محتويات المقال
عيد الفطر السنة دي مختلف عن أي عيد قبل كده، معظمنا متعودين نسافر أو نخرج أو نتجمع مع عيلتنا الكبيرة، فعمرنا ما جه في بالنا إننا محتاجين نعمل مجهود عشان ولادنا يحسوا بحلاوة العيد. وعارفة إن فيه أمهات كتير قوي زيي، بالهم مشغول هنقضيه إزاي السنة دي واحنا برده لسه في البيت؟ هنا هنقولك أفكار مختلفة لقضاء العيد في المنزل مع الأولاد.
أفكار مختلفة لقضاء العيد في المنزل مع الأولاد، علشان تفرحوا معاهم وتنبسطوا بأيام العيد رغم كل الظروف.
بما إن ليلة العيد ليها دايمًا روح وطعم مختلف ويفرح، ما ينفعش نعدي الليلة دي من غير احتفال، أول ما نسمع الرؤية، نبدأ نزين البيت مع الولاد وننفخ البلالين ونعلّق الأنوار واحنا مشغلين: أهلا بالعيد وبنهيص ونرقص معاهم عليها.
نحضّر لبس العيد أو بيجامات العيد زي كل سنة وما نفتكرش إننا عشان مش هنخرج يبقي مالوش لازمة، بالعكس ده هيفرق في نفسية الولاد جدًا وهيحمسهم بفرحة العيد، حتي لو هيلبسوا اللبس أو البيجامات الجديدة ويقفوا بيهم في البلكونة ونتصور ونعمل ذكريات حلوة.
-
هدية العيدية:
نحضر بلالين ونحط فيها العيدية وشوكولاتات وحلويات وأي هدايا صغيرة وبعدين ننفخها ونوزعها في البيت وعليها أساميهم، والصبح كل واحد ياخد بالونته ويفرقعها وياخد العيدية بتاعته والهدية اللي فيها. وممكن كمان نخلّي الأخوات يحضروا هدايا بسيطة لبعض ويفاجئوا بعض بيها.
أفكار لقضاء العيد في المنزل مع الاولاد – source: Rana Hany
-
زووم ميتينج:
نتفق مع عيلتنا الكبيرة علي معاد ونتجمع كلنا فيه ونخلّي الولاد يكلموا ولاد خالاتهم وأعمامهم وممكن كمان نتفق نلعب كلنا لعب مع بعض على الزووم زي بدون كلام مثلًا، منها يكونوا شافوا عيلتهم وحسوا بالتواصل اللي محتاجينه ومنها كمان يسلّوا وقتهم.
أفكار لقضاء العيد في المنزل مع الاولاد – source: Pop Sugar
-
ماكدونالدز في البيت:
لعبة التمثيل عامة من اللعب اللي الأطفال كلها بيحبوها وبما إنهم محرومين من الخروج والأكل في مطاعمهم المفضلة، دلوقتي ممكن تعملي لهم انتي الأكلات دي في العيد في البيت، بس تقدميها بشكل مختلف، زي ما بتتقدم في المطعم، وممكن كمان تحطي معاها لعبة صغيرة جديدة من لعب العيد، وتحضروا مع بعض كورنر للعب وتقعدوا تتغدوا وتمثلوا إنكم في المطعم وانتوا لابسين لبس العيد والولاد يتغدوا ويلعبوا ويعيشوا اللحظة ويتبسطوا.
source : Allan Hallsal- أفكار لقضاء العيد في المنزل مع الاولاد
-
نعمل picnic:
فكرة بديلة لفكرة المطعم أو ممكن لتاني يوم العيد إننا نبني الخيمة بتاعتنا مع الولاد ونظبطها معاهم وندخل نتغدي فيها ونتصور ونلعب.
-
البحث عن كنز treasure hunt:
ده من أكتر اللعب المسلية واللي مليانة حماس بالنسبة للولاد بس المرة ده الكنز اللي هيدوروا عليه هو جواب شكر وكلمات حب وتشجيع، نعملهم كروت بأساميهم ونزينها ونخبيها في أماكن مختلفة في البيت عشان يدوروا عليها، نكتب لهم فيه إنه بمناسبة العيد، أنا عايزة أشكرك على كذا وكذا. وفكري في أي كلمات تفرحهم وتدخل السرور لقلبهم وتفكّرهم إنهم أبطال.
أفكار لقضاء العيد في المنزل مع الاولاد – source: Rana Hany
-
وقت السينما:
بما إن ناس كتير كانت بتحب تدخل سينما في العيد، فممكن احنا نختار فيلم حلو مع بعض ونعمل فشار ونقفل الأنوار ونعمل في البيت جو السينما ونعيشهم فيه.
-
هنصيّف جوه البيت:
في فكرة متفقة مع إبني إننا هنعملها في العيد و هي إننا هنشيل السجاجيد من اوضته و نفضيها و نملي pool صغيراوي عندنا و يلبسوا مايوهات و يلعبوا فيه، و ممكن بدل ما نملاه ماية نملاه بالكور و نعمل بحر الكور او حرب الكور و نلعب معاهم.
-
تمرين الامتنان:
ما ننساش بقى في آخر اليوم إننا نقعد كلنا مع بعض وكل واحد يقول إيه أحلى 3 حاجات حصلت في يوم العيد النهارده ودايمًا نبدأ بنفسنا ونشكر ولادنا على اليوم الحلو اللي قضيناه مع بعض ونقول لهم إننا بنتبسط ونستمتع جدًا لما بنقضي وقت معاهم، عشان نعوّد عقولهم الصغيرة على التفكير في الحاجة الحلوة وعلى النعم اللي موجودة في حياته.
افتكروا إننا لما بنفرح ونفرّح الولاد معانا رغم الظروف اللي حوالينا، ورغم اللي احنا وهم حاسّين به، ده بيعلّم ولادنا المرونة والتعامل مع الظروف حوالينا بسلاسة. الحمد لله إننا لما اتحبسنا، فاحنا محبوسين في بيوتنا في أمان وسط ولادنا وقادرين ناخدهم في حضننا ونطمنهم. فرّحوا الأطفال اللي مسؤولين منكم حتى لو هتيجوا على نفسكم عشان احنا صورتهم الصغيرة لشكل الدنيا فخلّوا الصورة دي حلوة في عينيهم وخليكوا انتم العيد.
هنا جمعنا لك دليل أرقام تليفونات صيدليات القاهرة ممكن تحتاجيه في أي وقت.
التعليق باستخدام حساب فيس بوك