5 أكلات شتوية هتساعدك تتدفّي بسرعة

كل فصل من فصول السنة له أكلات كده خاصة به، في الصيف مثلًا بتحلى السلطات الخفيفة والمشويات بأنواعها، أما الشتاء من أحلى أكلاته الشوربات، المشروبات الدافية بأنواعها، الطواجن السخنة اللذيذة، البطاطا، البليلة. أكلات كتير لذيذة ما بناكلهاش غير في الشتاء، لإنها بتدفينا وبتدينا طاقة والحقيقة لو دورنا هنلاقي ان فوائد الأكلات الشتوية كتيرة للجسم وتقوية وزيادة المناعة، شوربة العدس مثلًا مليانة بالخضروات اللي كلها فيتامينات ومعادن، وكمان البقوليات تعتبر من الكاربوهيدرات المعقدة اللي بتحتاج طاقة أعلى من الجسم لهضمها، هنا هنتكلم عن ألذ وأشهر 5 أكلات شتوية سهلة وسريعة ولذيذة موجودة في كل بيت مصري، خصوصاُ اننا خلاص دخلين على  شتاء 2021، حضّري الوصفات البسيطة دي ليكي ولأولادك عشان تدفيكم وتسعدكم واستمتعي بشتاء 2021 لإنه حقيقي جميل.

 

 

أكلات شتوية سهلة وسريعة هتدفيكي بسرعة

1. طريقة عمل البليلة باللبن
2. طريقة عمل صينية القرع العسل بالبشاميل
3. طريقة عمل حمص الشام
4. طريقة عمل أم علي
5. شوربة العدس المصرية

 

 

طريقة عمل البليلة باللبن

مقادير عمل البليلة باللبن

• 3 أكواب قمح مسلوق
• 1 لتر لبن الدسم
• 1/2 كوب سكر للتحلية
• 1 معلقة صغيرة فانيليا
• 1 معلقة كبيرة قشطة
• مكسرات وجوز هند للتقديم

طريقة عمل البليلة باللبن

• في حلة على النار، سخني الحليب والسكر والفانيليا وضيفي معاهم القمح المسلوق.
• لما تغلي البليلة، ضيفي القشطة وقدميها في بولات مع اختيارك المفضل من المكسرات.

 

 

طريقة عمل صينية القرع العسل بالبشاميل

مقادير صينية القرع العسل بالبشاميل

لتحضير طبقة القرع:

• 1 كيلو قرع مقشر ومقطع مكعبات
• 1 كوب سكر أبيض
• 1 عود قرفة خشب
• 1/2 كوب ماء

لتحضير البشاميل

• 3 معالق كبيرة دقيق
• 3 معالق كبيرة زبدة
• 2 معلقة كبيرة قشطة
• 3 أكواب حليب
• 1 معلقة صغيرة فانيليا

طريقة عمل صينية القرع العسل بالبشاميل

• في حلة على النار، ضيفي مكعبات القرع والسكر والماء وعود القرفة وسيبيهم على نار متوسطة لحد ما يدوب السكر وتستوي مكعبات القرع.
• بحرص شديد، صفي القرع من المياه والسوائل الزائدة اللي نزلت منه واحتفظي بها، وفي بايركس أو صينية للفرن مدهونة بالزبدة وزعي القرع المستوي بالتساوي.
• لتحضير البشاميل: في حلة، ذوبي الزبدة وضيفي الدقيق وقلبيه مع الزبدة لحد ما تظهر ريحته، ضيفي اللبن والسوائل اللي نزلت من القرع وقلبي باستمرار بمضرب سلك لحد ما يتجانس القوام للبشاميل بدون أي تكتلات.
• سيبي البشاميل لحد ما يغلي ويتقل قوامه، ضيفي الفانيليا وارفعيه من على النار.
• صبي البشاميل فوق طبقة القرع، ووزعي قطع من القشطة على وش البشاميل ودخليه الفرن لمدة 30-45 دقيقة لحد ما يتحمر الوش.
• قدمية مع اختيارك من الزبيب والمكسرات.

