محتويات المقال
لما ابنك أو بنتك تمّوا السنة الأولى، بتكون دي مرحلة فارقة في حاجات كتير بالنسبة لهم وبالنسبة لك. من أهم الحاجات اللي بتمر بتطور كبير بعد عمر السنة هي الوجبات اللي بياكلها طفلك، بتبدأ تظهر الأسنان الأولى وبيكون عنده قدرة أفضل على المضغ وبالتالي تبدأ مرحلة الأكل المهروس تنتهي وتبدأي تدخلي أكل بملامس مختلفه، الخضار بيكون أخشن، بتكوني دخّلتي اللحوم والأسماك والفراخ وبيبدأ طفلك يكون عنده مساحة واسعه من الاختيارات ويقدر يقعد معاكي على السفرة وياكل من نفس الأكل اللي بياكل منه أهل البيت.
في المقال ده، هنقول لك خمس وصفات مبتكرة ومغذية لطفلك بعد السنة. أهم حاجة: لو فيه أي مكون في الوصفات دي أول مرة ابنك أو بنتك يجربوه، لازم تختبريه الأول عشان تتأكدي من عدم وجود حساسية منه.
البان كيك بدقيق الشوفان و الموز
طعام الطفل في عمر السنة. مصدر الصورة whensuecooks
البان كيك ده معشوق الأطفال، ما تفهموش بيعمل لهم سحر كده بطريقة عجيبة ويخليهم ياكلوه وما يشبعوش منه. وهو طريقة حلوة ندخّل بيها البيض بشكل غير مباشر خاصة على الفطار الصبح. في الوصفة دي، حاولت استعمل بدايل صحية كتير زي دقيق الشوفان كبديل للدقيق الأبيض ودبس التمر كبديل للسكر الأبيض. وعملت الكمية بتاعتها مش كبيرة عشان ما يتفضلش عندك عجينه كتير، هي يا دوب هتكفّي فطار ابنك أو بنتك وممكن تعملي واحدة أو اتنين لنفسك لإنك هتحبيها أنا متأكدة.
مقادير البان كيك بدقيق الشوفان
- 1 بيضة
- ½ كوب دقيق شوفان
- 1 معلقه كبيرة دبس تمر
- 1 ثمرة موز كبيرة
- 1 معلقة صغيرة بيكينج باودر
- 1 معلقة كبيرة زبادي
- ¼ معلقة قرفة
- 1 معلقة صغيرة زبدة سايحة أو زيت نباتي
طريقة عمل البان كيك
- اهرسي الموزة بالشوكة وضيفي عليها البيضة ودبس التمر والزبادي والزبدة السايحة وقلّبيهم كويس.
- اخلطي المكونات الجافة: دقيق الشوفان والبيكينج باودر والقرفة وضيفيهم لخليط البيض وقلّبي كويس لحد ما يتجانسوا.
- في طاسة تيفال، ابدأي بتسوية البان كيك في مسحة خفيفة من الزبدة أو الزيت على نار هادية بالحجم اللي تحبيه. أنا شخصيًا بحب أعملهم صغيرين خالص.
- قدمي البان كيك مع الفواكه اللي يحبها طفلك، مش هتحتاجي تضيفي عسل زيادة لأنها مسكرة كفاية.
- لو اتبقى منها بعد ما استوت، شيليها في علبة محكمه الغلق في التلاجة وتقدري تاخدي معاكي وانتي خارجة هتكون سناك ظريف.
البرغل باللحمة المفرومة والخضار
طعام الطفل في عمر السنة. مصدر الصورة whensuecooks
وجبة الغدا من الوجبات المحيرة جدًا وساعات كتير الطفل بيكون جاع وانتي مش لاحقة تطبخي، فكان لازم يكون فيه وجبات للطواريء سهلة وسريعة وصحية. ومن هنا، جات لي فكرة الوصفة دي، اللي استخدمت فيها البرغل الخشن كبديل صحي للرز وكنت كل مرة أعملها ما اقدرش أقاوم ولازم آكل منها. البرغل الخشن مش معروف لينا قوي في مصر، هو مشهور أكتر عند أهل الشام. هو شبيه بالفريك شوية بس لما بيستوي، بتكون حبته لينة أكتر. جربوه ومش هتندموا، هتلاقوه متوفر عند العطارين ومحلات بيع المنتجات الشامية. الوجبة دي تعتبر وجبة متكامله فيها الخضار والبروتين والنشويات ومنتجات الألبان: كله في أكلة واحدة، هاعوز إيه أكتر من كده؟
مقادير البرغل باللحمة المفرومة والخضار
- 1 كوب برغل خشن مغسول ومتصفي
- ¼ ك لحمة مفرومة
- 1 ثمرة كوسة مبشورة
- 1 ثمرة جزر مبشورة
- ¼ كوب بسلة مسلوقة
- 1 طماطم مبشورة بدون القشرة
- ½ بصلة مبشورة ناعم جدًا
- ½ معلقة كركم
- ¼ معلقة 7 بهارات
- ملح و فلفل (كمية بسيطة ويُفضّل استخدام الملح البحري أو الصخري)
- 1 1/4 كوب مرقة دجاج أو لحمة أو خضار محضرة بالبيت
- 1 معلقة كبيرة جبنه بارميجان مبشورة
- 2 معلقة كبيرة كريمة طهي
- زبدة أو زيت زيتون
طريقة عمل البرغل باللحمة المفرومة والخضار
- في حلة على النار، شوّحي اللحمة المفرومة مع شوية من الزبدة أو زيت الزيتون وضيفي معاها البصل المبشور لحد ما تتحمر اللحمة ويتغيّر لونها.
