراوات، صدور الرومي المدخن، قطع فراخ صغيرة، بيض، بهارات، أعشاب
- الجبنة أو البيض هم العناصر اللي هتساعد على تماسك الحشوة جوه الأكواب، وتدخليها الفرن مش هتاخد منك دقايق بسيطة لتحضيرها.
المصدر thekitchn
المصدر taste
2. فكرة الساندويتشات الملفولة (wraps)
المصدر pinterest
المصدر allergickid
- برضه تغيير عن الساندويتشات العادية، هتستخدمي أي نوع من أنواع العيش اللي تصلح إنك تلفيها، زي العيش التورتيلا مثلًا أو حتى الكريب لقيمة غذائية أعلى.
- تقدري تقسمي الساندويتش على اتنين أو تقطعيه قطع صغيرة على قد القطمة الواحدة، وده هيسهل جدًا على الأطفال عملية الأكل وهيدي شكل مبهج، ويدي للطفل الإمكانية إنه مش لازم يخلص الساندويتش كله مرة واحدة.
- اللفائف حشواتها ممكن تكون حلوة كمان مش بس حادقة زي حشوة الشوكولاتة أو زبدة المكسرات مع الموز.
3. فكرة استخدام الأعواد الخشبية
المصدر pinterest
المصدر momontimeout
فكرة لذيذة جدًا ومختلفة، وهي إنك بدل ما تقدمي للطفل ساندويتش في صورته المعروفة، هتفككيه وتحطي مكوناته في الأعواد الخشبية، والفكرة دي ممكن تنفع مع الخضراوات أو الفواكه كمان عشان تشجعي الأولاد أكتر ياكلوها ويحبوها.
4. البانكيك
findingzest
المصدر freepik
من أكتر الأصناف اللي كل الأطفال بيحبوها ويطلبوها، طيب إيه المانع إنك تقدميها في اللانش بوكس بطريقة لذيذة؟ وخصوصًا إن البانكيك بيكون مليان بعناصر غذائية مفيدة جدًا زي البيض ومنتجات الألبان مثلًا.
5. فكرة الغموس
المصدر pinterest
المصدر licensetoblog
لو أولادك بيزهقوا من فكرة الساندويتشات، وبيحبوا فكرة النقنقة أكتر، يبقى الغموس هو الحل الأمثل ليكي سواءَ كان حادق زي غموس الجبنة القريش مثلًا، أو الحمص بالطحينة، أو حتى غموس من الخضراوات المشوية البيوريه مع الزبادي والطحينة ويتقدم مع الخضراوات أو البسكوت المملح. أو غموس مسكر زي الجبنة الكريمي مع المربى أو العسل مثلًا مع بسكوت القمح.
التعليق باستخدام حساب فيس بوك