بتحبي تنأنأي بين الوجبات؟بتخافي من فكرة إنك لما تجوعي بتاكلي أي حاجة قدامك وده طبعا هيخليكي تاكلي حاجات غير صحية بالمرة زي الشيبسي والشكولاتة والصودا ؟
أحب أقولك إن المقال ده معمول علشانك وعلشان كل حد بيجوع بين الوجبات وبيكون نفسه ياكل حاجة تحضيرها سهل وبسيط وفي نفس الوقت تكون حاجة صحية ولذيذة وينفع الولاد ياكلوها معانا ونستمتع بيها سوا. كمان الأفكار إلي هنقدمهالك النهاردة ممكن تجمعي بين أكتر من واحدة منهم وتعملي سفرة لذيذة لأهلك أو صحابك أو ضيوفك لو في يوم قررتوا تعملوا تجمع خفيف تتفرجوا على فيلم أو ماتش كورة مثلا أو كبديل غير تقليدي لوجبة العشا، وصدقيني هينبهروا ويتبسطوا بيها أكتر من الأكل التقليدي.
يلا بينا نتعرف سوا على 6 أفكار سهلة ولذيذة للسناكس إنتي وأولادك وضيوفك هتجتمعوا على حبها، إختاري منها إلي يناسبك وقوليلنا حبيتي إيه.
- غموس الحمص مع الخضار
- غموس الشيز كيك مع الفواكة
- أكواب البيتزا
- شيبس الخضراوات
- أصابع الجرانولا
- المكسرات بالعسل والبهارات
1-غموس الحمص مع الخضار
aninas-recipes
فكرة الغموس من أكتر الأفكار العمليه والمغذية جدا ولذيذة في نفس الوقت، والحمص لإنه بيحتوي على نسبة عاليه من البروتين والألياف بيساعد على الشبع وبيبقى طعمه حلو قوي لما بنغمس بيه الخضراوات بأنواعها. تقدري كمان تخبي جوه غموس الحمص خضراوات تانيه زي الفلفل الأحمر المشوي والبنجر وتشجعي ولادك ياكلوه معاكي هيستفيدوا جدا من العناصر الغذائية الموجودة جواه، وطريقة التغميس نفسها هتحمسهم إنهم يجربوا معاكي.
طريقة عمل غموس الحمص بالبنجر
المقادير
- 1 علبة حمص مصفاه
- 1 ثمرة بنجر مسلوقة أو مشوية
- 2 فص توم مهروس
- 1/4 كوب طحينه
- عصير ليمون
- 1 معلقة صغيرة كمون
- 1 معلقة صغيرة بابريكا
- ملح وفلفل
- زيت زيتون
الطريقة
- في محضرة الطعام إخلطي كل المكونات مع بعض لحد متوصلي لملمس ناعم جدا.
- قدمي الغموس مع رشة من زيت الزيتون وأصابع من الخضراوات إلي تحبيها( خيار-جزر-كرفس) أو أي نوع من الكراكرز .
2-غموس الشيز كيك مع الفواكة
فكرة الغموس تنطبق مش بس على الحادق لكن كمان على الحلو، ولو إنتي من محبي الشيز كيك وجربتي النوع ده من الغموس يمكن تبطلي تعملي شيز كيك تاني لإنك هتاخدي نفس طعم الشيز كيك في وقت تحضير قليل وبمجهود بسيط جدا.
طريقة عمل غموس الشيز كيك بالشكولاتة
youtube
المقادير
- 100 جم جبنة كريمي(في حرارة الغرفة)
- 150 جم لبنه أو زبادي يوناني
- 1 معلقة كبيرة زبدة (في حرارة الغرفة)
- 1/2 معلقة صغيرة فانيليا
- 2 معلقة كبيرة كاكاو خام غير محلى
- 3 معالق كبيرة سكر بودرة
الطريقة
- بإستخدام المضرب الكهربائي إخلطي كل المكونات مع بعض لحد متتجانس.
- بردي المزيج في التلاجة لمدة ساعة على الأقل.
- قدمي الغموس مع تشكيلة من الويفر وبسكوت القمح والفواكه المتنوعة.
3-أكواب البيتزا
recipes.sainsburys
كل الناس بتحب البيتزا عشان كده جيبتلك الطريقة دي سهلة وبسيطة جدا وكل الي هتحتاجيه عيش التورتيلا عشان يكون هو البديل السهل وسريع لقاعدة البيتزا المعموله من العجين. الوصفة دي تنفع مش بس كسناك، لكن كمان تنفع في لانش بوكس الأطفال، وتنفع كمان للفطار.
طريقة عمل أكواب البيتزا
المقادير
- خبز التورتيلا
- تشكيلة أجبان
- سوسيس
- زيتون مخلي
- فلفل-طماطم-مشروم (أو أي خضراوت تفضليها)
- صلصة البيتزا الجاهزة
- زعتر مجفف
الطريقة
- بإستخدام قطاعة دائرية أو حتى كوباية قطعي عيش التورتيلا على شكل دواير عشان تكون مناسبه لحجم صينية الكاب كيك.
- في صينية الكاب كيك رصي العيش التورتيلا وخليه ياخد شكل الأكواب وتقدري تدهني الصينية بمسحة خفيفة من الزيت.
- إخلطي قطع الهوت دوج مع الخضراوات والزعتر وصلصة البيتزا في بولة، وابدأي وزعيهم في الأكواب بالتساوي.
- رشي كمية وفيرة من الأجبان على كل كوب من الأكواب ودخليها الفرن على حرارة 190 لمدة ربع ساعة لحد الجبنة متسيح.
