محتويات المقال
“الرجيم ده للناس اللي معاها فلوس بس” الكلمة دي قالتهالي صديقة لما عرفت إني بعمل رجيم واتحدتني وقالت إن أكلات الرجيم عادة بتكون غالية جدا ومكوناتها سعرها ضخم للدرجة اللي تخلي أي حد نفسه يخس يخاف إنه يخوض التجربة لو ظروفه المادية مش مسعداه، بداية من ثمن الكشف والمتابعة عند دكتور الرجيم، وانتهاء بأسعار المكونات المذكورة في ورقة الرجيم.
لذلك قررت أكتب المقال ده، عن أكلات بتساعد جدا في فقدان الوزن، صحيح أنا مش خبيرة، لكن أنا مجربة ونجحت في الفترة اللي فاتت أفقد 4 كيلو من وزني مع الوجبات اللي هاتكلم عنها دلوقتي مع الالتزام التام بطريقة التسوية المذكورة ولسة مكملة في رحلة فقدان الوزن الزايد.
الأكلات الجاية مش بس رائعة لأنها رخيصة لكن كمان لأنها بتسد النفس وبتساعد على تقليل حالة النهم الشديدة جدا اللي بتخلينا على طول جعانين وعاوزين ناكل، لأنها مكونة بشكل أساسي من البروتين والخضروات والفاكهة.
شوفان مع اللبن خالي الدسم
ده بالنسبة ليا أعظم فطار لإنسانة مستعجلة، محتاجة تنزل بسرعة، كل اللي هانحتاجه لبن خالي الدسم وشوفان، الشوفان من الحبوب الكاملة، بيساعد بشكل كبير على الشبع لفترة طويلة وكمان اللبن لأنه بروتين بيساعد على فرملة الشهية، غير الفوايد العظيمة وكمية الكالسيوم المعتبرة في الفطار ده.
مكونات الوجبة دي لما نشتريها لأول مرة ممكن تكون غالية نسبيًا، علبة اللبن خالي الدسم نوع كويس تمنها 16 جنيه وعلبة الشوفان نوع كويس ب16 برضو، يعني إجمالي 32 جنيه، لكن لما نعرف إنها تكفي خمس أيام على الأقل لو أخدنا كل يوم في الفطار فنجان لبن مع فنجان شوفان، هاتكتشفي إن تكلفة اليوم الواحد أقل من 6 جنيه ونص.
طبق السلطة
طبق السلطة من المكونات الأساسية في أي رجيم في الدنيا، وبعتبره المنقذ، في حالة الجوع الشديد بين معاد الوجبات، وبدل اللخبطة، طبق سلطة معتبر مش بس هايكمل كل وجبات الرجيم لكن كمان هو في حد ذاته بقدر اعتبره سناك صحي ومحترم، تجربتي علمتني إن المكونات المغسولة للسلطة في التلاجة هي المنقذ الحقيقي لأي حد نفسه يعمل رجيم حقيقي.
المكونات الأساسية للسلطة مش غالية لو حسبناها بذكاء لأن المكونات مش بتكفي يوم او اتنين، زيارة واحدة للخضري معطريقة حفظ ذكية للسلطة بتخليها تعيش معايا أسبوع كامل، يعني 7 أيام بالتمام والكمال، لما بزور الخضري بشتري كابوتش وخيار وجزر وطماطم ناشفة وفلفل بأنواعه وألوان، أحمر وأصفر وأخضر وحامي، و ممكن كرنب أحمر، الكلام ده كله بيكلفني 30 جنيه لو اتقسمت 7 أيام على فطار وغداء وعشاء يعني بنتكلم في تكلفة أقل من 2 جنيه للوجبة الواحدة.
سلطة وبيض مسلوق
الوجبة دي أساسية لو قررتي تخسري وزنك، لأنها مشبعة جدا وكمان البروتين في البيض بيساهم بنسبة كبيرة في تقليل الشهية غير فايدته للجسم، بيضتين مسلوقين مع ملح وفلفل إسود، مع طبق سلطة محترم بالمكونات المناسبة ليكي، سواء سلطة بلدي، أو أي نوع سلطة تاني تحبيه، ليكي أي كمية ليمون أو خل أو دريسينج تحبية المهم يكون من غير زيوت أو دسم، الطبق ده بيكمل مع شريحة جبنة بيضا ملح ودسم خفيف وبيكون مثالي لفطار يوم الأجازة.
سعر الأكلة دي مايعديش 5 جنيه بيضتين ب3 جنيه ومكونات سلطة لو قسمنا تمنها على عدد الأيام اللي هاتكفينا فيها هايكون تمن المرة الواحدة مش أكتر من 2 جنيه.
الشكشوكة
طبق الشكشوكة من الأكلات المنسية في الرجيم رغم إنه مكوناته غنية جدًا وممكن يتعمل بكفاءة عالية بدون دهون لو استخدمنا طاسة تيفال، تخيلي معايا طبق عامر بالألوان، فلفل أخضر وأحمر وأصفر وبصل وطماطم مع بيضتين كل ده مع بعض متشوح بدون نقطة زيت وجمبه قطع خيار وجزر وكابوتش بأي كمية إحنا عاوزينها، فطار عبقري بروض مناسب ليوم نكون مش مستعجلين على النزول.
سعر الأكلة دي مش هايكمل 5 جنيه لأنها في مكوناتها شبه الأكلة الللي فاتت بالظبط.
