محتويات المقال
سهل قوي أكلمك عن أفلام عن الأمهات ورحمتهم بأطفالهم والتضحيات اللي بيعملوها علشان يعدوا بيهم بر الأمان. لكن الأفلام اللي اتكلمت عن الآباء أقل بكتير. يمكن لأننا – معشر الرجال – في الغالب مش بنحب نظهر الجانب العاطفي الضعيف جوانا، أو لأن مجهوداتنا ناحية أولادنا بتبقى قليلة مقارنة بالأمهات اللي – والحق يقال – بيبذلوا أضعاف مجهودنا ناحية أولادنا بنفس راضية وصدر رحب.
على كل الأحوال، هنتكلم في المقال ده عن شوية أفلام هتغير وجهة نظركم عن الأب، وهتعرفكم جوانب الرحمة والحب في قلوب الجنود المجهولة في كل أسرة.
أفلام ملهمة عن الآباء
- Taken
- الحفيد
- Jack The Bear
- Finding Nemo
- عريس من جهة أمنية
- The Persuit of Happyness
Taken
تقريبًا مفيش مجهود ممكن يبذله أب أكتر من اللي بذله “ليام نيسون” علشان يحرر بنته اللي اتخطفت من شبكة تجارة رقيق لما كانت في رحلتها الأولى لفرنسا. ليام نيسون – أو براين ميلز – استغل خبراته السابقة في عمله المخابراتي، علشان يحلل أصغر المعلومات ويقدر يوصل لبنته. وفي طريق الوصول لها، بيقع في مواجهات بلا أول ولا آخر مع تنظيمات عصابية خطيرة. بتفتح الطريق لأجزاء ثانية وثالثة من سلسلة أفلام أكشن مبنية على تضحية أب علشان يوصل لبنته.
الحفيد
ولو متخيل إنك لازم تبقى ظابط مخابرات علشان تهتم بأولادك، تبقى غلطان. فيلم الحفيد (المنتج سنة ١٩٧٥) بيورينا أيام في حياة أب عادي ما عندهوش أي مقومات خاصة. لكن في نفس الوقت، مش بيدخر جهد أو فلوس أو وقت علشان يكون جنب أولاده وأحفاده في أفراحهم وأحزانهم. عبد المنعم مدبولي قدّم في الفيلم ده واحد من أروع أدواره، لإننا حسينا إنه مش بيمثل أصلًا، هو نموذج لواحد موجود في كل عائلة من عائلاتنا تقريبًا.
Jack the Bear
الفيلم ده باعتبره واحد من الكنوز المنسية في هوليوود. الميزة إننا بنشوف مثال لأب عادي وأقل من العادي كمان. سواءً من حيث الشكل أو المال أو المهنة اللي بيعملها. لكن طاقة الحب اللي عنده ناحية أولاده غير عادية، وتحمله للمسؤولية بعد وفاة أمهم علشان يفضل البيت مفتوح في ظل وجود طفل صغير وشاب مراهق، كل المجهودات اللي بيعملها والمشاعر اللي بيقدمها هتخليك صعب تكتم دموعك قدام التمثيل الخرافي والسيناريو الرائع.
Finding Nemo
لو ليك في الأنيميشن، يبقى Finding Nemo هو أحسن فيلم ممكن تشوفه عن العلاقة بين الأب وابنه. هو صحيح العلاقة المرة دي بين أب وابن من الأسماك، لكن مش هتحس خالص إنهم كائنات مختلفة. خاصةً لما تشوف النزاع بين مشاعر الخوف ومشاعر إنك عاوز تسيب ابنك يجرب ويخوض تجربته في الحياة. وهي دي المشاعر اللي بتيجي عند كل أب لما يبدأ أولاده يكبروا ويعتمدوا على نفسهم.
عريس من جهة أمنية
بعد جرعة التراجيديا دي، تعالوا نفصل بشوية كوميديا، ولما نتكلم عن الكوميديا مفيش أحسن من عادل إمام وعلاقته ببنته (حلا شيحا) واللي بيرتبط بيها جدًا وبيرفض إنها تتجوز. حتى لو كان العريس كامل متكامل ومش ناقصه أي حاجة.
مايغركوش الكوميديا اللي في أول الفيلم، قرب النهاية هنشوف فعلًا مشاعر الأزمة عند الأب اللي لازم يستسلم في النهاية لسُنة الحياة ويبارك لبنته على جوازها. أنا شخصيًا ما قدرتش أمسك دموعي في اللحظة دي.
The Pursuit of Happiness
وأخيرًا، وبعد الكوميديا والأكشن والأنيميشن، نختم مع شوية تحفيز وطاقة إيجابية. مع الفيلم اللي يعتبر من روائع ويل سميث والمقتبس عن قصة حقيقية. واللي بنشوف فيه رحلة رجل للنجاح في عالم المبيعات، لما بيبدأ حياته من تحت الصفر كشخص بيكافح بشكل يومي علشان يجمع بين رعايته لبيته وبين نجاحه في عمله.
الفيلم فيه لحظات صادقة عظيمة في العلاقة بين الأب وابنه. وما اعتقدش إن فيه انسان عادي شاف الفيلم ده، وما مريتش عليه لحظات تأثر أو حتى بكاء.
ياريت تقولوا لي في التعليقات أفلامكم المفضلة اللي تناولت العلاقة بين الأب والابن.
التعليق باستخدام حساب فيس بوك