أكتر جملة مؤذية ممكن تسمعها “قيمة الهدية من قيمة صاحبها”، ودي الجملة اللي بتخلّي ناس كتير جدًا تصرف نظر عن فكرة الهدية لأنها بتخاف من الحكم عليهم أو تقييمهم خاصةً لو الحالة المادية ما تسمحش بهدية كبيرة. لذلك، قررنا نديكم أفكار هدايا على قد الإيد سواءً كانت لعيد ميلاد أو للصحاب أو أفكار هدايا تخرج، الفكرة إنها غير مكلفة، وتنفع لأي فرد في دواير الأصدقاء والعيلة أو حتى كهدايا لعيد الأم.
ممكن كمان تشوفي: اختيار هدايا عيد الحب حسب كل برج
نوت بوك وقلم جميل
على المستوى الشخصي، دي أكتر هدية ممكن تخليني أطير فوق السحاب، ناس كتير جدًا بتحتاج تعمل تو دو ليست ومش بتعرف تعمل ده على التليفون، لذلك نوت بوك شكلها جميل وقلم حبر ظريف هيخلّو الشخص اللي بتهاديه في قمة السعادةـ ودي هدية تمنها مش هيزيد عن 50 جنيه.
هنا ممكن تشوفي أفكار هدايا كتير لعيد الأم حسب ميزانيتك
مستلزمات القهوة والشاي
لو الشخص اللي هتهاديه من عشاق القهوة، ممكن تكون هديتك له حاجة من مستلزمات القهوة زي مج شيك، أو فنجان حلو، أو نوع قهوة ظريف بطحنة معينة يكون بيحبها، ممكن تكون الهدية موكا بوت، اللي بتستخلص الإسبريسو، ممكن تكون هديتك فرينش بريس اللي بتعمل رغوة ممكن تكون مضرب يدوي لطيف، ممكن تكون مج شاي عليه صورة صديقتك واسمها أو جملة بيحبها، المهم ترتبط هديتك بمزاجه الصباحي اليومي. في اللحظة دي، هتكون فعلًا هدية مؤثرة.
ما نسيناش حماتك طبعًا .. حيرة كل سنة اجيب لإيه لحماتي وتكون هدايا غير تقليدية في عيد الأم
سماعات
من أكتر الحاجات اللي بنستهلكها بسرعة جدًا ومس بنستغنى عنها هي السماعات على اختلاف نوعها وشكلها. لو عندك معلومة إن صديقتك أو قريبتك محتاجة سماعة، وانت عايز هدايا غير مكلفة، فانت عندك اختيارات كتير بتبدأ من 50 جنيه ولحد 500 انت وميزانيتك، المهم تكون بتصميم وشكل مريح لها يخليها مبسوطة ويساعدها دايمًا.
كتاب
انت أكتر شخص يعرف الطرف التاني بيحب القراءة ولا لأ، وبيحب أي مجال بالظبط، كتاب واحد موفق بيكون له أثر عظيم عند صاحبه.
محفظة
من أكتر الحاجات اللي بنستهلكها بسرعة جدًا وبنحتاج نجددها كل فترة، حتى لو مش مستهلكة، محفظة الفلوس من أكتر الهدايا القيمة اللي الطرف التاني هيكون شايلها طول الوقت وهيفتكرك في كل مرة يستخدمها.
جوزك بقى .. أفكار هدايا لجوزك ممكن تجبيهم بد ال Perfume
سكين كير skin care
منتج عناية بالبشرة (سكين كير) أساسية ناقصة صديقتك أو بنتك أو مامتك أو أيا كان الطرف التاني، هتخليها في منتهى السعادة، بنتكلم عن كريم أساس مثلًا أو كريم كولاجين، سواءً نهار او ليل، مرطب، صن بلوك نوعه كويس، كل دي هدايا هتخلّي الطرف التاني يفهم قد إيه انتي بتعتني بيه وبتحبيه، والموضوع ينطبق على الرجالة يعني كريمات الحلاقة وأدوات العناية بالبشرة للرجال أو نوع برفان جميل هيخليهم طايرين من السعادة.
شيكولاتة
الشيكولاتة عمرها ما بتخيّب، سواء كان شيكولاتة مباشرة أو داخلة في حاجة، يعني مثلًا، أنا هاكون في قمة سعادتي لو لاقيت صديقتي داخلة عليا بفطيرة شيكولاتة أو بوكس مليان أنواع الشيكولاتة اللي بحبها، أو حتى لوح شيكولاتة كبير شكله لطيف من النوع اللي بحبه.
ممكن كمان تشوفي: 7 طرق جديدة للاحتفال بعيد ميلاد جوزك
شموع فواحة
من أكتر الحاجات اللي ناس كتير بتحبها وفي نفس الوقت ناس كتير بتفتقدها في حياتها، تمنها مش كبير لكن أثرها بيكون عميق لإنها بتساعد على الاسترخاء وبتخلّي ريحة البيت جميلة وبتكون هدية قيمة بالنسبة لناس كتير خاصة لو كنت هتهديها لربة منزل أو بنت بتحب تاخد بالها من أوضتها.
ميدالية مفاتيح
دي في إيد كل الناس، أكتر حاجة بتتكسر، جملة لطيفة أو صورة حلوة أو رمز مبهج على سلسلة مفاتيح جديدة واحدة من أكتر الهدايا المميزة اللي ممكن نهادي بيها الناس.
أكسسوارات موبايل
العناية بالتفاصيل بتفرق في نفسية الشخص اللي بنقدم له الهدية، ولما يلاقينا واخدين بالنا من نوع الموبايل، وجايبين له كوفر مثلًا، أو شاحن أو حاجة محتاجها تخص الموبايل هيكون أثر الهدية رائع جدًا ولطيف، وكمان مش مكلفة أبدًا، وهيفضلوا يفتكرونا مع كل مرة يستخدموها.
التعليق باستخدام حساب فيس بوك