أكلات رأس السنة: 5 أطباق عالمية للاحتفال برأس السنة

خلاص قربت سنة 2020 تنتهي بحلوها ومرها، سنة ما كانتش سهلة على العالم كله، وكلنا بتملى قلوبنا أمنيات حلوة للسنة الجديدة، زي إنها تكون أفضل حالا، وتجيب معاها أيام حلوة وخير للكل.

دايمًا الاحتفال بالمناسبات السعيدة بيكون له طقوس في كل مكان في العالم، واحتفالات رأس السنة أحلى ما فيها إن العالم بكل فئاته بيحتفل في وقت واحد، في مصر احتفالاتنا دايمًا عائلية، لمة جميلة جوه بيوت دافية متزينة ومنوره وسفرة عشاء ولا أروع، في إيه أحلى من كده؟

وعشان إحنا دايما بنحب نشارك كل المناسبات السعيدة معاكي ويكون لينا دايما بصمة، جبنالك مجموعة وصفات مناسبة لسفرة رأس السنة، وكمان بسيطة وسهلة جدًا في تحضيرها ومش هتحتاج لمجهود كبير، لكن شكلها على سفرتك هيكون مبهر لضيوفك، ده غير طعمها اللي هيحسسهم إنك قضيتي ساعات طويلة تجهزي فيها.

كل سنة وانتي طيبة وحواليكي اللي بتحبيهم متجمعين ومبسوطين.

 

أكلات رأس السنة 2021 – أطباق عالمية

1. فطيرة المأكولات البحرية
2. جراتان البطاطس
3. سلطة الجرجير مع البنجر والبرتقال وجبنة الماعز
4. السالمون المشوي مع الحمضيات
5. صدور الديك الرومي بصوص الجريفي السريع

 

فطيرة المأكولات البحرية

المقادير

• 1 كيلو من المأكولات البحرية المشكلة (فيليه السمك- جمبري-كاليماري-بلح البحر)
• 1/2 كوب بصل مفروم ناعم
• 1/4 كوب كرفس مفروم ناعم
• 1/4 كوب جزر مفروم ناعم
• 1 ورقة لورا
• 3 فصوص توم مفرومين
• 2 معلقة كبيرة زبدة
• 2 معلقة كبيرة دقيق
• 1/2 كوب كريمة
• 1 كوب مرقة خضار أو سمك
• عجينة باف باستري جاهزة
• 1 بيضة لدهن الوجه
• 1/4 كوب شبت مفروم

 

طريقة فطيرة المأكولات البحرية:

• في حلة على النار ضيفي كمية من الزبدة والزيت النباتي، شوحي البحريات حسب ترتيب التسوية بس لحد مايتغير لونها وتبليها بالملح والفلفل وشيليها على جنب.
• في نفس الحلة، ضيفي باقي الخضروات والتوم المفروم وشوحيهم وضيفي لهم الملح والفلفل وورق اللورا.
• ضيفي الدقيق وشوحيه مع الخضراوات لحد ماتظهر ريحته، ضيفي المرقة والكريمة وقلبي كل المكونات وسيبي الصوص على نار متوسطة مع التقليب لحد ما يتقل القوام ويبقى مناسب.
• رجعي البحريات للحلة واطفي النار وضيفي الشبت المفروم وظبطي الملح والفلفل.
• في قالب قابل لدخول الفرن، ادهني الحواف بقليل من الماء، وصبي مزيج البحريات وغطيه بالبف باستري وثبتيها كويس على أطراف القالب.
• ادهني الوجه بالبيض ودخليها الفرن على حرارة 200 لحد ماتنفخ العجينة وتتحمر.

 

 

جراتان البطاطس

المقادير

• 1 كيلو من البطاطس مقشرة ومقطعة شرايح رفيعة
• 5 فصوص توم مفرومين
• 2 و 1/2 كوب كريمة طهي
• 1 معلقة كبيرة زعتر طازه مفروم ناعم
• 1 معلقة كبيرة روزماري طازه مفروم ناعم
• 1/2 معلقة صغيرة جوزة الطيب
• زبدة وزيت زيتون
• ملح وفلفل أبيض
• 2 كوب أجبان مشكلة مبشورة

طريقة عمل جراتان البطاطس

• حضري طاجن أو صينية للفرن وادهنيها بالزبدة بسخاء، وسخني الفرن على 180 درجة مئوية.
• في بولة اخلطي الكريمة مع الجبنة والملح والفلفل والأعشاب والتوم المفروم.
• رصي شرايح البطاطس في صينية الفرن بطريقة منمقة، وصبي مزيج الكريمة فوقها، ودخليها الفرن لحد ماتستوي البطاطس ويحمر الوجه.

