محتويات المقال
كتير مننا بيكتشفوا في نفسهم حبهم وشغفهم للطبخ، خصوصًا بعد الجواز وتكوين أسرة. وتبدأ رحلة دخولك المطبخ عشان تجهزي وجبات أسرتك اليومية، بعض الستات بتعتبرها مهمة بتقوم بيها عشان تلبي احتياجات بيتها وكتير بتتحول معاهم المهمة دي لشغف وحب كبير للطبخ والمطبخ. الطبخ فعلًا هواية رائعة وبتطلّع طاقات كبيرة من جواكي، وبتساعدك تتخلصي من ضغوطات الحياة اليومية. ممتع جدًا إحساسك بالحماس وانتي بتجربي وصفة جديدة، أو وانتي بتفتحي تلاجتك وتقرري تألفي أكلة لذيذة بالمكونات المتاحة عندك، أو إحساسك بالتحدي لما ابنك أو بنتك يكونوا غضبانين على الأكل كله فتحاولي تبتكري وصفة لذيذة ومفيدة عشان تعجبهم وترضيهم.
أكيد لو بتحبي الطبخ، هتكوني عارفة وفاهمة كويس كل الأحاسيس دي، وكمان هتكوني عارفة قد إيه لما بنشوف مشهد في فيلم أو مسلسل فيه حد بيطبخ بنتحمس جدًا وبنركز في كل التفاصيل. عشان كده النهارده، هنحكي لك على 7 أفلام رائعة كلها طبخ في طبخ. مشاهد رائعة في مطابخ محترفين، عربة طعام متجولة، محل شوكولاتة، مطاعم، مطابخ في بيوت لأشخاص بسيطة بقوا رواد في مجال الطهي وحققوا أسامي كبيرة، أو في مطبخ الشيف الصغنن (الفار الطباخ) كلها مشاهد ممتعة هتلهمك وتأثر فيكي.
6 أفلام لازم تشوفيهم لو من عشاق الطبخ
- Chef 2014
- The hundred-foot journey 2014
- July and Julia 2009
- Burnt 2015
- Ratatouille 2007
- Chocolat 2000
-
chef 2014
محدش يقدر ينسى “كارل كاسبر” اللي قرر إنه يفتح عربة طعام خاصة بالأكل الكوبي (Food Truck) لما صاحب المطعم اللي كان بيشتغل فيه كان مصمم يحجر على أفكاره ويخليه يكرر نفس المنيو اللي بيقدمها بدون أي إبداع أو تطوير، كرامته وجعته وحبه للإبداع خلاه ياخد الخطوة الكبيرة دي. ومشاهده مع ابنه، وهو بيعلمه تحضير الساندويتشات في عربة الطعام مشاهد ملهمة جدًا. الفيلم ده حقق نجاح ساحق واتعمل برنامج بنفس الاسم بيتعرض دلوقتي على نتفليكس ممتع جدًا.
-
The hundred-foot journey 2014
الفيلم ده خطير، وهيخليكي تعشقي المطبخ الهندي على وجه التحديد. بطل الفيلم حسن كاظم شيف هندي حب المهنة وورثها عن أمه اللي بيفضل كلامها ونصايحها له توجهه طول الفيلم. ما درسش الطبخ لكن اتعلمه بالفطرة، مر هو وعيلته البسيطة بظروف صعبة أجبرتهم يسيبوا الهند ويتنقلوا لبلد في ضواحي فرنسا. وهنا لعب القدر لعبته، وقرر والد حسن يشتري مطعم في البلد دي، وبالصدفة يبقى فيه قدامهم مطعم فرنسي كلاسيكي حاصل على نجوم ميشلان يبعد عنهم مسافة بسيطة جدًا، وتتوالى الأحداث الخطيرة والصراع بين الكلاسيكية الفرنسية والبهارات الهندية في فيلم درامي رائع.
-
July and Julia 2009
جوليا شايلد اسم كبير جدا في عالم الطهي، والفيلم ده أهم ميزة فيه إنه بيجمع بين عالمين وحقبتين زمنيتين، العالم الأول بيحكي قصة حياة جوليا شايلد والتحديات اللي واجهتها عشان توصل للي حققته في مجال الطهي، والعالم التاني بيحكي قصة جولي اللي قررت تهرب من الملل اللي في حياتها لما عملت مدونة طعام أو Blog بتحكي فيه تجربتها لـ524 وصفة من وصفات كتاب لجوليا شايلد طبختهم خلال سنة واحدة فقط، واللي خلاها بعد كده تبقى كاتبة مشهورة جدًا.
-
Burnt 2015
من الأفلام المميزة جدًا اللي بتحكي عن المعارك الضارية اللي بتحصل جوه مطابخ المحترفين، تدور قصة الفيلم حول آدم جونز اللي بيقوم بدوره الممثل برادلي كوبر، وهو طباخ محترف يسعى للكمال في شغله، وأمنيته هي إنه يحصل على 3 نجوم Michelin، وبيواجه مشاكل كتير بتعطله بسبب دخوله عالم الإدمان، وحياته المهنية بتتأثر جدًا بده، لكن هو بيصمم على تحقيق حلمه. هتتفرجي وتستمتعي بمشاهد كتير في مطابخ محترفين، صراع الميشيلان مش سهل خالص!!
-
Ratatouille 2007
المصدر disneyplus
ما افتكرش فيه حد ما يعرفش أو ما اتفرجش على الفيلم الرائع ده من إنتاج مشترك بين ديزني وبيكسار، إبداع لا يوصف! الفار الصغنن اللي تمرد على أهله وعشيرته، وحبه للطبخ وداه لمطبخ شيف جوستو اللي طول الفيلم بيلهمه ويوجهه ويساعده.
توليفة عجيبة وعلاقة غريبة حصلت بين ريمي الفار الصغنن ولينجويني عامل النظافة، الاتنين بقوا واحد، وريمي بقى يوجه لينجويني عشان يثبت نفسه ومكانه في عالم الطبخ، ويثبت ريمي إن الطبخ مش حكر على حد، وإن أي حد يقدر يطبخ حتى لو كان فار!!
مشاهد رائعة، ألوان وموسيقى وقصة ملهمة جدًا. وكل ما هتتفرجي على الفيلم ده، هتكتشفي فيه حاجات وأسرار جديدة ما كنتيش واخدة بالك منها، الفار الطباخ كنز لمحبي الطبخ.
-
Chocolat 2000
المشاهد الموجودة في الفيلم ده، تعتبر من أحلى المشاهد اللي اتعملت عن الشوكولاتة، المحل اللي أرضيته من البلاط القديم ومليان بأشكال وأنواع من الشوكولاتة المصنوعة والمطبوخة بالإيد، والموسيقى التصويرية الرائعة اللي بتكمل الملحمة الجميلة دي. فيان روشر، أم لبنت عندها 6 سنين سافرت مع بنتها لبلد فرنسية هادية جدًا ومتشددة جدًان مفيش فيها أي شغف أو حياة، قررت فيان تفتح محل شوكولاتة هيكون له تأثير سحري على كل سكان البلد دي، بالرغم من محاربتهم ورفضهم له في بداية الأمر. الفيلم كان مرشح لجائزة الأوسكار.
التعليق باستخدام حساب فيس بوك