لقيت خبر وانا بقلب في الموبايل إن برنامج الأغذية العالمي عمل حملة عالمية #وقف_الهدر #stopthewaste لرفع الوعي بكميات الأكل الضخمة اللي بيتم الاستغناء عنها وكان ممكن تستخدم فى أكلات بدل ما تترمي، دورت فى الهاشتاج لقيت ناس كتير منهم أشهر شيفات حوالين العالم اشتركوا فى المبادرة دي وبيقدموا أفكار للإستفادة من الأكل اللي قرب يبوظ أو تاريخه قرب ينتهي.. فقررت إني أعمل حملة تطهير شاملة للتلاجة بتاعتي عشان بس أحاول أوصل للصفوف الأخيرة فى رفوف التلاجة اللي بقت عبارة عن أكوام أكل مهجورة مغطيها الأكل الفريش اللي بناكله كل يوم وإتصدمت من الاكتشاف اللي لقيته، بواقي طائر حزين مثواه الأخير كان فى قاع تلاجتي، نص كيس توست نشف من برد التلاجة وقسوة الأيام، تفاح مكرمش فقد نضارته ومستني حد يعبره، موز كان بيتكاثر حواليه الهاموش فأنقذته من معاناته ودخلته التلاجة إسود، وطبعًا مش هتكلم عن علب الزبادي المنسية وغيرهم كتير..
حسيت بالذنب إني أرمي بواقي الأكل والحاجات اللي قربت تبوظ وقررت أدور على أفكار عشان اعمل لها اعادة تدوير وأحولها لوجبة أو أستخدمها كمكونات زي مثلًا إنك تعملي الزبادي اللي قرب تاريخ صلاحيتها يخلص تستخدميها فى تتبيل الفراخ أو العيش البايت ممكن تحمصيه وتعمليه بقسماط مطحون ودي وصفتين سهلين عملتهم من بواقي الأكل اللي كان هيبوظ تقدري تعمليها ومش بتاخد وقت أو مجهود..
كاساديا الفراخ
الوصفة دي سهلة جدًا وسريعة وممكن تعمليها للولاد فى اللانشبوكس وتغيري فيها زي ما تحبي فى المكونات وممكن تستبدلي عيش التورتيلا بعيش شامي أو عيش لبناني.
المكونات:
بواقي فراخ مقطعة مكعبات / بصل مقطع جوليان / شرايح فلفل ألوان / ملح / فلفل / بابريكا / توم وبصل بودرة / عيش تورتيلا / جبنة شيدر أو موتزاريلا مبشورة / خيار مخلل شرايح (إختياري) / مايونيز (إختياري).
- هتقطعي الفراخ بأي طريقة تحبيها وهتدوبي زبدة أو سمنة أو أي دهون صحية من إختيارك وتشوحي البصل والفلفل شوية وبعدين تضيفي قطع الفراخ والتوابل وممكن متضفيش توابل لو الفراخ متبلة من قبل كده وتسيبيهم شوية على النار.
- هاتي عيش التورتيلا وهتحطي الحشو فى نص العيش هتدهني مايونيز أو أى صوص بتحبيه وضيفي الجبن وحشو الفراخ اللي جهزتيه وطبقي نص العيش التاني على الحشوة وحاولي تقفليه كويس عشان الحشوة متقعش.
- حمصي العيش فى الطاسة عشان ياخد لون أو لو عندك جريل أو ساندوتش ميكر ممكن تحطيه فيهم وممكن تقدمي جمبها ساور كريم أو صوص مارينارا.
سلطة سيزر
الوصفة دي مش بتاخد أي وقت ومفيدة جدًا للولاد وكمان تعتبر وجبة غذائية متكاملة.
المكونات:
بواقي فراخ مقطعة شرايح / خس مقطع / توست محمص مكعبات / جبن بارميزان (إختياري) / مايونيز أو صوص سيزر جاهز / ملح وفلفل / زيت زيتون / عصير ليمون
هتمزجي الجبن البارميزان مع الصوص أو المايونيز وشوية زيت زيتون مع الليمون وملح وفلفل وتحطيهم على الفراخ والخس وتقلبي وعلى الوش التوست المحمص وشوية جبن بارميزان مبشورة للزينة.
ممكن كمان تعملي حاجات كتير جدًا ببواقي الفراخ زي الشوربة والباستا ولو دورتي فى الهاشتاج #وقف_الهدر #stopthewaste هتلاقي أفكار كتيرة لبواقي الأكل ووصفات شيفات كمان.. مترميش بواقي الأكل المرة الجاية وقوليلنا عملتي وصفة مبتكرة من بواقي الأكل إزاي.
المصدر:
التعليق باستخدام حساب فيس بوك