محتويات المقال
أفلام عيد الفطر 2021 هتكون قوية جدًا السنة دي، أفلام العيد هي الحدث اللي ناس كتير بتستناه من سنة للتانية كواحد من أشكال الترفيه، ولأن أعياد 2020 كانت تحت ضغط الموجة الأولى لكورونا وسط حالة من الهلع والخوف والإغلاق، أفلام كتير اتحوشت للسنة دي، وخلت موسم أفلام العيد 2021 واحد من أقوى وأغنى المواسم اللي هنشوف فيها أفلام عربي وأجنبي جديدة في السينما.
الإنس والنمس
أفيش فيلم الإنس والنمسئ
واحد من أكتر الأفلام اللي متوقع لها النجاح بسبب توليفة الممثلين واحتياجنا الحقيقي لشوية ضحك، غير طبعًا البوستر الوهمي للفيلم، الإنس والنمس فيلم كوميدي لايت بطولة محمد هنيدي، منة شلبي، عمرو عبدالجليل، بيومي فؤاد. بتدور قصته عن شاب فقير بيشتغل في وظيفة حكومية، وبيقع في مشاكل كتير بسبب مهنة والده، وفي الوقت ده بيتعلق بحب صديقته اللي بتحاول تساعده في حل مشاكله، الفيلم من تأليف كريم حسن بشير وإخراج شريف عرفة.
العارف
أفيش فيلم العارف
العارف عودة يونس، الفيلم بطولة أحمد عز، وأحمد فهمي، ومحمود حميدة، ومصطفى خاطر، بتدور أحداث الفيلم عن يونس اللي بيعيش مع مراته وبنته حديثة الولادة في شقة في منطقة وسط البلد. ولظروف خاصة بيه، بيضطر يسرق بنك عن طريق الإنترنت، لكن الأحداث مش بتمر بسهولة، لأنه بيتورط مع عصابة خطيرة وبتبدأ الأحداث تتطور في إطار من التشويق والإثارة، الفيلم من تأليف محمد سيد بشير وإخراج أحمد علاء الديب.
البعض لا يذهب للمأذون مرتين
أفيش فيلم البعض لا يذهب للمأذون مرتين
واحدة من أهم نوعيات اللي بنفتقدها في السينما هي الأفلام الاجتماعية، لذلك بعتبر فيلم “البعض لا يذهب للمأذون مرتين” واحد من الأفلام المهمة في الموسم ده واللي أنا شخصيًا منتظرة أتفرج عليه جدًا، الفيلم بطولة كريم عبدالعزيز، دينا الشربيني، ماجد الكدواني، بيومي فؤاد، بتدور قصته في إطار اجتماعي عن تجربة الجواز عمومًا، وبيقدم من خلاله كريم عبد العزيز شخصية إعلامي ناجح بيشتغل ويكشف الحقايق بطريقة تنكرية فى شخصيات مختلفة وغريبة عنه، وفي النص بيتعرض لمشاكل تخص بيته ويبدأ الصراع اللي بينتهي بالطلاق وبتظهر من بعده أهم المشاكل اللي بتواجه الطرفين في المرحلة دي، الفيلم من تأليف أيمن وتار وإخراج أحمد الجندي.
العنكبوت
أفيش فيلم العنكبوت
الثنائي أحمد السقا ومنى زكي بيرجعوا من جديد في فيلم العنكبوت، المرة دي فيلم إثارة بتدور أحداثه عن تاجر مخدرات خطير بينجح إنه يبتكر نوع مخدرات جديد، وبيبدأ يبيعها. وبسبب ده بيقع في مشاكل وبتبدأ مطاردات كتير بينه وبين الشرطة، الفيلم بطولة أحمد السقا، منى زكي، ظافر العابدين، يسرا اللوزي، ريم مصطفى، محمد لطفي، الفيلم من تأليف محمد ناير، إخراج أحمد نادر جلال.
