أكيد أول حاجة جت في بالك لما قريتي عن موضوع الهدايا هي البرفيوم. مين فينا – سواء راجل أو ست – مش بيحب حد يهاديه ببرفيوم؟ لكن بصراحة الهدية دي أصبحت كليشيه قوي. علشان كده هاقول لك النهارده ١٠ هدايا استثنائية احنا كرجالة بيبقى نفسنا فيها بعيدًا عن البرفيوم. ممكن تاخدي منهم أفكار ممتازة علشان تشتري هدية مختلفة لجوزك – حبيبك – خطيبك – أخوكي .. إلخ.
أفكار هدايا
ساعة ذكية (الأسعار من حوالي ١٠٠٠ جنيه حتى ١٠ ألاف جنيه تقريبًا)
من أحلى الهدايا اللي بتعجب كل راجل تقريبًا. لأنها بتجمع بين إنها هدية شيك وكمان مفيدة في الحياة الشخصية لو اللي بتجيبيها له مهتم بالرياضة والحياة الصحية.
المميز في الساعة الذكية إنها متفاوتة في الأسعار ما بين الغالية جدًا (حوالي ١٠ ألاف جنيه) وبين الموديلات الأرخص نسبيًا. وطبعًا كل ما بيزيد السعر، كل ما بتزيد الشياكة والامكانيات.
وضروري تركزي في موديل موبايل اللي بتجيبي له الساعة، لأن بعض الموديلات (زي ساعات آبل الذكية) مش بتبقى متوافقة مع التليفونات اللي بنظام أندرويد (زي سامسونج أو شاومي مثلًا).
شنطة للجيم أو الخروج (من ١٠٠ الى ٥٠٠ جنيه تقريبًا)
سواء للخروجات اليومية، أو للناس اللي بتروح الجيم باستمرار. الشنطة تعتبر من أهم الأكسسوارات الرجالية اللي بيحبها كل الرجالة تقريبًا.
الجميل في الشنط أنها متعددة الاستخدامات والأسعار، وممكن تلاقي شنطة شكلها جميل جدًا وبميزانية قليلة. أهم حاجة في اختيار الشنطة إنك تكوني عارفة طبيعة حياة اللي بتشتري له الشنطة. علشان ما تشتريش شنطة جيم لواحد مالوش في الرياضة أو العكس. ودلوقتي أصبحت الشنط فيها (حبشتكانات) لطيفة زي إنها ضد السرقة أو ضد المطر أو فيها فتحات لشحن التليفون.. إلخ.
اشتراك نتفليكس / شاهد / ووتش ات / ابل تي في بلاس ..الخ (من ١٠٠ الى ١٠٠٠ جنيه تقريبًا)
تقريبًا مفيش حد فينا إلا ومشترك في خدمة ستريمنج أونلاين. لكنها بتختلف من واحد للتاني.
أما الرجالة من محبي الألعاب اللي عندهم بلاي ستيشن ممكن تشوفي لهم اشتراك في بلاي ستيشن بلاس أو بلاي ستيشن ناو.
أما محبي الأفلام، ممكن تشتركي لهم في آبل تي في بلاس (لو تليفونه من آبل) أو نتفليكس أو ووتش إت.
محبي المزيكا لازم تشتركي لهم في آبل ميوزك (لو تليفوناتهم آبل) أو يوتيوب ميوزك. والميزة إن كل الاشتراكات دي متاحة على صورة Gift Cards يعني ممكن تشتريها وتديهم الكارت أو تديهم الكود وهم هيدخلوه ويستفيدوا بالاشتراك.
أسطوانة ألعاب (من ٣٠٠ الى ١٥٠٠ جنيه تقريبًا)
وبما إننا لسه في مرحلة الهدايا الإلكترونية. لو اللي بتشتري له الهدية عنده جهاز ألعاب (سواء بلاي ستيشن أو إكس بوكس). هيعجبه قوي لو اشتريتي له أسطوانة لعبة جديدة كهدية.
فيه ألعاب مفيش عليها اختلاف بين الرجالة زي فيفا أو PES أو Call Of Duty وطبعًا GTA لكن يستحسن تعملي عملية استطلاع خلف خطوط العدو وتشوفي نوعية الألعاب اللي بيلعبها، أو تسأليه عليها في قعدة صفا علشان تعرفي لو عنده لعبة معينة أو بيحب نوع ألعاب معين.
أدوات للعربية (من ٤٠٠ الى ٢٠٠٠ جنيه تقريبًا)
ولأننا كرجالة منقسمين: نوع من محبي العربيات والسرعة، ونوع محبي الموبايلات والتكنولوجيا. لو كان اللي بتختاري له الهدية من محبي العربيات، هتكون حاجة حلوة قوي لو اشتريتي له شنطة أدوات للسيارة. هدية عملية وبتنفع لحل أزمات كتير جدًا. بس اتأكدي الأول إن عنده واحدة.
اشتراك الجيم (من ١٠٠٠ الى ١٠٠٠٠ جنيه تقريبًا)
من الحاجات المُكلفة اللي بنحب قوي حد يعزمنا عليها هي اشتراك الجيم، سواء سنوي أو شهري أو حسب الميزانية. ممكن تشتري الاشتراك، أو تبلغي إدارة الجيم بتمديد اشتراك العضو اللي انتي عاوزاه.
فاوتشر رحلة سياحية (من ٢٠٠٠ الى ١٠٠٠٠ جنيه تقريبًا)
سواءً كان داي يوز في فندق، أو إقامة كاملة في منتجع خمس نجوم في الغردقة أو شرم. مجرد فكرة الهدية المتمثلة في فاوتشر بإقامة أو خدمات معينة في فندق، تعتبر فكرة هدية جميلة ومختلفة جدًا، وتفصل الواحد عن أيام الشغل اللي بدون إجازة لفترة طويلة.
موبايل جديد (من ١٠٠٠ الى ٢٠٠٠٠ جنيه تقريبًا)
السمارت فون بقى في كل تفصيلة في حياتنا. بالتالي هدية زي تليفون جديد ممكن تكون هدية قيمة. وطبعًا كل ما قيمتها زادت، كل ما كانت أفضل. لكن لازم تركزي مع نوع التليفونات اللي بيحبه اللي بتجيبي له الهدية (من محبي آبل ولا أندرويد) علشان تكون الهدية في مكانها مش مجرد صرف فلوس.
ماكينة إعداد قهوة (من ٣٠٠ الى ١٠٠٠ جنيه تقريبًا)
لو اللي هتشتري له الهدية بيحب القهوة، يبقى مفيش أحسن من ماكينة عمل القهوة علشان تبقى هدية فخمة وعملية في نفس الوقت. لكن حاولي تتكلمي معاه الأول إذا كان بيحب يعمل قهوته بنفسه بالطريقة التقليدية علشان الرجالة لهم أمزجة عالية قوي في الموضوع ده.
ولاعة (من ١٠٠ الى ١٠٠٠ جنيه تقريبًا)
لازم نعترف أن التدخين ضار جدًا بالصحة، لكن محبي الولاعات – بعضهم مش مدخنين على فكرة – هتتحسن حالتهم الصحية والنفسية جدًا بولاعة شكلها حلو أو طريقة عملها غريبة وجديدة.
وحاليًا منتشر ولاعات بتشتغل بالشحن زي الموبايل، ممكن تبقى هدية عملية جدًا ومختلفة وجديدة.
التعليق باستخدام حساب فيس بوك