محتويات المقال
ما افتكرش فيه حد هيختلف معايا إن رتم حياتنا بقى فعلًا سريع قوي. طول النهار، بنلف حوالين نفسنا سواءً كنتي بتشتغلي أو قاعدة في البيت. الأمهات دايمًا مشغولين وعندهم مهام كتير قوي ما بتخلصش. عشان كده، ساعات كتير تحضير الأكل كل يوم ووقفة المطبخ بتبقى حِمل تقيل علينا، ومهمة محتاجين نقوم بيها بسرعة وبسهولة، عشان نقدر نتفرغ لباقي المهام اليومية خصوصًا مع دخول الأولاد المدارس ومهام متابعتهم ومذاكرتهم. زي مثلا أكلات سريعة بالميكرويف تنجز في الوقت، عشان كده، لازم نلجأ لوسائل المساعدة في المطبخ اللي بها نسهل على نفسنا مهمة تحضير الوجبات كل يوم، والميكروويف واحد من الوسائل دي طبعًا.
الميكروويف له استخدامات كتير جدًا مش بس تسخين الأكل، أو فك الخضروات واللحوم المجمدة. لكن كمان تقدري تطبخي فيه أكلات بسيطة بمنتهى السهولة والسرعة. ودي مجموعة نصايح مهمة جدًا هتحتاجي تاخدي بالك منها وانتي بتستخدمي الميكروويف في الطبخ:
هنا ممكن تشوفي 5 أكلات بالبطاطس .. لذيذة وسهلة وسريعة
نصائح للطبخ بـ الميكروويف
- اتأكدي كويس إن المج أو البولة أو أي طبق هتستخدميه يكون قابل لدخول الميكروييف.
- لو بتعملي ماج كيك أو أي وصفة في بولة، خلي دايمًا تحتها طبق عشان لو حصل والمكونات خرجت منها أثناء التسوية، يكون الطبق ده بمثابة حماية.
- استخدمي دايمًا ماج أو بولة عميقة ولها ارتفاع أعلى من المكونات، خصوصًا لو هتعملي كيك عشان تعملي حساب ارتفاع المكونات جواها أثناء التسوية.
- احذري من كل ما هو معدن جوه الميكروويف سواءً كانت معالق أو أطباق أو ورق الفويل. اوعي تستخدميه أبدًا للتغطية لإن ممكن لا قدر الله يحصل شرارة جوه الميكروويف، وده هيعرّضك للخطر.
- خليكي حريصة جدًا وانتي بتطلعي الأكل من الميكروويف واستخدمي مساكات أو فوط سميكة.
- لو حبيتي تغطي الطبق، استخدمي الأغطية المخصصة للميكروويف أو استخدمي البلاستيك راب.
- الطبخ في الميكروويف ما بياخدش دقايق. لكن لازم تكوني دايمًا موجودة جنبه، وتراقبيه. وأغلب الوصفات بتحتاج للتقليب كل شوية، فما ينفعش تسيبيه وتمشي.
- توقيت الطهي بيعتمد على طاقة الميكروويف، وممكن التوقيت يختلف من نوع ميكروويف للتاني. عشان كده، دايمًا اعتمدي على ملاحظتك وانتي واقفة جنبه أثناء الطبخ. وخلى التوقيت المكتوب في الوصفة مجرد توقيت استرشادي ليكي.
عشان كده النهاردة هنقولك إزاي تقدري تطبخي 5 أكلات سهلة وسريعة جدا في الميكروويف، احفظيهم عندك للأيام الصعبة المشغولة اللي مفيش فيها وقت للوقفة قدام البوتجاز.
الماك آند شيز في الميكروييف
الماك آند شيز في الميكروييف
المقادير
- 1/2 كوب مكرونة
- 1/2 كوب ماء
- 3 معالق كبيرة لبن كوب لبن
- 1/4 كوب جبنة شيدر
- ملح وفلفل
- 1/4 معلقة بودرة توم
الطريقة
- في بولة أو ماج عميق ومناسب الحجم وقابل لدخول الميكروويف، ضيفي المكرونة مع المياه والملح.
- حطي البولة في الميكروويف لمدة 2-3 دقايق وقلبي بعد كل دقيقة.
- ضيفي باقي المكونات في البولة ورجعيها الميكرويف تاني لمدة 30 ثانية.
