من أشكال العيش اللي ليها شعبية كبيرة هو العيش التوست، مربع كدة وشكله شيك في الطبق، ده غير إمكانية إنه يتعمل بيه أشكال جميلة جدا من السندويتشات وبوصفات حقيقي محدش بيختلف عليها، بس النهاردة إحنا مش جايين علشان ناكل سندويتش بالتوست، إحنا روح الإبتكار هتخلينا نشوف له شغلانة تانية غير الأكل كسندويتش، بس قبل ما نقول عليها تعالي أقولك شوية نصائح وقت شراه هتساعدك كتير.
نصائح عند استخدام التوست في الأكلات
- اول حاجة لازم يكون ملمسة طري زي الإسفنج، متحسيش وإنتي بتضغطي عليه إن فيه مقاومة، طري زي مخدة فايبر جديدة.
- لازم يكون متغلف، متشتريش واحد مكشوف.
- هاتيه متقطع.
- احفظيه في الفريزر علشان عمره يطول.
- لو هتحطيه في لانش بوكس متحطيش فيه الخضار اللي زي الطماطم والخيار علشان هيبوش، قطعيهم جنبه علشان يفضل محافظ على نفسه.
طرق الحفاظ على الخبز طازج أطول فترة ممكنة
دلوقتي مع النصائح البسيطة دي خلينا نشوف إحنا ممكن نستخدم التوست ده في إيه غير السندويتشات.
-
للكفتة:
لو عندك مشكلة إن الكفتة بتطلع معاكي ناشفة ومش طرية زي المحلات وبتكش كمان، يبقى الحل هو انك تقطعي واحدة توست على النص كيلو لحمة وتقلبيها مع البصل والبهارات، واعمليها صوابع او كورات، هتلاقي إنها طرية جدا من جوة وحجمها مضبوط.
-
للشوربة:
من الحاجات الحلوة جدا إن فيه ناس تحب تقطع أطراف العيش التوست وهي بتعمل سندويتشات، الأطراف دي مش بتترمي، دي بتتقطع مكعبات وبترش عليها زيت زيتون وزعتر وشوية ملح ويتحطوا يتحمصوا في الفرن، تقدري تشليهم في برطمان إزاز علشان مايكتسبوش رطوبة تاني، وتستخدميه في تزين طبق الشوربة، زي مثلا شوربة الكريمة أو شوربة العدس.
أكلات شعبية مصرية: طريقة عمل شوربة العدس المصرية
-
فرينش توست:
فرينش توست نوع من أنواع الحلويات اللذيذة جدا والخفيفة وسريعة التحضير، وصدقيني اليوم اللي هتصحي الصبح تعمليها وريحة البيت اللي هيكون كلها خبز وقرفة هتخلي يومك سعيد، بنصحك تعمليها في يوم ويك إند رايق وحلو، وهقولك على طريقتها :
هتعجبك أوي الـ 3 حلويات باردة سهلة وسريعة بدون فرن في 5 دقائق
المقادير
القرفة : ملعقة صغيرة (مطحونة)
جوزة الطيب : ربع ملعقة صغيرة (مطحونة)
سكر : 2 ملعقة كبيرة
الزبدة : 4 ملاعق كبيرة
البيض : 4 حبات
حليب : ربع كوب
الفانيليا : ملعقة صغيرة
توست : 8 شرائح
سيرب : نصف كوب
طريقة عمل الفرينش توست
- 1. اخلطي القرفة المطحونة وجوزة الطيب المطحونة والسكر في وعاء سيبه على الجنب.
- 2. ذوبي الزبدة على حرارة متوسطة وضيفيهالخليط القرفة.
- 3. حطي البيض والحليب والفانيلا واخلطي كويس لحد ماتتجانس المكونات.
- 4. اغمسي شرائح التوست بخليط البيض و اقليها في طاسة غير لاصقة لحد ماتتحمر وتبقى ذهبية اللون من الجهتين.
- 5. قدميها سخنة مع الزبدة والسيرب حسب الرغبة.
-
مع السلطة:
فاكرة العيش اللي حمصناه مع الشوربة فوق، تقدري تستخدميه مع السلطة برضه، هو نفسه بالوصفة بتاعت الزيت الزيتون والزعتر، او ممكن تخليه بطعم أخف والله هو زبدة سايحة وملح وبشر جبنة رومي أو برميزان، هتحمصيه في الفرن برضه وتشليه في وعاء زجاجي هيكون إضافة جميلة جدا للسلطة.
-
بقسماط:
من أكتر أنواع البقسماط اللي فعلا هتجيب معاكي نتيجة ممتازة مع الفراخ البانيه والسمك الفيليه هو بقسماط اللي معمول من العيش التوست، جربي تنشفيه في الفرن مع زعتر وبقدونس والريحان وبابريكا، اطحنيها مع شوية ملح خفيف وجبنة رومي او برميزان، استخدميهم مع الفراخ البانيه والسمك البانيه هتلاقيه ناجح جدا ولذيذ وطري بجد.
هي دي اكتر الإستخدمات الشائعة غير السندويتش للتوست، هتلاقي إنها لذيذة جدا وبتكون إضافة ممتازة لأكلك، جربيها وقولي لنا مين فيها اللي عجبك، ولو ليكي استخدمات تانية تعرفيها اكتبيها لنا في الكومنتات .
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
المصادر
www.buzzfeed.com
kitchen.sayidaty.net
التعليق باستخدام حساب فيس بوك