البطاطس من الحاجات اللي كل الناس بتحبها سواء كانت مسلوقة أو مقلية، لكن دايما بنكون عايزين أكلات بالبطاطس تكون جديدة ومش تقليدية، فمثلا البطاطس المسلوقة من أسهل وأسرع الوجبات اللي ممكن تتعمل واللي ممكن تشكليها على مزاجك وتستخدميها في أكلات تانية مفيدة، وطبعًا مش هتحتاجي وقت خالص في التحضير ولا هتستهلكي مواعين كتير.. ومع قرب دخول المدارس كمان هتحتاجي وصفات سريعة عشان تقدري تحطيها لولادك في اللانشبوكس كل يوم الصبح، وفي الموضوع ده هنقولك على 5 أفكار أكلات بالبطاطس سريعة وسهلة تعمليها بالبطاطس المسلوقة.
5 أكلات بالبطاطس المسلوقة سهلة وسريعة
- بطاطس بيوريه باللحمة المفرومة.
- سلطة البطاطس.
- كروكيت البطاطس.
- كب كيك بالبطاطس والجبنة.
- بطاطس ويدجز.
بطاطس بيوريه باللحمة المفرومة
بطاطس بيوريه باللحمة المفرومة
وجبة سهلة وسريعة وكلها عناصر غذائية مهمة ومش هتاخد منك وقت ولا مجهود كبير.
المقادير
- نص كيلو بطاطس مسلوقة
- لحم مفروم متعصج جاهز
- نص كوب لبن
- زبدة في درجة حرارة الغرفة
- ملح وفلفل
- جبن موزاريلا مبشورة
- بقسماط مطحون
طريقة عمل بطاطس بيوريه باللحمة المفرومة
- بعد ما تسلقي البطاطس حطي عليها مكعبين زبدة ونص كوب اللبن واهرسيهم جامد مع بعض لحد ما الزبدة تسيح والبطاطس تبقى متجانسة مع بعض وتتهرس وتبقى قوامها بيوريه ولو حابة ممكن تزودي الجبن المنشور.
- هاتي بايركس وحطي فيه طبقة من البطاطس المسلوقة.
- الطبقة التانية حطي عليها اللحم المفروم.
- الطبقة التالتة حطي بقية البطاطس ورشي رشة بقسماط مطحون عشان يدي طبقة مقرمشة
- شغلي الفرن على درجة حرارة 180 وسيبيها لحد ما الوش ياخد لون دهبي.
هنا كمان ممكن تشوفي طريقة عمل البطاطس المشوية محشية بالجبن
سلطة البطاطس
أكلات سريعة بالبطاطس -سلطة البطاطس
من السلطات الباردة اللطيفة جدًا واللي ممكن تنوعي في مقاديرها براحتك على حسب اختياراك المفضلة.
مقادير سلطة البطاطس
- بطاطس مسلوقة مقطعة مكعبات
- بقدونس
- بصل أحمر مقطع حلقات أو مكعبات صغيرة
- ملح وفلفل
- رشة بابريكا
- توم مفروم
- زيت
- معلقة مايونيز
- 4 معالق مستردة
طريقة عمل سلطة البطاطس
- هاتي الزيت والملح والفلفل والتوم المفروم والمايونيز والمستردة واضربيهم مع بعض كويس أوي
- ضيفي الخليط السابق للبصل والبقدونس والبطاطس وقلبيهم كويس مع بعض
- دخلي السلطة التلاجة وقدميها باردة
هنا بقى بالفيديو: طريقة عمل ناجتس البطاطس والبروكلي
كروكيت البطاطس
أكلات سريعة بالبطاطس – كروكيت البطاطس
من الوجبات المحببة لكل الأطفال واللي ممكن تقدميها للولاد في اللانشبوكس وممكن لو تحبي تزودي في مكوناتها بروتين زي اللحم المفروم أو الفراخ.
مقادير كروكيت البطاطس
- نص كيلو بطاطس مسلوقة
- ملح وفلفل
- رشة توم بودرة
- رشة بابريكا
- بيض
- بقسماط
- دقيق
- زيت
طريقة عمل كروكيت البطاطس
- اسلقي البطاطس وصفيها كويس أوي واهرسيها مع التوابل
- شكليها على شكل صوابع أو كور ودخليها الفريزر عشان تتشكل
- هاتي أطباق وحطي فيها الدقيق والبيض والبفسماط
- حطي البطاطس في الدقيق الأول من كل النواحي وبعدين في البيض وبعدين البقسماط
- هاتي طاسة حطي فيها الزيت واقليه فيها أو ممكن تعمليها بشكل صحي للولاد في الاير فراير
كب كيك بالبطاطس والجبنة
أكلات سريعة بالبطاطس – كب كيك بطاطس بالجبنة
وصفة لذيذة وسهلة وممكن كمان تحطيها لولادك في اللانشبوكس
المقادير
- 3 قطع بطاطس مسلوقة
- بيضة
- جبن ميكس
- ملح وفلفل
- بقدونس مقروم
- فلفل ألوان
طريقة عمل كب كيك البطاطس بالجبنة
- امزجي البطاطس المسلوقة مع الجبن والبيض والملح والفلفل والبقدونس والفلفل اللألوان وممكن تضيفي قطع زيتون كمان.
- ادهني قوالب الكيك بالزيت وحطي فيها الخليط وممكن تضيفي على الوش رشة جبنة
- دخليه الفرن على 180 حوالي تلت ساعة
بطاطس ويدجز
أكلات سريعة بالبطاطس – بطاطس ويدجز
من الأكلات المفضلة لكل الولاد وكمان صحية عشان مش هتحتاجي تقليها وممكن تديها لولادك في التمرين أو سناك أو في اللانشبوكس
مقادير بطاطس ويدجز
- 3 بطاطس مقطعة ويدجز مسلوقة
- ملح وفلفل
- زيت زيتون
- بابريكا
- توم وبصل باودر
- زعتر
طريقة عمل بطاطس ويدجز
- قلبي الزيت زيتون مع كل التوابل
- هاتي صينية بتدخل الفرن وافردي فيها البطاطس ورشي عليها الخليط السابق وقلبي كويس
- شغلي الفرن على درحة حرارة 180 وسيبي فيه البطاطس لحد ما تاخد لون مقرمش
هنا شوفي طريقة عمل البيتزا ستافت كراست
لو عجبتك الوصفات وجربتيها شاركينا برأيك في كومنت وبالف صحة وهنا 🙂
التعليق باستخدام حساب فيس بوك