محتويات المقال
الست المصرية معروف عنها شطارتها، وإنها ست مدبرة في بيتها وبتعرف تتصرف بالمتاح، ومن ضمن القدرات الخارقة الموجودة عند أي ست مصرية أصيلة وخصوصًا جيل أمهاتنا هي إن ما عندهمش أكل بيترمي. يعني تلاقي مثلًا الرز بتاع امبارح، فجأة كده اتحط في طاجن فخار مع شوية كريمة وبقى طاجن رز معمر خطير، أو تلاقي بواقي الفراخ المسلوقة اتحولت لسندويتشات شاورما خطيرة، كل دي أفكار كانت بتبتكرها أمهاتنا عشان بواقي الأكل ما تترميش وتعيد استخدامها بطريقة تخلينا ناكلها واحنا مبسوطين، وساعات كمان ما بنصدقش إن الأكلات دي اتعملت من بواقي أكل امبارح! ولإن هدر الطعام والتخلص من بواقي الأكل في صندوق الزبالة من العادات السيئة جدًا، المقال ده هيساعدك بمجموعة أفكار سهلة ولذيذة وجديدة لعمل وصفات من بقايا الطعام.
الفكرة الأولى: لاستغلال بقايا الفراخ المسلوقة أو المشوية
طريقة عمل إنشيلادا الدجاج
المصدر lovefoodhatewast
وصفة مكسيكية لذيذة جدًا باستخدام عيش التورتيلا تقدري تستغلي فيها بواقي الفراخ لعمل حشوة الإنشيلادا
المقادير
- 6 قطع خبز التورتيلا
- 3 كوب دجاج مطهي ومنسل
- 1/2 كوب بصل مفروم
- 1/2 كوب فلفل ألوان مفروم
- 1/2 كوب درة حلوة
- 1 معلقة كبيرة بهارات الفاهيتا
- 1 كوب جبنة شيدر مبشورة
- 2 كوب عصير طماطم
- 1 كوب طماطم مقطعة مكعبات
- 3 فصوص توم مفرومين
- ملح وفلفل
- زيت نباتي
- كزبرة خضراء للتزيين
الطريقة
- لعمل صلصة الإينشيلادا: في حلة على النار، شوحي التوم في الزيت النباتي، ضيفي عصير الطماطم والصلصة، ومكعبات الطماطم، والملح والفلفل وسيبيهم يتسبكوا على نار هادية لحد ما يسمك القوام.
- لتحضير الحشوة، اخلطي الفراخ مع بهارات الفاهيتا، والفلفل الألوان والذرة الصفرا، و 1/2 كمية الجبنة في بولة، واحشي بيهم أرغفة التورتيلا وفيها كويس على شكل رول مقفول من الجوانب.
- في صينية للفرن، ضيفي جزء من الصلصة في قاع الصينية، رصي رولات التورتيلا وغطيها بباقي الصوص ونص كوب من الجبنة ودخيها الفرن لمدة 20 دقيقة، زينيها بالكزبرة الخضراء.
الفكرة التانية: بواقي اللحمة المفرومة المتعصجة
طريقة عمل صرر الجلاش باللحمة المفرومة
المصدر lovefoodhatewast
المقادير
- بواقي اللحمة المفرومة
- أي خضراوات في تلاجتك مقطعة مكعبات صغيرة (فلفل-طماطم-جزر)
- بواقي المعلبات (ذرة-فاصوليا بيضا-فاصوليا حمراء-بسلة)
- صلصة بيتزا جاهزة
- ورق جلاش أو عجينة سبرينج رولز جاهزة
- زبدة
الطريقة
- هتخلطي كل المكونات على النار مع اللحمة المفرومة وتعملي أوراق الجلاش على شكل صرر فردية صغيرة وتحشيها بالحشوة
- هتدهني الصرر بالزبدة السايحة وتخبزيها في الفرن لحد ما تحمر، قدميها مع الزبادي أو الساور كريم.
الفكرة التالتة: بواقي البطاطس المسلوقة المهروسة
المصدر spendwithpennies
المقادير
- 1و1/2 كوب بطاطس مهروسة
- 3/4 كوب دقيق
- 1 كوب جبنة شيدر مبشورة
- بيضة
- ملح وفلفل أسود
- 1 معلقة كبيرة صلصة حارة (اختياري)
- 2 فص توم مهروس
- 1 بصلة صغيرة مفرومة ناعم
- 1/2 كوب كرفس مفروم ناعم
- 2 معلقة كبيرة زبدة
- زيت نباتي
الطريقة
- شوحي البصل والتوم والكرفس في كمية الزبدة لحد ما تبقى الخضراوات طرية وتظهر ريحتها.
- ضيفي الخضار المتشوح للبطاطس، وضيفي كمان الملح والفلفل والبيض والدقيق والصلصة الحارة والجبنة وقلبي كل المكونات مع بعض في بولة لحد ما تتجانس
- شكلي المزيج على شكل أقراص وحمريها في كمية بسيطة من الزيت النباتي، قدميها مع الساور كريم والبصل الأخضر كطبق جانبي أو كفطار لذيذ.
الفكرة الرابعة: بواقي الرز الأبيض
من أكتر الحاجات اللي بتتبقى عندنا هي الرز، جربي وصفة الرز الأسباني لإعادة تدوير الرز الأبيض المصري أو البسمتي، أو حتى الرز البني.
طريقة عمل الرز الأسباني
المصدر pbs
- 2 كوب رز مطهي
- 1/4 كوب بصل مفروم ناعم
- 1 فص توم مفروم
- 1 معلقة كبيرة صلصة طماطم
- 1 معلقة صغيرة بابريكا مدخنة (ممكن تستبدل بالبابريكا الحلوة)
- 1 معلقة صغيرة كمون
- 1 معلقة صغيرة كزبرة ناشفة
- 1 معلقة كبيرة زيت نباتي
- 1/2 كوب مرقة دجاج
- ملح وفلفل
الطريقة
- في حلة على النار، سخني الزيت وضيفي البصل والتوم والبهارات وشوحيهم لحد ما تظهر ريحتهم.
- ضيفي صلصة الطماطم وقلبيها، وبعدين ضيفي الرز الباقي عندك وقلبي كل المكونات تقليب خفيف.
- غطي الحلة وسيبي الرز يتشرب النكهات لمدة 10 دقايق وقدميه.
التعليق باستخدام حساب فيس بوك