على قد ما البيبي التاني بيبقى مصدر سعادة ورزق للبيت على قد ما بيبقى مصدر قلق وتوتر للأخ الكبير. والمطلوب مننا احنا الكبار نتفهم ده ونستوعبه ونقدّر مشاعر الطفل اللي كان مصدر اهتمام للكل وفجأة هيبقى فيه دخيل بيشاركه الاهتمام ده ويمكن كمان بياخد أكتر منه شويتين. هاقول لكم في المقال ده شوية حاجات بسيطة محتاجين ناخد بالنا منها واحنا بنبلّغ الابن أو البنت الكبار بخبر البيبي الجديد. أنا شخصيًا عملت الحاجات دي مع ابني الكبير وساعدتنا الحمد لله نعدي الفترة الأولي بسلام.
- أول حاجة قبل ما تقولي لطفلك خبر الحمل، لازم تتأكدي إن طفلك في حالة نفسية كويسة الوقت ده. يعني ما يكونش متعرّض لأي توتر زي مثلًا بداية دخوله الحضانة أو نقله لمدرسة جديدة أو حتى لو لسه بيبدأ يتعود ينام في أوضته لوحده. المهم ما يكونش في مرحلة انتقالية أو حدث مهم في حياته في الوقت ده.
- يُفضَّل تكونوا قاعدين كلكم مع بعض: انتي وطفلك وباباه وتشرحوا له الخبر بطريقة بسيطة وكلمات سهلة ومناسبة للمرحلة العمرية.
- من الحاجات المفيدة جدًا في استقبال الطفل للخبر هي إنك قبل ما تقولي له بوقت كفاية تكوني بتحكي له قصص قبل النوم عن الأخوات وعن أهميتهم في حياة بعض وتحكي له عن طفولتك وإزاي أخواتك مهمين في حياتك.
- لو مش مستعدة إن مصر كلها والمناطق المجاورة تعرف بخبر الحمل، يبقى ما تقوليش لطفلك غير لما تبقي متقبلة إن في مدرسته أو حضانته هيعرفوا و جيرانكم هيعرفوا وصاحب السوبر ماركت اللي جنب البيت هيعرف. لأن بالنسبة للأطفال الصغيرة، خبر زي ده هيفضل شاغل بالهم طول التسع شهور وهيكونوا محتاجين يتكلموا عنه طول الوقت.
- مهم جدًا إن طفلك يعرف منك، مش من بره أو يسمعك بالصدفة بتتكلمي مع مامتك أو صاحبتك، ومهم كمان إنه يبلّغ الخبر ده لجدته أو للعيلة حتى لو كانوا عارفين قبل كده، بس إنك تطلبي من طفلك إنه يبلّغهم بإنه هيبقى أخ كبير قريب، هيدي له إحساس إن الموضوع يخصكم كلكم وإن له دور مهم في الحدث اللي جاي.
- توقعي أسئلة كتير جدًا عن الموضوع. خليكي دايمًا صبورة وجاوبي على كل اللي بيدور في دماغهم بطريقة سهلة ومناسبة لسنهم من غير ما تزهقي لأن ده من الفرص الحلوة اللي تقدري تستغليها عشان طفلك يعرف إنه مسموح له يحكي ويسأل عن أي حاجة بتيجي في باله.
- ممكن تتفرجوا مع بعض على فيديوهات علمية مناسبة لسنهم لمراحل تطور الجنين أو تجيبي كتب سهلة بألوان مفرحة تشرحي لهم بيها.
- الأطفال ما عندهمش تقدير للوقت، فاربطي معاد وصول البيبي الجديد بحدث واضح الأطفال مستنينه زي: بعد العيد / بعد الأجازة / قبل عيد ميلادي، عشان يكونوا مستعدين ومتوقعين معاد وصول البيبي.
نيجي بقي لأهم جزء وهو رد فعل طفلك على الخبر، واللي بيختلف من طفل للتاني. فيه أطفال بيبان عليهم الزعل والقلق وبيسألوا أسئلة زي: ليه عايزة تبدليني؟ ليه هو أنا مش كفاية؟ وفيه أطفال تانية بتبقى مبسوطة ومتحمسة بس برده قلقانين ومش عارفين يحددوا مشاعرهم، وممكن تلاقي تغيير واضح في سلوك الطفل أو انتكاسة في دخول الحمام أو اضطراب في النوم أو في الأكل وغيره. فأهم حاحة في الوقت ده إنك توصلي لطفلك إنه مقبول ومحبوب ومهم مهما حصل وإن مشاعر الغيرة أو التوتر دي من حقه يحس بيها وساعديه يعبر عنها واتعاطفي معاها وقرّبي منه وإشركيه في كل حاجة تخص تحضيرات البيبي.
لو مريتي بالتجربة دي، احكي لنا في التعليقات قلتي الخبر لطفلك الأول إزاي.
التعليق باستخدام حساب فيس بوك