 

 

سلطة الجرجير مع البنجر والبرتقال وجبنة الماعز

السلطات من الأصناف اللي دايما ننسى نفكر فيها أوقات العزومات، والسلطة دي غير إنها لذيذة هي مناسبة جدا لفصل الشتاء، وبتجمع بين الفواكه والخضروات وشكلها وألوانها هيدي سفرة رأس السنة بهجة ويفتح النفس.

المقادير

• بنجر مسلوق ومقطع مكعبات
• شرايح فيليه البرتقال
• بصل أحمر مقطع شرايح
• أوراق الجرجير
• أوراق النعناع الأخضر
• جبنة ماعز أو فيتا
• فزدق للتزيين

للدريسينج

• 1/4 كوب عصير برتقال
• 1/4 كوب عصير ليمون
• 1/2 كوب زيت زيتون
• 2 معلقة صغيرة مستردة
• ملح وفلفل
• 1 فص توم مهروس
• 1 معلقة صغيرة عسل

الطريقة

• اخلطي كل المكونات مع بعض في الخلاط، في برطمان زجاجي ورجيه كويس.
• رصي مكونات السلطة في طبق وصبي الدريسينج وقت التقديم.

 

 

السالمون المشوي مع الحمضيات

المقادير

• جنب سالمون كامل
• شرايح برتقال وليمون
• 1/4 كوب عصير برتقال
• 1/4 كوب عصير ليمون
• 1/2 كوب زبدة سايحة
• ملح وفلفل
• 1 معلقة كبيرة توم مفروم
• 2 معلقة صغيرة عسل أبيض
• شبت مفروم للتقديم

الطريقة

• في بولة اخلطي كل المكونات مع بعض ماعدا شرايح الليمون والبرتقال.
• في صينية للفرن بطنيها بورق الزبدة وحطي جنب السالمون وصبي فوقه التتبيلة ورصي حواليه وفوقه شرايح الليمون والبرتقال
• دخلي السالمون الفرن على حرارة 200 لحد مايستوي، وزينيه بالشبت المفروم والمزيد من شرايح الليمون والبرتقال

 

 

صدور الديك الرومي بصوص الجريفي السريع

المقادير

• 1 كيلو صدور الديك الرومي مخلية ومقطعة شرايح

لتتبيل الصدور:

• 1 معلقة صغيرة بابريكا
• ملح وفلفل
• 1 معلقة كبيرة بودرة توم
• 1 معلقة كبيرة بودرة بصل
• 1/4 كوب عصير ليمون

لعمل الصوص:

• 1/4 كوب بصل مفروم ناعم
• 2 معالق كبيرة زبدة
• زيت زيتون
• 2 معلقة كبيرة دقيق
• 1 معلقة كبيرة صويا صوص غامق
• 1 كوب مرقة خضار أو دجاج
• 1 كوب كريمة
• 1 معلقة كبيرة بشر ليمون
• 1/4 كوب بقدونس مفروم

الطريقة

• تبلي صدور الديك الرومي بمكونات التتبيلة لمدة لا تقل عن ساعة.
• في طاسة على النار شوحي صدور الرومي في زيت الزيتون لحد ماتاخد لون ذهبي، ارفيعها من الطاسة.
• ضيفي الزبدة ومعلقة من زيت الزيتون وشوحي البصل المفروم لحد مايصفر، بعدها ضيفي الدقيق وشوحيه كويس لحد ما تظهر ريحته.
• ضيفي المرقة للدقيق بالتدريج وقلبي كويس، وسيبي المزيج لحد مايتقل القوام.
• ضيفي الصويا صوص والكريمة وتبلي بالملح والفلفل ورجعي شرايح الرومي تكمل سواها في الصوص.
• رشي البقدونس وبشر الليمون واطفي النار وقدمي الطبق.

 

وصحتين وألف هنا على قلبك.

وتقدري تشوفي هنا وصفات أكتر للشيف أسماء درويش

 

 

هل عندك تعليق على المقال ده؟ شاركينا هنا

Leave a Comment Cancel Reply

Δ

التعليق باستخدام حساب فيس بوك