4-شيبس الخضراوات
delish
بديل أصح بكتير عن الشيبسي المقلي في زيت غزير هو إن إحنا نخبزة في الفرن ومش بس البطاطس نقدر نعملها بالطريقة دي لكن كل الخضراوات النشوية بتكون هايلة بالطريقة دي. طريقة التحضير بتعتمد على إننا نقطع الخضراوات رفيع جدا قدر الإمكان ونقلبها مع كمية بسيطة من الزيت النباتي والتوابل المشكلة عشان نديها نكهة متبلة ولذيذة ونرصها على شبكة وتحتها صينية وبكده ندي فرصة لمرور الهوا وتوزيع الحرارة حوالين كل الجوانب فالخضراوات تنشف وتقرمش وتبقى لذيذة جدا. جربي شيبسي البطاطا الحلوة كنوع من أنواع التغيير، يمكن تكون الطريقة بتاخد وقت شوية لكن تقدري تعملي كمية وتخزنيها في علب محكمة الغلق وتكون جاهزة ليكي وقت متحبي.
طريقة عمل شيبسي البطاطا الحلوة
المقادير
- 2 حبه بطاطا حجم كبير مقطعة شرايح رفيعة جدا
- 2 معلقة كبيرة زيت نباتي
- 1 معلقة كبيرة نشا
- 2 معلقة صغيرة بابريكا
- 2 معلقة صغيرة ملح
- 1/2 معلقة فلفل إسود
- 1/2 معلقة كمون
- 1 معلقة صغيرة شطة
- 1 معلقة صغيرة بودرة التوم
- 1 معلقة صغيرة مستردة بودرة
الطريقة
- إخلطي شرايح البطاطا الحلوة مع الزيت لحد ميغطيها كلها بالتساوي
- ضيفي النشا وخلطة البهارات كلها على البطاطا ووزعيها كويس
- رصي شرايح البطاطا على شبكة وتحتها صينية قابلة لدخول الفرن بدون متكدسيها فوق بعضها حتى لو إحتاجتي أكتر من صينية.
- إخبزي البطاطا على درجة حرارة 180 لمدة 30 دقيقة لحد متنشف و تقرمش ولما تبرد هتقرمش أكتر.
- قدميها مع الكاتشب أو أي صوص من إختيارك
5-أصابع الجرانولا
ودي بقى هتبقى سناك صحي هايل ليكي هيرضي رغبتك لما يكون نفسك تاكلي شكولاتايه أو حاجة مسكرة بس هيكون مشبع وصحي أكتر وكمان أوفر كتير من لما تشتريه من بره. تقدري تضيفي لأصابع الجرانولا قطع من الشكولاتة الغامقة، أو أي نوع بذور بتحبي ، أو رقائق الكورن فليكس أو الفواكة المجففة، إضافات كتير قوي ممكن تنوعي ما بينها لطعم مختلف وقيمه غذائية عالية. أصابع الجرانولا تقدري تشكليها كمان على هيئة كور وتقدميها لولادك كبديل مغذي جدا للحلويات المغلفة المليانة بالسكر.
طريقة عمل أصابع الجرانولا بزبدة فول السوداني
minimalistbaker
المقادير
- 1 و 1/2 كوب شوفان
- 1 كوب تمر طري (مخلي من البذور)
- 1/4 كوب عسل أبيض
- 1/4 كوب زبدة فول سوداني أو زبدة اللوز
- 1 كوب لوز أو بندق محمص
الطريقة
- في حلة على النار إرفعي العسل وزبدة الفول السوداني وقلبهم لحد ميتجانسوا
- في بولة إنقعي التمر في ميه مغلية لحد ميطرى تماما.
- في مجضرة الطعام ضيفي التمر واطحنيه لحد ميتحول لعجينة تقيله، ضيفي عليه المزيج السابق واضربي كل المكونات لحد متتجانس.
- بالسكينة كسري اللوز أو البدق لقطع أصغر حجما واخلطيه مع الشوفان المحمص.
- ضيفي مزيج التمر على الشوفان والمكسرات واخلطي كل المكونات مع بعض وصبيهم في صينية مبطنة بورق الزبدة.
- ساوي سطح الصينية واكبسيها كويس عشان تحافظي على تماسكها وبرديها في التلاجة لمدة 20 دقيقة قبل متقطعيها لأصابع متساوية.
- تقدري تحتفظي بيها في علبة محكمة الغلق لمدة 3 أيام.
6-المكسرات بالعسل والبهارات
skinnyms
كلنا بنحب المكسرات أحلى وأسهل نأنأه بس النهاردة حبينا نقدمهالك بطريقة جديدة مسكرة وحادقة وبهرة في نفس ذات الوقت. جربي الطريقة دي إلي هتدي حياة لأي تشكيلة مكسرات موجودة عندك
المقادير
- 2 كوب من المكسرات المشكلة(يفضل غير محمصة)
- 2 معلقة كبيرة من العسل الأبيض ( أو شراب القيقب maple syrup)
- 1 معلقة كبيرة زيت نباتي
- 1/2 معلقة صغيرة ملح
- 1/4 معلقة صغيرة فلفل إسود
- 1/2 معلقة صغيرة بابريكا مدخنة
- 1/2 معلقة صغيرة شطة
- 1/4 معلقة صغيرة كمون
الطريقة
- اخلطي كل المكونات مع بعضها في بولة كبيرة.
- افردي المكسرات في طبقة واحدة على صينية خبز مبطنة بورقة زبدة واخبزيها في فرن متسخن على درجة حرارة 180 لمدة 20-25 دقيقة لحد ميبقى لون المكسرات ذهبي وتمتص كل النكهات.
- احفظيها بعد ماتبرد في علبة محكمه الغلق في حرارة الغرفة لمدة إسبوعين وقدميها وقت الحاجة.
التعليق باستخدام حساب فيس بوك