أشهر 10 أفلام بتفكرنا بالكريسماس وليلة رأس السنة

في الوقت ده كل سنة الدنيا بتتملي زينة بتتعلق وأشجار مليانة ديكورات وزينة الكريسماس بألوان كلها فرحة وإحتفالات رأس السنة في كل مكان، وللناس محبين الافلام اللي هيحتفلوا بليلة رأس السنة 2021 في البيت هنفكركم بأفلام الكريسماس ورأس السنة .. أفلام قريبة من قلبنا دايمًا إرتبطت معنا بذكريات جميلة.

 

أشهر أفلام الكريسماس وليلة رأس السنة

1. فيلم Home Alone
2. فيلم The Last Holiday
3. فيلم A Christmas Carol
4. فيلم While you were sleeping
5. فيلم Christmas with the Kranks
6. فيلم  The Polar Express
7. فيلم Four Christmases
8. فيلم The Holiday
9. فيلم New Year’s Eve
10. فيلم Elf

 

فيلم Home Alone

مينفعش نجيب سيرة أفلام الكريسماس ورأس السنة إلا ومعاها فيلم Home Alone الفيلم الكلاسيكي اللي مهمًا اتفرجنا عليه مش هنزهق منه إبدًا، الفيلم بيحكي عن قصة الطفل كيفن اللي اهله نسيوه في البيت ومسافرش معاهم عشان يقضي أجازة الكريسماس فبيقعد لوحده وبيعتمد على نفسه وهيتفاجىء إن فيه حرامية بيحاولوا يسرقوا البيت فبيتصدى ليهم في مواقف كوميدية مضحكة.

 

 

فيلم The Last Holiday

الفيلم بيحكي عن قصة جورجيا الموظفة البسيطة اللي عندها حلم إنها تبقى طباخة وتفتح مطعم خاص بيها، بتتفاجىء انها عندها أورام على المخ بسبب مرض نادر ومش هتعيش أكتر من شهور قليلة، جورجيا قررت إنها تسيب شغلها وتعيش حياتها وتصرف كل الفلوس اللي حوشتها في رحلة جميلة، وليلة الكريسماس شون صديقها في الشغل هيبلغها إن جهاز الأشعة كان بايظ ومعندهاش أي أمراض والفيلم بينتهي على إنها أخيرًا حققت حلمها وفتحت المطعم اللي دايمًا كانت بتحلم بيه.

 

فيلم A Christmas Carol

الفيلم مقتبس عن رواية تشارلز ديكنز A Christmas Carol اللي بتحكي عن قصة Scrooge  العجوز البخيل اللي هيظهرله شبح شريكه المتوفي اللي بيحذره من أسلوبه مع الناس وبلغه انه هيزوره أشباح الكريسماس اللي هتعلمه  إزاي يبقى شخص أفضل وهتخليه يحتفل بأعياد الكريسماس ويحسن من معاملته للناس.

 

فيلم While you were sleeping

الفيلم بيحكي عن قصة لوسي اللي بتنقذ بيتر يوم الكريسماس من حادث سرقة بتروح معاه المستشفى وبيدخل في غيبوبة، أهله بيفتكروها خطيبته اللي كانوا هيقابلوها وبتضطر انها تكدب بسبب خوفها على جدته المريضة، بيتر بيفوق من الغيبوبة يوم راس السنة و عنده فقدان ذاكرة مؤقت و مع تطور أحداث الفيلم هنشوف لوسي إزاي هتعترف انها مش خطيبة بيتر الحقيقية.

 

فيلم Christmas with the Kranks

الفيلم بيحكي عن قصة نورا ولوثر اللي قرروا انهم مش هيحتفلوا بالكريسماس وهيطلعوا رحلة بحرية في جزر الكاريبي لان بنتهم الوحيدة مش هتكون موجودة، ولما بنتهم بلير تقرر تعملهم مفاجأة برجوعها عشان تحتفل معاهم بالكريسماس هيتعرضوا لمواقف مضحكة وخصوصًا مع الجيران اللي كانوا متضايقين من قرارهم بالسفر.

 

فيلم  The Polar Express

الفيلم بيحكي عن قصة الولد الصغير اللي مبقاش مصدق في وجود سانتا كلوز وسحر الكريسماس، وفي ليلة من ليالي الكريسماس بيركب قطار The Polar Express في رحلة للقطب الشمالي، الرحلة خلته يتعرف على أشخاص جداد رجعوله ثقته في روح وسحر الكريسماس .

 

فيلم Four Christmases

الفيلم بيحكي عن قصة كيت وبراد والمواقف المضحكة اللي بيتعرضولها يوم الكريسماس وهما بيحاولوا يقضوا وقت مع أهلهم المنفصلين في أربع أماكن مختلفة.

 

فيلم The Holiday

الفيلم بيحكي قصة أيريس وأماندا اللي بيقرروا يقضوا الكريسماس بعيد عن بيتهم بسبب إحباطهم ورغبتهم في التغيير فبيدخلوا على موقع تبادل البيوت وبيتفقوا انهم يبدلوا مع بعض بيوتهم وحياتهم لمدة إسبوعين وهناك بيتعرفوا على ناس وطباع مختلفة هتغيرهم كتير.

 

فيلم New Year’s Eve

الفيلم بيحكي قصص أشخاص مختلفة وبيورينا صراعاتهم ومشاكلهم المختلفة وإزاي  هيتغلبوا عليها عشان يعرفوا يقضوا ليلة رأس السنة.

 

 

فيلم Elf

الفيلم بيحكي قصة بادي اللي بيتربى على إيد الكائنات السحرية Elves وبيسافر لنيويورك في رحلة كلها صعوبات ومواقف كوميدية عشان يقدر يلاقي أهله الحقيقيين

هل عندك تعليق على المقال ده؟ شاركينا هنا

Leave a Comment Cancel Reply

Δ

التعليق باستخدام حساب فيس بوك