فول
الفول هو المكون العبقري لأي حد بيشوف نفسه بيجوع جد ومش هايقدر على الرجيم ، ومتخيل إن الرجيم قلة أكل، أحب أقولك لأ طبعا، الرجيم اللي بجد يعني تاكلي لحد لما تقولي خلاص مش قادرة، أنا شبعت فعلا، ومن الأكلات اللي تقدري تاكليها بأي كمية مع غياب تام للشعور بالذنب، هو الفول، لكن بنتكلم هنا عن فول بالمعلقة مش بالعيش.
الفول مع ليمون وكمون وملح وشطة متقطع عليه قطع طماطم وبصل وفلفل حامي أو أخضر عادي، بدون أي زيوت أو دهون، هايخليكي تحسي بشبع عبقري ومش محتاجة أتكلم عن الفول قد إيه رخيص فعلا ومش مكلف يعني فطار معتبر فعلا مش هايتراوح بين 5 لـ 10 جنيه حسب المنطقة اللي عايشة فيها شامل مكوناته كاملة من فول وخضروات.
سلطة التونة
باعتبارها المنقذة الحقيقية في لحظات الجوع، التونة حقيقي صديقة الرجيم وفقدان الوزن، بديل رائع للحمة والفراخ، بنتكلم عن أوميجا ثري وكل فوايد السمك المعروفة في علبة بيتراوح سعرها من 15 ل20 يعني طبق سلطة محترم مع تونة بنتكلم في غدوة بـ 25 جنيه، طبعا من غير أي عيش أو نشويات.
صينية الخضار في الفرن
الخضار عموما من المكونات المنسبة في الرجيم رغم جماله وفايدته، الخضار مش هو الشيء المسلوق اللي بيثير غثيان ناس كتير، الخضار ممكن جدا يكون صينية خضار محترمة بالصلصة، فيها كل المكونات اللي تحبيها منفردة زي كوسة بالصلصة، أو بامية بالصلصة أو أي حاجة تحبيها بالصلصة، أو مجتمعة زي صينية التورلي العظيمة في الفرن، غير الريحة اللي هاتاخد عقلك بجد، لكن الأكيد إنك هاتقدري تاكلي أي كمية إنتي عاوزاها من الأكلة دي لأن سعراتها تكاد تكون معدومة.
اقرأي أيضا: أكلات هاتخلي أكلك أحلى وأخف بزيت عافية
صدور الفراخ مع الرز على البخار
صدور البانية هي المنقذ الحقيقي لأي حد عاوز يعمل رجيم، لأنها لذيذة ووصفاتها كتير جدا، والتتبيلات المتاحة ليها رائعة، غير إنها كمان سعرها معقول، والدسم فيها منخفض جد عن أي جزء تاني من أجزاء الفرخة.
المميز في الصدور كمان إنها بدون عضم تماما، لحم أبيض صافي مشبع غني بالبروتين الحقيقي هايشبعك ويغذيكي مع طبق سلطة جميل هايكون منقذ ليكي في أوقات كتير جدا تكوني محتاجة فيها غدا جميل بسعرات قليلة.
مش هاتكلم عن التتبيلات المتاحة لأنها بلا حصر، لكن هاتكلم عن طريقة التسوية اللي ماينفعش يكون فيها أي شكل من أشكال الدسم ولا حتى نمسح الطاسة بزيت، لو فعلا حابين نفقد جزء محترم من إجمالي الدهون في جسمنا، نفس الشيء مع الرز، تسويته تكون على البخار وكميته ماتزيدش عن مقدار كوباية صغيرة، عشان نوصل للأفضل نتيجة ممكنة في فقدان الوزن.
سعر كيلو البانية بيتراوح من 50 لـ 60 جنيه حسب المنطقة في الوجبة الواحدة مش هاتحتاج أكتر من شريحتين لتلاتة يعني بنتكلم في ربع كيلو أو اكتر شوية في المرة الواحد يعني ما قيمته من 15 لـ 20 جنيه فراخ صافية مع طبق السلطة المحترمة.
اقرأي أيضا: تجربتي مع أكلات الرجيم: أهم منتجات اشتريتها وأنا بعمل دايت
مكرونة باللحمة المفرومة دايت
الزهق سمة أساسية عند أي حد بيعمل رجيم، عشان كده المكرونة باللحمة المفرومة هي المنقذ اللي بجد، لما الدنيا تضيق والإحساس بالزهق يكون قاتل يبقى هو ده وقت المكرونة باللحمة المفرومة، اللحمة المفرومة من لحم أحمر تماما بدون دهون مع مكرونة مسلوقة وصوص بدون دهون مع أي توابل تحبيها، كمية اللحمة في الوجبة الواحد بتكون ربع كيلو تقريبا وده هايديكي كمية كبيرة جدا وطبق غني فعلا، كيلو اللحمة المفرومة بـ 120 تقريبا يزيد أو يقل حسب المنطقة يعني الربع بـ 30 جنيه وفي بعض الناس اللي مش بيحبو اللحمة بكمية ضخمة في الصوص ممكن يكفيهم الربع على مرتين يعني بنتكلم عن 20 جنيه تقريبا تكلفة المكرونة واللحمة في الطبق الواحد.
سمك مشوي
من بين الوجبات المنقذة للناس للناس الزهقانة وكمان المغذية جدا، والموفرة في الوقت، تليفون صغير لأقرب بياع سمك، هايجهزلك أجمل سمك بلطي مشوي مسقي بالصوص الجميل، كلي منه أي كمية تحبيها، الكيلو الواحد حسب حجم السمكة ممكن يتراو من سمكتين كبار، لأربعة صغننين، انتي وذوقك بس في النهاية هاتاكلي لما تشبعي ومش هاتدفعي أكتر من 30 جنيه.
التعليق باستخدام حساب فيس بوك