- زيينيها بالبقدونس المفروم وقدميها.
براونيز الشوكولاتة في الميكروييف
feelgoodfoodie
المقادير
- 3 معالق كبيرة دقيق
- 3 معالق كبيرة سكر
- 3 معالق كبيرة زيت نباتي
- 3 معالق كبيرة كاكاو
- 3 معالق كبيرة مياه
- 1/2 معلقة صغيرة فانيليا
- رشة ملح
- حبوب الشكولاتة أو قطع الشوكولاتة
الطريقة
- في ماج يصلح لدخول الميكرويف، اخلطي كل المكونات مع بعض وسيبي مكان في الماج لارتفاع الكيك
- دخلي الماج الميكرويف لمدة دقيقة وراقبيه كويس لحد ما يرتفع.
- سيبيها تبرد قبل ما تقدميها لمدة 5 دقايق وقدمي معاها الأيس كريم أو صوص الشوكولاتة.
البطاطس المهروسة الكريمية في الميكرويف
البطاطس المهروسة الكريمية – أكلات سريعة في الميكرويف
المقادير
- 1/2 كيلو بطاطس مقشرة ومقطعة مكعبات متوسطة الحجم
- 1/2 كوباية لبن
- 2 معلقة كبيرة زبدة
- ملح وفلفل
- 1/2 معلقة بودرة التوم
- جوزة الطيب
الطريقة
- في بولة زجاجية قابلة لدخول الميكرويف، حطي مكعبات البطاطس وغطيها بالبلاستيك الشفاف، وبالسكينة اعملي خرم بسيط في البلاستيك عشان تساعدي على خروج البخار.
- دخلي البطاطس الميكرويف لمدة 5-10 دقايق وتابعيها طول المدة لحد ما تتأكدي إنها استوت تمامًا.
- خرجي البولة من الميكرويف بحرص، باستخدام فوطة أو مساكات وابدأي اهرسي البطاطس.
- في بولة تانية، اخلطي اللبن والزبدة والتوابل، ودخليها الميكرويف دقيقة أو لحد ما يكون المزيج دافي.
- صبي المزيج على البطاطس واخلطيهم كويس وقدميها كطبق جانبي سريع جدًا يتحضر في 15-20 دقيقة.
السمك الفيليه بالليمون والأعشاب في الميكرويف
أكلات سريعة بالميكرويف – السمك الفيليه بالليمون
المقادير
- شريحة من السمك الفيلية وزن 200 جم
- عصير ليمون
- زعتر أو ريحان طازة
- 1 فص توم مفروم
- كوسة مقطعة شرايح وفاصوليا خضرا أو أي خضراوات تفضليها
- زبدة
- زيت زيتون
- ملح وفلفل
الطريقة
- اخلطي زيت الزيتون مع الملح والفلفل والتوم وعصير الليمون والأعشاب في بولة.
- في طبق قابل لدخول الميكرويف، رصي شرايح الخضار وتكون رفيعة قدر الإمكان، وفوقيها شريحة السمك وصبي فوقيهم التتبيلة اللي عملتيها، غطيهم ودخليهم الميكرويف لمدة دقيقتين.
- بعد الدقيقتين، اقلبي السمك على الجانب التاني، وغطيه ودخليه الميكرويف تاني لمدة 2-3 دقايق لحد ما يستوي تمامًا.
- وهو سخن، ضيفي عليه مكعب من الزبدة ورشة بقدونس مفروم أو أوراق كرفس وقدميه.
البيض بالخضراوات في الميكروييف
أكلات سريعة بالميكرويف – البيض بالخضراوات
- 2 بيضة
- مكعبات صغيرة من الرومي المدخن أو البيف بيكون
- فلفل أخضر مكعبات
- بصل مكعبات صغيرة
- سبانخ بيبي مقطعة مكعبات
- ملح وفلفل
- 2 معلقة صغيرة زيت نباتي أو زبدة
الطريقة
- اخلطي كل المكونات في بولة عميقة مناسبة للميكرويف وقلبيهم مع بعض.
- دخليهم الميكرويف لمدة 2-3 دقايق فقط.
- قدميه مع الساور كريم والبصل الأخضر.
5 طرق عالمية لطهي البيض مع زيت عافية
التعليق باستخدام حساب فيس بوك