لو إنتي مامي جديدة أو هتولدي فى الشتا لازم تبقي عارفة إيه الطرق اللي هتدفي بيها البيبى عشان تحميه من البرد، إحنا حبينا نساعدك ونديكى شوية نصايح ونعرفك على طرق غير تقليدية للتغطية بعيداً عن اللحاف والبطانية.
فيه دراسة اتعملت بتقول إنه العوامل البيئية للنوم ممكن تزود من خطر متلازمة موت الرضيع المفاجىءSudden Infant Death Syndrome SIDS (وفاة الطفل المفاجئ أثناء النوم)، ومن ضمن العوامل البيئية للنوم دي هي العناصر الإضافية اللي بتبقى فى السرير.. الرضيع وقت النوم لازم يكون سريره خالي تمامًا من أي الحفة أو أغطية أو ألعاب أو مخدات، لأنها ممكن تسبب الاختناق إذا اتحركت على وجه الطفل لا قدر الله لأن الطفل الرضيع مش هيقدر يشيل الغطا.. طيب إزاي هتدفي إبنك الرضيع فى الشتا لو مش هينفع نحط أي حاجات ممكن تسبب الإختناق زي اللحاف أو البطانية.. هنا هنعرفك على شوية أفكار بدائل للحاف والبطانية.
الـSleeping Bag
الـSleeping bag أو كيس النوم بيبقى عبارة عن غطا متقفل من كل الجوانب بسوستة او كبسون وفيه مكان للإيد إنها تتحرك بسهولة، ميزته إنه مفيش أى حاجة بتيجى على وش الطفل، بيبقى مغطي الطفل بالكامل لحد الرجل فبكده هتضمني إن طفلك هيكون مدفي بالكامل ومش هتقلقي من أى حاجة تييجى على وشه.
الـSwaddle أو التقميط أو القماط
الطريقة دي آمنة فقط فى حالة الطفل حديث الولادة اللي بينام على ضهره من غير ما يعرف يتحرك لو طفلك بيتقلب من جنب للتاني فالطريقة دي ممكن متكونش آمنة ليه والطريقة دي غير إنها بتستخدم كغطا دافىء للطفل بتساعد على تهدئته وعلى الشعور بالأمان أكنه فى رحم الأم.
الصورة دي هتساعدك بالخطوات إزاي تعملي الطريقة دي وفيه كمان فى بعض المحلات بطانية الـ Swaddle جاهزة لو مقدرتيش تعمليها بنفسك.
نصايح مهمة:
- لو هتعملي القماط بنفسك حاولي تستخدمي بطانية رقيقة مناسبة لبشرة المولود ولازم تنيميه على ضهره ولو لاحظتي إنه بيعرف يتقلب يفضل إنك توقفي الطريقة دي.
- طريقة القماط مينفعش تبقى محكمة جامد على جسم الطفل ولازم رجله وايده تبقى قادرة تتحرك خصوصاً عند منطقة الفخذ و الركبة.
لو إنتي بتعرفي تخيطي ممكن تعملي Sleeping bag أو كيس النوم بنفسك والفيديو ده هيساعدك تعمليه إزاى من بطانية عادية خطوة بخطوة.فى النهاية بنوضحلك إن دي إجتهادات لأفكار بديلة للتدفئة فى الشتا ومش بنخوفك من الغطا التقليدى بس حبينا نعرفك إن ممكن يبقى فيه نسبة خطر بسيطة من استخدامهم، حابين نسمع أفكارك إزاي بتغطي طفلك فى الشتا و لو عندك فكرة تانية شاركينا بيها
المصدر:
Cdc.gov
dailymedicalinfo
babycentre.co.uk
التعليق باستخدام حساب فيس بوك