محتويات المقال
إزيكم.. أنا شيماء الجمال. في 2016 درست مبادئ التغذية والرياضة وقدرت أخس 40 كيلو من وزني وكتبت كل رحلتي على هاش تاج سميته #من_الكرش_للكيرفي ولكن في 2020 وبسبب عملية عملتها -منعتني من الرياضة- وبعض الأدوية وطبعا الحظر رجعت تخنت 15 كيلو وبحاول أخسهم تاني معاكم ورجعت أكتب من جديد..
كنت بعاني من إدمان الطعام والبوليميا نيرفوزا ودلوقتي ابتديت أرجع تاني يبقى عندي أعراض إدمان الطعام والنهم العاطفي للأكل.. علشان كدة بقرأ كتير في الموضوع ده..
إدمان الطعام يشبه جدًا إدمان المخدرات والكحوليات.. بيشتغل بنفس الطريقة وليه نفس الآلية.
الناس إللي عندهم إدمان طعام بيقولوا إنه فاقدين تماما للسيطرة عن الأكل وخصوصا نوعيات معينة من الأكل مش بيقدروا ما ياكلوهاش وبياكلوها بكميات كبيرة وعدد مرات كبير ومهما الريجيم باظ بسببها واتضايقوا من نغفسهم وبطنهم وجعتهم وحصلت لهم مشاكل صحية برضوا مش بيعرفوا يوقفوا ..
فيه دراسة اتعلمت في جامعة ميتشيجان على 518 شخص، قدروا يوصلوا منها لأكتر 18 صنف بيسبب إدمان الطعام والناس مش بتقدر تفرمل نفسها قدام الأصناف دي وهي:
البيتزا –الشيكولاتة- الشيبسي- الكوكيز- الآيسكريم- البطاطس المحمرة- ساندوتشات البرجر بالجبنة- المشروبات الغارية إللي فيها سكر (مش الدايت)-الكيك- الأجبان الدسمة- البيكون- المعجنات (اللفائف زي السينابون)- الفشار بالزبدة- حبوب الإفطار الصباحية زي الكورن فليكس- الحلويات الجلاتينية (البنبوني المسكر الطري)- الستيك- المافن.
لما جم يشوفوا أوجه االتشابه بين الأكلات دي لقوها أكلات مصنعة processed ومليانة دهون وسكر.
طيب يا ترى إيه الأكلات إللي طلعت أقل إدمانا.. يعني أقل أكل بيسبب الإدمان؟
الخيار- الجزر- الفول بدون صلصات-التفاح- الرز البني- البروكلي- الموز- السلمون- التفاح – الدرة الطازة بدون ملح أو زبدة- الفراولة- جرانولا بار بيتي الصنع- مقرمشات سادة صحية بدون دهون ولا توابل (زي مقرمشات الشعير السادة مثلا) –صدر الفراخ- البيض- المكسرات
ولما جم يشوفوا خصائص الأصناف دي لقوها أغلبها حاجات (كاملة) whole ومش مصنعة unprocessed foods
إيه إللي بيخلي الجانك فوود إدماني؟
1- مليان دهون وسكر (نشويات) بشكل كبير وبنسب عالية، وفقير في البروتين..
2- أكل الجانك عبارة عن أكل طعم متحيق قوي وطري وبيتزفلط في سقف الحلق وده اسمه
hyper-palatable food
3- بيرفع مستوى الإنسولين في الدم فبيخليك تجوع بسرعة وتبقى عايز تاكل تاني.
4- بيزود إفراز هرمون الدوبامين بنسبة كبيرة وهرمونات تانية مسئولة عن السعادة وده إللي بيحصل بالظبط مع المخدرات.
وبعد ما قرأنا الكلام ده نعمل إيه؟
-ابعدي عن الجانك فود إللي بيتزفلط في سقف الحلق وكلي مكانه أكل تاني أصعب في البلع زي البيض مثلا بدل الآيسكريم. كلي أكل طازة ومعمول في البيت.
-ابعدي عن الأكل إللي فيه ميكس عالي من النشويات والدهون علشان بتعلي الأنسولين في الدم وبيزود الدوبامين بشكل هيخليكي مدمنة عالأكل.
-خلي الوجبة أغلبها بروتين ثم الدهون والنشويات تكون قليلة جدًا وتكون معقدة مش بسيطة.
ودلوقتي مستنية تعليقاتكم في خانة التعليقات أسفل المقال.. يلا نشارك تجربتنا!
التعليق باستخدام حساب فيس بوك