فكرتي هتجيبي إيه هدايا لجدتك في عيد الأم؟ .. طبعًا كلنا عارفين المثل ده “أعز من الوِلد، وِلد الوِلد” من أجمل الأمثال الشعبية اللي بتعبر عن حب الجدة لأحفادها، وطبعًا الأحفاد معروف مكانة الجدات في قلبهم، ومن أجمل المناسبات اللي بيقدروا يعبروا فيها عن حبهم ده هي “عيد الأم” وكله بيبتدي يفكر في أقتراحات وأفكار هدايا للجدة، واللي الجدة بتكون سعيدة جدًا فيه بسبب إن أحفادها فاكرينها ولو بهدايا رمزية وبسيطة.
ومن أهم الحاجات اللي المفروض تتوافر في أي هدية عمومًا إنها تكون مناسبة ومفيدة للشخص اللي هنهاديه، علشان كده هنقولك على أفكار هدايا للجدة في عيد الأم 2023.
أحلى أفكار هدايا لجدتك في عيد الأم
-
كيندل
هدايا لجدتك في عيد الأم 2023
إحنا عارفين إن النظر بيضعف كل ما بنكبر في العمر، وعلشان وقت الجدات غالبًا بيكون طويل، فمهم إنهم يستفيدوا بيه في القراءة، فممكن تكون قراءة الكتب صعبة عليهم شوية، علشان كده الكيندل هيكون حل رائع ومفيد ومسلي جدًا.
-
ألبوم صور
هدايا لجدتك في عيد الأم
ألبوم صور راقي وحجمه كبير، وتقدري تجمعي فيه كل الذكريات، وتخليها متاحة تحت إيد جدتك، أكيد هتتبسط بيه.
-
نوت بوك لكتابة مذكراتها
هدايا لجدتك في عيد الأم
لو جدتك من النوع اللي بيحب الحكايات والقصص والكتابة، ممكن تهاديها نوت بوك شيك تكتب فيه حكاويها الحلوة، أكيد هتحس بقيمة وجودها وكلامها معاكم، وممكن كمان تقوليلها تكتب فيه وصفات أكلها المميز.
-
أدوات أشغال يدوية
هدايا للجدة في عيد الأم 2021
جدات كتير بيحبوا التريكو والكروشيه والأعمال اليدوية والفنية، ففي الحالة دي تقدري تهاديها صندوق كبير فيه أجمل أدوات الفن اللي هي بتشتغل فيه، ولما تنتج حاجات ممكن تعمليلها صفحة على الفيسبوك وتسوقي لها وتوريها ردود فعل الناس الإيجابية على شغلها، هتمتن ليكي جدًا.
-
جهاز الوضوء
اقتراحات هدايا تناسب الجدات في عيد الأم
في جهاز متوفر في الأسواق لغسيل الرجل بدون ما نرفعها على الحوض أو البانيو، وده صحي جدًا وخصوصًا لكبار السن علشان يحميهم من الزحلقة أو مشاكل الوقوع على العضم.
-
جددي لها أوضتها
أفكار هدايا تناسب الجدات في عيد الأم
اعملي لها مفاجأة وجددي دهان جدران أوضتها، ولو أثاث الأوضة كمان محتاج يتجدد اعملي كده، علشان تخلي إقامتها مريحة قدر المستطاع، بس متفتكسيش قوي في التغيير لإنها هتكون مرتبطة بستايل الأوضة.
-
كرسي مريح
أفكار هدايا تناسب الجدات في عيد الأم
في أجمل من كرسي مريح جدتك تفتكرك كل ما تقعد عليه، وهي بتتفرج على المسلسل، أو بتشرب فنجان قهوةأو تكلم مامتك في التليفون؟
بس راعي قدر الإمكان إنه يكون مناسب لبقية ستايل الأثاث اللي عندها.
-
غسالة أطباق
أفكار هدايا تناسب الجدات في عيد الأم
إحنا الشباب بنكون كل يوم عاوزين نحضن غسالة الأطباق ونبوسها على المجهود اللي هي بتوفره لنا، فأكيد بالنسبة لكبار السن هتكون مفيدة جدًا، هاتيها لجدتك بالحجم المناسب لاستعمالها.
-
سلسلة أسماء أحفادها
هدايا لجدتك في عيد الأم
قطعة فضة أو دهب عليها أسامي كل أحفادها، أكيد هتكون هدية مؤثرة ومميزة، بس المهم تعمليها عند حد متخصص وشغله نضيف.
ملاحظة: أي هدية غالية، تقدري تشتركي فيها مع أخواتك أو مع بقية الأحفاد.
لو عاوزه تعرفي طرق للف الهدايا ممكن تشوفي المقال ده بالفيديو: أفكار عبقرية في تغليف ولف الهدايا
التعليق باستخدام حساب فيس بوك