 

 

طريقة عمل حمص الشام

مقادير عمل حمص الشام

• 250 جم حمص (مغسول ومنقوع لمدة من 3 ساعات لليلة كاملة)
• 1 بصلة كبيرة مقطعة أرباع
• 1 كوب عصير طماطم طازة
• 5 فصوص توم سليمة
• 2 معلقة صغيرة حبوب الكمون
• لتر ونص ماء (تقدري تقللي أو تزودي الكمية حسب رغبتك المهم تغمر المياه الحمص أثناء الطهي)

للتقديم:

• ملح
• كمون
• شطة
• عصير ليمون

 

طريقة عمل حمص الشام

• في حلة على النار، ضيفي كل المكونات وارفعيهم على النار.
• لما يغلي المزيج، هدي النار وغطي الحمص وسيبيه على نار هادية لحد ما تستوي حبات الحمص تمامًا.
• لتحضير أكواب الحمص: صبي شوية من حبات الحمص مع المياه وضيفي الملح والكمون وعصير الليمون، والشطة اختيارية.

 

 

شوربة العدس المصرية

مقادير شوربة العدس المصرية

• 1 كوب عدس أصفر مغسول ومتصفي
• 1 جزرة مقطعة مكعبات
• 1 بصلة متوسطة مكعبات
• 1 طماطم مكعبات
• 3 فصوص توم شرايح
• 1 معلقة صغيرة كمون
• 1 معلقة صغيرة كزبرة ناشفة
• 1/2 معلقة صغيرة بابريكا
• ملح وفلفل
• 2 معلقة كبيرة زبدة
• 1 معلقة كبيرة زيت نباتي
• 1-2 لتر مرقة خضار

للتقديم

• خبز شامي محمص
• شطة وعصير ليمون

 

طريقة عمل شوربة العدس المصرية

• في حلة على النار، ضيفي معلقة من الزيت والزبدة، شوحي البصل والجزر والتوم والبهارات لحد ما تطلع ريحتهم.
• ضيفي العدس المتصفي وشوحيه كويس مع باقي الخضراوات وضيفي مكعبات الطماطم.
• ضيفي المرقة بحيث تغطي العدس والخضروات كلها وسيبي المزيج يغلي.
• هدي النار وسيبي الشوربة على نار هادية، لحد ما يستوي العدس والخضروات تمامًا.
• سيبي الشوربة تبرد شوية واخلطيها في الخلاط أو بالمضرب اليدوي لحد ما تنعم تمامًا.
• رجعي الشوربة للنار وعيدي تسخينها، ضيفب لها الملح والفلفل ومكعبين من الزبدة عشان يضيفوا نكهة ولمعة رائعة، واطفي النار.
• قدمي الشوربة مع الخبز المحمص والليمون والشطة.

 

 

طريقة عمل أم علي

 

مقادير أم علي

• 1/4 كيلو عجينة ميل في جاهزة
• 1/2 لتر حليب كامل الدسم
• 1/4 كوب لبن مكثف محلى
• 1/4 كوب سكر
• 1 معلقة صغيرة فانيليا
• 1/4 كوب زبيب
• 1/4 كوب جوز هند
• 2 معلقة كبيرة قشطة للوجه
• مكسرات محمصة للتقديم

 

طريقة عمل أم علي

• في حلة على النار، ضيفي الحليب والسكر والحليب المكثف والفانيليا، وارفعيهم على نار متوسطة لحد ما يقرب الحليب من الغليان.
• في طاجن للفرن، حطي عجينة الميل في ومعاها الزبيب وجوز الهند وصبي فوقيهم الحليب.
• وزعي قطع من القشطة على وش الطاجن ودخليه الفرن على درجة حرارة 180 لمدة 30 دقيقة لحد ما يتحمر وجه الطاجن وياخد لون دهبي.
• قدمي أم علي ساخنة مع المكسرات المحمصة.

هل عندك تعليق على المقال ده؟ شاركينا هنا

Leave a Comment Cancel Reply

التعليق باستخدام حساب فيس بوك