شهر فبراير هو شهر الفلانتين أو عيد الحب، العيد إللي بقينا ننسى نحتفل به بسبب مشاغل الحياة والمسؤوليات الكتير إللي ورانا كأمهات، وأنا شخصيًا واحدة من الأمهات المطحونة إللي دايمًا تنسى تحتفل بالمناسبات الحلوة دي في زحمة الحياة. تعالوا نقرر السنة دي في فلانتين 2022 نحتفل بشكل بسيط، ونفرح نفسنا وإللي بنحبهم بشوية أفكار بسيطة وبالمتاح في بيوتنا، حتى لو بتجهيز فطار عيد الحب برومانسية ويكون مترتب بشكل مميز يفتح النفس زي الأفكار الحلوة إللي بنشوفها على السوشيال ميديا وعند بلوجرز الإنستاجرام.
تجهيز فطور عيد الحب مش محتاج منك مجهود كبير، لكن محتاج حب كتير وانتي بتحضّريه، عشان تبدأي اليوم ده بسعادة وطاقة تغير مودك وتفتح نفسك على الحياة انتي وجوزك، أو أولادك أو حتى لحد بتحبيه من أهلك أو صحابك. النهارده، هنشارك معاكي أفكار بسيطة لتنسيق الأكل وطريقة تقديمه، وكمان هنديكي أفكار لـ أكلات عيد الحب إللي ممكن تكون سهلة وسريعة في تحضيرها.
اعرفي هنا ازاي تجيبي هدايا الفلانتين بأقل التكاليف.
أفكار لترتيب وتنسيق فطور عيد الحب
على الطريقة التركية جهزي فطور عيد الحب
دايمًا بنشوف صورهم وبننبهر بجمال النظام والتنسيق بتاعهم بالرغم من بساطة مكونات الفطار: تشكيلة أجبان، خضراوات، بيض مسلوق، لكن استخدام الأطباق الخشبية في التقديم وكاسات الشاي التركي والبرطمانات المصغرة جدًا للمربى والزبدة والعسل وغيره، هيخلي شكل الفطار مريح ورومانسي جدًا.
فطور عيد الحب 2022 – المصدر: pinterest
اعملي ميك أوفر لصينية قديمة عندك
لو عندك صينية قديمة وحابة تضيفي لها لمسة جديدة عشان تقدمي عليها الفطار. ببساطة، استعيني بسبراي ملون أو أي ألوان أكريليك تحبيها وفرشة بسيطة وعيدي تلوين الصينية. حتى لو كان الفطار بسيط جدًا، ألوان الصينية والورود هتفرق في الشكل تمامًا.
عيد الحب 2022 – المصدر: Brit
فطار عيد الحب 2022 – المصدر: brit
تنسيق الفطار على بورد خشبي Charcuterie Board
من الحاجات الموضة جدًا وإللي بيطلع شكلها شيك وحلو جدًا. كل إللي هتعمليه إنك هترصّي المكونات بطريقة منمقة وبسيطة وتملي البورد تمامًا بدون أي فراغات. هو ده إللي هيديها شياكة وشكل خطير. مش لازم كل حاجة تبقى قلوب وورود عشان يبقى فطار رومانسي يعني!
أفكار فطور عيد الحب – المصدر: pinterest
أفكار لـ أكلات عيد الحب مناسبة للفطور
الوافل لـ فطار عيد الحب
الوافل مناسبة جدا لفطور عيد الحب، ضيفي لهم الفراولة والورود القابلة للأكل عشان تخليهم مميزين. تقدري كمان تضيفي لعجينة الوافل لون طعام أحمر عشان تليق أكتر على الفالانتين. قدمي معاها فواكه وطبعا مافيش أنسب من التوت والفراولة للمناسبة دي، وتقدري تقدمي معاها قهوة أو عصير وعسل. مفيش أبسط من كده!
أكلات عيد الحب 2022 – المصدر: kitchenstuff
أكلات عيد الحب 2022 – المصدر: brit
قلوب بان كيك صغيرة لفطار عيد الحب
تقدري تعمليها بكل سهولة حتى من غير ما يكون عندك قوالب مخصصة على شكل قلوب. كل إللي هتحتاجيه قطعة من الفويل تقدري تشكّليها على شكل قلب، وتصبي فيها البانكيك بمنتهى السهولة عشان ياخد الشكل المطلوب، أو تحطي العجينة في زجاجة بلاستيك إللي بتستخدم مع الكاتشب والصوصات في المطاعم وترسمي بيها شكل القلب في الطاسة.
عيد الحب – المصدر:mamacado
عيد الحب – المصدر: pinterest
أكواب البارفيه
لو بتحبي الفطار، يبقى خفيف وسهل جدًا في تحضيره، وفي نفس الوقت شكله في منتهى الشياكة، يبقى مفيش أنسب من البارفيه.
ادخلي على اللينك ده عشان تعرفي طريقة عمل بارفيه الزبادي
عيد الحب 2022
فطار فرنسي رومانسي لعيد الحب
أنا شخصيًا بسميه فطار الأوتيلات: زبدة، مربى، كرواسون، مع قهوة وعصير برتقان، كلها مكونات متحضرة وجاهزة انتي بس هتنسقيها في أطباق مناسبة، امزجي بين اللون الأحمر والأبيض مع لمسة الورد البسيطة.
أفكار فطار عيد الحب – المصدر: pinterest
فطار عيد الحب .. البيض بأنواعه
وده تقدري تنوعي وتشكلي فيه بمليون طريقة، شوفي الأفكار دي:
فطار عيد الحب 2022 – المصدر: freshdirest
فطور الفلانتين 2022 – المصدر: pinterest
فطور على شكل نقنقة
والفكرة دي طبعًا هتكون مناسبة لأكتر من شخصين، لو كنتي هتجهزي فطار لناس كتير بتحبيهم، وطبعًا لو أولادك هيشاركوكي الاحتفال، مش قادرة أقول لك هيتبسطوا قد إيه.
عيد الحب – المصدر: pinterest
عيد الحب – المصدر: Pinterest
عيد الحب – المصدر: pinterest
يلّا جهزي فطور حلو بطريقتك، واحتفلي باليوم ده عشان تفرّحي نفسك قبل ما تفرّحي إللي حواليكي، كل عيد حب وانتي طيبة ومالية بيتك حب.
التعليق باستخدام حساب فيس بوك