أفكار بسيطة ورخيصة لتزيين المنزل قبل عيد ميلاد طفلك

عيد ميلاد طفلك الأول بيكون احتفال مميز ليكي، بس للأسف مهما بالغتي في مظاهر الاحتفال، طفلك مش هيكون حاسس بيه، ولا هيفتكره في يوم من الأيام، ومش هيشوفه غير في الصور بعد كده، علشان كده أحسن حاجة تعمليه عيد ميلاد بسيط وخفيف، علشان تقدري تتبسطي فيه وتكوني مرتاحة، وفي المقال ده هنقولك على أفكار بسيطة ورخيصة لديكورات البيت وتزيين المنزل قبل عيد الميلاد الطفل، وصور لأفكار ممكن تنفذي زيها:

أفكار بسيطة ورخيصة لتزيين المنزل قبل عيد ميلاد طفلك

البالونات عصاية سحرية، بس المهم تختاري ألوان متناسقة وتدوري على شكل لطيف لتنسيق البالونات مع بعضها، وهتفرق جدا في ديكور عيد الميلاد.
لو انتي مختارة “ثيم” معين لعيد الميلاد، تقدري تدوري على صور مناسبة للثيم ده على الانترنت، وتطبعيها وتنسقيها بشكل لطيف على الحوائط أو تعلقيها على أحبال بمشابك خاصة بالورق.
استفيدي بالديكورات الموجودة عندك بالفعل، زي لو في تابلوهات لطيفة في أوضة طفلك.
استخدمي صور طفلك اللي اتصورها من وقت الولادة وخلال السنة في تزيين المكان.
استخدمي الستاير كخلفية للديكور.
سالوبيتات طفلك الملونة كمان تقدري تخليها ديكور مميز.
حاولي تكون الألوان بسيطة ومريحة للعين.
لو عندك أطفال أكبر، خليهم يساعدوكي وهتبقى مناسبة حلوة للمشاركة والفرح.
مفرش بسيط من التل أو الشيفون هيخلي الديكور أنيق جدا.
الورق والقماش الملون، بيتعمل منه أشكال وتتلزق أو تتعلق، وبتدي شكل مبهج ولطيف للديكور.