- ضيفي الملح والفلفل والبهارات والكركم وقلّبي كويس وبعدين ضيفي البسلة المسلوقة والخضراوات المبشورة: الجزر والكوسة ويتشوحوا هم كمان مع اللحمة المفرومة.
- ضيفي بعد كده البرغل بعد غسله وتصفيته وشوّحيه كويس مع اللحمة المفرومة والخضار، وبعدين ضيفي الطماطم المبشورة والمرقة وقلّبي كله كويس وهتكملي تسوية البرغل زي الرز بالظبط، هتغطي عليه وبعد ما يغلي ويبدأ يشرب السوايل اللي فيه، هتوطي النار خالص وتسيبيه يستوي.
بعد ما يستوي البرغل وحبته تتفتح وتبقى طرية، هتضيفي الكريمة والجبنة البارميجان وتقلّبيهم مع البرغل وتطفي النار عشان يكون كريمي ولذيذ.
أقراص البطاطس بالبسلة و الكاري
طعام الطفل في عمر السنة. مصدر الصورة whensuecooks
البطاطس والبسلة من الخضراوات المفيدة جدًا للأطفال وللأسف أغلب الأمهات بتقدم البطاطس للأطفال مقلية في الزيت، وده مش اختيار صحي ولّا بيقدّم للطفل الفايدة الغذائية للبطاطس بشكل فعال. عشان كده فكرت في الوصفة دي للبطاطس والبسلة مع مجموعة بهارات لذيذة وطريقة تحميرها في كمية بسيطة جدًا من الزيت أو الزبدة بتخليها صحية أكتر. تقدري كمان تعملي كمية وتشيليها في الفريزر عشان وقت اللزوم تفكيها وتسخنيها في الفرن.
مقادير أقراص البطاطس والبسلة بالكاري
- 3 ثمرة بطاطس كبيرة مقشرة
- ¼ كوب بسلة مجمدة
- ½ معلقة صغيرة كركم
- ½ معلقة صغيرة كاري
- ¼ معلقة صغيرة كمون
- ملح وفلفل
- 2 معلقة كبيرة دقيق الشوفان
- 1 بيضة
- 1 معلقة كبيرة جبنة بارميجان مبشورة
- ¼ كوب لحمة مفرومة متعصجة (إضافة اختيارية)
- بقسماط ناعم
- زيت أو زبدة للتسوية
طريقة عمل أقراص البطاطس والبسلة بالكاري
- اسلقي البطاطس والبسلة في كمية وفيرة من المياه.
- قبل ما البطاطس تبرد، اهرسيها مع البسلة وضيفي الملح والفلفل والبهارات كلها.
- بعد ما البطاطس تبرد شوية، ضيفي البيضة ودقيق الشوفان والجبنة البارميجان (واللحمة المفرومة لو حبيتي تضيفيها) واخلطيهم كويس.
- ابدأي شكّلي البطاطس على هيئة أقراص أو أي شكل يحبوه أولادك.
- غطّي أقراص البطاطس بالبقسماط الناعم، وفي طاسة حطّي كمية بسيطة من الزيت أو الزبدة يا دوب تغطي سطح الطاسة وحمريها لحد ما تاخد لون دهبي.
- قدميها لأطفالك سخنة أو باردة مع الكاتشب.
كرات الفراخ بالكينوا
طعام الطفل في عمر السنة. مصدر الصورة masandpas
الكينوا. مصدر الصورة jessicagavin
الكينوا فوايدها ما لهاش عدد، وأهم حاجة إنها بتحتوي على نسبة عالية جدًا من البروتين والألياف ودي مهمة جدًا للأطفال في المرحلة دي. عشان كده فكرت إني أدخّلها في وصفة كرات الفراخ أو بمعنى أصح أخبيها جواها، لأن قوامها لوحدها كده صعب إن الطفل يتقبله. دايمًا بنواجه مع الأطفال مشكلة إنهم ياكلوا فراخ أو لحمة وأحلى طريقة هي إنهم ياكلوها مفرومة في صورة كور من الكفتة تتاكل بسهولة وممكن كمان تتمسك بالإيد. يفضل إنك تستخدمي الكينوا اللي لونها أبيض عشان تختفي وما تبانش جوه الكفتة.
مقادير كرات الكفتة بالكينوا
- 2 صدر فرخة مخلي
- 2 معلقة كبيرة كينوا مستوية (كل كوباية كينوا تستوي في 2 كوباية مية بنفس طريقة تسوية الرز)
- ¼ معلقة صغيرة بيكربونات الصوديوم
- ملح وفلفل
- 1 معلقة صغيرة بودرة بصل
- ½ معلقة صغيرة بابريكا
- 1 معلقة كبيرة بقدونس مفروم ناعم
- 1 معلقة كبيرة زيت
- 1 معلقة كبيرة دقيق الشوفان
طريقة عمل كرات الكفتة بالكينوا
- تخلط كل المكونات في محضرة الطعام.
- بلّي إيدك كويس بالزيت النباتي وشكلي الخليط على شكل كور صغيرة الحجم.
- اخبزي كور الكفته في الفرن على حرارة 180 لمدة 10 – 15 دقيقة لو حجمها صغير، لو أكبر هتاخد وقت أطول.
- قدميها كسناك للأطفال ياكلوها بإيديهم مع الكاتشب وممكن لوجبة متكاملة تضيفيها لصلصة الطماطم أو صلصة كريمة مع المكرونة المفضلة ليهم.
- تقدري كمان تضيفي جزر أو بروكلي مبشورين لزيادة القيمة الغذائية.
التعليق باستخدام حساب فيس بوك