موسى
أفيش فيلم موسى
بيتر ميمي مخرج متميز، اسمه ظهر بقوة في مسلسل الاختيار، لكن المرة دي بيخوض التجربة كمؤلف ومخرج بفيلم بتدور أحداثه في إطار خيالي عن روبوت هو الأول من نوعه في الشرق الأوسط، ومن خلال الأحداث بيمر الأبطال بظروف صعبة في قالب من الإثارة والتشويق. الفيلم بطولة كريم محمود عبدالعزيز، وإياد نصار، وعمر الشناوي، وظافر العابدين، وأحمد العوضي، وأحمد حاتم.
مش أنا
أفيش فيلم مش أنا
فيلم “مش أنا” بيدور حولين حالة نفسية بتصيب حسن، واللي بيقوم بدوره الفنان تامر حسني، وبتربطه علاقة قوية جدًا بوالدته المريضة واللي بيحاول يقعد معاها أطول وقت ممكن ورعايتها. الفيلم تأليف تامر حسني، وﺇﺧﺮاﺝ سارة وفيق، بطولة تامر حسني، حلا شيحة، ماجد الكدواني، حجاج عبدالعظيم، سوسن بدر، ومحمد عبد الرحمن.
قمر 14
أفيش فيلم قمر 14
في الفيلم ده بنرجع لقصص الحب، لكن المرة دي مش قصة ولا اتنين لأ، دول خمس قصص لممثلين من الوزن التقيل، يبدو للوهلة الأولى وكأننا هنشوف امتداد لسهر الليالي، لكن المتوقع إن الفيلم يكون مختلف ومميز، قمر14 بطولة خالد النبوي، أحمد الفيشاوي، أحمد مالك، محمد علاء، خالد أنور، محمد جمعة، من تأليف محمود زهران، وإخراج هادي الباجوري.
أشباح أوروبا
فيلم أشباح أوروبا
فيلم اجتماعي عن ست بتخلّف ست توائم، في وقت ظروفها الاجتماعية سيئة جدًا، بيضطر الزوج إنه يبيع ثلاثة من الولاد بسبب الفقر، ولما بتكتشف الزوجة، بتقرر تسيب زوجها وتسافر. ومن بعدها بتبدأ تقاطعات كتير جدًا بين الشخصيات في إطار اجتماعي مشوق.
الفيلم من تأليف كريم فاروق سيناريو أمين جمال وﺇﺧﺮاﺝ محمد عبدالرحمن حماقي، بطولة هيفاء وهبي، أحمد الفيشاوي، مصطفى خاطر، أروى جودة، بيومي فؤاد، عباس أبو الحسن.
ديدو
أفيش فيلم ديدو
في إطار من الكوميديا، بتدور أحداث الفيلم عن الشاب ديدو اللي بيقرر مع مجموعة من أصحابه إنه يسرق عالم كبير ومشهور جدًا، بيكتشف الأمر ويتمكن من تحويلهم بتجربة من تجاربه لعقل أصابع، فيقعوا في مواقف كتير جدًا، الفيلم من تأليف كريم فهمي وإخراج عمرو صلاح، بطولة كريم فهمي، حمدي الميرغني، بيومي فؤاد، أحمد فتحي، محمد ثروت، هدى المفتي.
Those Who Wish Me Dead
هؤلاء الذين يتمنون لي الموت
أول يوم العيد هيوافق العرض الأول لفيلم “هؤلاء الذين يتمنون لي الموت”، الفيلم بيدور في إطار من الجريمة والإثارة، فجأة طفل في مرحلة المراهقة بيلاقي نفسه في مطاردة شرسة مع اثنين من القتلة في بلد اسمها مونتانا بعد ما يلاقي نفسه شاهد على جريمة قتل. الفيلم من بطولة أنجلينا جولي، ونيكوﻻس هولت، وﺇﺧﺮاﺝ: تايلور شرايديان.
التعليق باستخدام حساب فيس بوك