أفكار غير تقليدية لتصوير الأطفال حديثي الولادة

شكرا لاختراع الكاميرا إللي قدر يخلينا نسجّل أجمل اللحظات لأولادنا علشان نفضل فاكرينها طول العمر..

كل أم في الدنيا بيبقى نفسها تحتفظ بكل الذكريات الحلوة وتسجلها بالكاميرا علشان تبقى عملت لأولادها كنز حقيقي ياخدوه لما يكبروا..

هنقولك دلوقتي على شوية نصايح علشان تعرفي تصوري صور حلوة للبيبي:

1-اتفرجي كتير على صور بيبيهات مبتكرة علشان تبقي متخيلة الأفكار وتقدري تنفذيها.. ممكن تصوري صور عشوائية طبعا لكن مهم كمان تكوني محضرة SET UP للأفكار إللي عايزة تصوريها.. يعني تجهزي اللبس إللي هيلبسه البيبي والمكان إللي هيتصور فيه والاكسسوارات إللي هتكون موجودة في الصورة.

2-لو هتعملي للبيبي جلسة تصوير لازم تكوني متاكدة إنه البيبي شبعان ومغير ونايم كويس ومسترخي تماما علشان تعرفي تلقطي صور حلوة.

3-أهم حاجة تكوني مأمنة البيبي كويس.. ما تعمليش أي فكرة خطيرة ممكن تأذيه وهو بيتصور.

4-اهتمي بتصوير التفاصيل الصغيرة زي رجلين البيبي وبقه وعنيه، الأفكار دي عمرها ما بتخيب ابدًا ودايما بتتطلع حلوة ومؤثرة.

5-مش لازم كل الصور تكون في مكان مقفول زي البيت.. جربي تطلعي برة وتصوري البيبي على الرمل أو على النجيلة.. كمان ضوء الشمس الطبيعي بيفرق قوي في الصور فحتى لو هتصوري البيبي جوة البيت حاولي يكون فيه إضاءة شمس طبيعية.

6-لو عندك أولاد تانيين استغلي الفرصة وصوري البيبي الجديد مع إخواته صور الإخوات دي بتطلع رائعة فعلا.

7-ما تنسيش تتصوري كتير مع البيبي إنتي وباباه مش لازم الصور كلها يكون البيبي فيها لوحده واتصوروا كلكم مع بعض كأسرة، الصور دي لما ولادك هيكبروا هتبقى لا تقدر بمال.

8-وأخيرا اطبعي الصور وعلقيها.. بعد ما تخلصي تصوير دايما اطبعي أحسن الصور لإنه صور الأطفال وهي متعلقة بتضيف للمكان بهجة مش طبيعية.