محتويات المقال
المقال ده موجه لكل أم محتاسة في تحضير الشنط علشان أسبوع ولا أسبوعين مصيف، وكمان طول الوقت تفكيرها هيكون في أكلات في المصيف واستريح أنا؟! .. أنا حاسة بيكي، عارفة إن الموضوع مش بس هدوم، إنما كمان فيه قسم التغذية اللي إنتي محتاجة تفكري فيه خصوصًا لو إنتي هتقضي فترة المصيف في شاليه أو شقة متأجرة، يعني جزئية توفر الأكل مش متوفرة زي ما هي في الفنادق مثلًا.
وعلشان الموضوع ما يكونش صعب، لازم نتبنى فكرة اللي أهم من الشغل تضبيط الشغل، وده مش بيتم إلا من خلال إنك توفري أداوت معينة هتساعدك في إنك تاخدي شوية حاجات معاكي هتنقذك كتير، زي مثلًا:
ادخلي على جروبات السفر
لو إنتي رايحة مكان جديد أول مرة هتصيفي فيه، يبقى من الخطوات اللي محتاجة تعمليها حتى قبل ما تحجزي في أي مكان إنك تستفيدي من الموبيل في إيدك، وده عن طريق إنك تستخدمي السوشيال ميديا وتشفي الجروبات الخاصة بالسفر، الحلو فيها إنك بتلاقي تبادل خبرات جميل جدًا فيها، وفيه ناس بتجاوب باستمرار وكمان ممكن يرشحوا لك أماكن أفضل.
أكلات تاخديها معاكي في المصيف
تستخدمي Googel Map
ودي برضه لو إنتي رايحة المكان أول مرة وما تعرفيش تفاصيله، المميز فيه إنك تقدري تعرفي أماكن أقرب سوبر ماركت، أقرب صيدلية، أقرب مستشفى، وده طبعًا لحالات الطوارئ وخصوصًا لو فيه أطفال، وعلى فكرة ممكن تسألي في الجروبات اللي في النقطة الأولى.
جهزي الأدوية بتاعتك
إنتي أكتر حد عارف تفاصيل الحالة الصحية لكل واحد في أسرتك، وعارفة كمان إيه اللي ممكن يتعرضوا ليه. بالتالي، علشان تسهّلي على نفسك وتخففي التوتر والمصيف يكمل في اتجاه إيجابي، لازم تجهزي مجموعة أدوية زي المسكنات الخفيفة حسب كل سن، وخافض للحرارة، موسع للشعب الهوائية، مطهر جروح، وبلاستر.
دلوقتي تقدري تقولي إنك شبه عندك استعداد للرحلة وفاضل بس جزئية الأكل اللي هتحتاجي تاخديه في المصيف، فتعالي أقول لك تعملي إيه، وتجهزي إيه معاكي.
شوفي استعدادات المصيف: تجهيز شنطة المصيف لولادك
تجهيزات أكلات المصيف
اشتري حافظة طعام
صدقيني بمجرد ما تتعرفي على الصندوق ده، علاقتك بيه هتتغير. الحلو فيه إنه يقدر يحفظ الطعام مجمد لمدة تصل لـ 8 ساعات وممكن أكتر لو الجو لطيف وطبعًا تكوني شارية معاه الإزازة اللي بيكون فيها سائل بيتجمد في الفريزر وبيتحط مع الحاجات اللي جيباها وبيساعد على إنها تفضل مجمدة أكتر وأكتر، وهتلاقي نفسك على فكرة مش بتستخدميه بس في الرحلة، إنما هو كمان عملي جدًا في أوقات النزول للبحر، هتشيلي فيه كل احتياجاتك بدون أي خوف إنها تبوظ.
أكلات تاخديها معاكي في المصيف
انسي الصلصة وخليكي في السوتيه
إنتي في مصيف، فليكي حق ولو جزئي إنك تترحمي من الوقفة في المطبخ بتسبكي صلصة علشان ناكل حلة طبيخ مع شوية رز، الخضار السوتيه بديل سهل وسريع وصحي ومغذي، يعني مغطي كل احتياجات أسرتك الغذائية.
أكلات تاخديها معاكي في المصيف
اشتري فواكه صلبة
اللي هي مثلًا زي التفاح والكمثرى أو حتى بلح، مش لازم أبدًا موز لأنه بيسود وبيجيب حشرات وبينكد على الواحد، الفواكه اللي زي التفاح مثلا حلاوتها إنها خفيفة وعمرها طويل مش ممكن تتعجن وسط حاجاتك إلا لو إنتي شرياه مستوي أوي، فبالتالي هتخسريه.
المشاوي
المشاوي هي الصديق الصدوق للمصيف، تقدري تاخديها على كذا شكل، وتعمليها أصلًا بكذا طريقة، ويا تاخديها مستوية ومجمدة وده بيكون سهل مع اللحوم الحمراء، أو تاخديها متبلة ومجمدة وده أفضل مع الفراخ.
أكلات تاخديها معاكي في المصيف
استخدمي الأجبان
الأجبان خيار غذائي كويس على فكرة، وبيشبع ده غير إنه طبعًا أسرع من السرعة نفسها. علشان كده بنصحك تجيبي أجبال زي رومي وشيدر وفلمنك، علشان تسهل عليكي حتى بند الفطار قبل النزول.
لا مانع من المقلي
صحيح المقليات مش أفضل خيار صحي على مستوى التغذية، بس فعليًا مين فينا مش بيحب الفراخ البانيه، أو البوفتيك، أو حتى الكبدة البانيه، ده غير وإنتي على البحر بتيجي حالة جوع مرعبة مش بيقفلها غير البانيه جمبها الكاتشب اللذيذ، دي قاعدة إتفق عليها الكوكب، فمرة أو إتنين أو يمكن تلاتة مش هتضر أوي يعني.
أكلات تاخديها معاكي في المصيف
ما تنسيش الخضار الني
زي مثلًا خيار، فلفل ألوان، جزر وليمون، الحاجات دي مهمة جدًا حتى لو إنتي ما لكيش مزاج تعملي طبق سلطة، الخضروات دي لما تتقطع صوابع جنب الأكل بتكون لذيذة وسهلة الأكل.
أكلات تاخديها معاكي في المصيف
وآخر حاجة واللي محدش هيقولها لك واللي هتكون صدمة إنك نسيتيها، هي مسحوق غسيل الهدوم، إنتي لو عرفتي تهربي من الطبخ بشكل جزئي، مش هتقدري تهربي من الغسيل، فلازم ما تنسيش بند المسحوق، ورغم كل شيء أتمنى إنك تنبسطي في المصيف.
التعليق باستخدام حساب فيس بوك