محتويات المقال
يا جماله، بالدقة والشطة والورد الذهبي المقرمش على الوش (اللي هو البصل المحمر، بالاسم اللي بيسموه في المحلات) وشوية حمص حلوين مستويين، وعلى جنب طبق طماطم بالدقة وعيش محمص ومقرمش، أكيد كلكم عرفتوه وبتعشقوه، الكشري يا ناس الكشري!
أكلة مصرية شعبية حرشة ولذيذة، اقتصادية بامتياز، من أشهر أطباق أكل الشارع المصري، من أغنى الأطباق النباتية من ناحية الطعم والقيمة الغذائية، مش عارفة أوصفة بإيه ولا إيه من جماله وحلاوته بس الكشري المصري حقيقي مالهوش مثيل.
اتفقنا أو اختلفنا، كشري البيت له طعم ومذاق مختلف عن الكشري الجاهز اللي بنشتريه من المحلات، أنا شخصيًا رأيي إن الاتنين لهم حلاوتهم ومذاقهم الخاص. والنهارده جيبنا لكم طريقة عمل الكشري المصري البيتي على أصولها بكل تفاصيلها.
مقادير وطريقة عمل البصل المقلي
- زيت نباتي غزير للقلي
- 2 بصلة كبيرة مقطعة جوانح رفيعة جدًا
- دقيق
الطريقة
- عفّري البصل بكمية بسيطة من الدقيق. في مصفاة، حرّكي البصل عشان ينزل الزيادة من الدقيق.
- اقلي البصل في زيت غزير لحد ما لونه يبقى دهبي.
- احتفظي بكمية من زيت القلي لباقي الوصفة.
مقادير وطريقة عمل الكشري
- 1 و1/2 كوب رز مصري مغسول ومنقوع لمدة 30 دقيقة
- 1/2 كوب شعيرية
- 1 كوب عدس بجبة مسلوق نص سلقة
- 2 كوب ماء للتسوية (ممكن الكمية تزيد حسب الحاجة)
- ملح وفلفل أسود
- 1 معلقة صغيرة كمون
- الزيت المستخدم في قلي البصل
- 400 جم مكرونة سباجيتي وعقل صغيرة مسلوقة
- حمص مسلوق
الطريقة
- في حلة على النار، ضيفي زيت تحمير البصل اللي احتفظتي بيه، وضيفي الشعيرية وشوحيها لحد ما تاخد لون ذهبي.
- ضيفي الرز المصري وشوحيه كويس مع الشعيرية وبعدين ضيفي المياه بحيث تغطي الرز وتكون فوقه بمسافة عقلة صباع.
- ضيفي الملح والفلفل وغطي الحلة وخلي النار متوسطة لهادية.
- لما يبدأ الرز يتشرب الماء، ضيفي العدس المسلوق والكمون وقلبيهم مع بعض، وهدي النار تمامًا لحد تمام النضج.
- حضري المكرونة المسلوقة بإنك تشوحيها مع شوية من نفس زيت تحمير البصل والملح والفلفل.
مقادير وطريقة عمل صلصة الكشري
- 1/2 كيلو طماطم طازة معصورة ومتصفية
- 1 معلقة كبيرة صلصة طماطم
- 1 بصلة صغيرة مبشورة
- 5 فصوص توم مفرومين ناعم
- 1/2 معلقة صغيرة كمون
- 1/2 معلقة صغيرة كزبرة ناشفة
- ملح وفلفل
- زيت نباتي
الطريقة
- في حلة على النار، ضيفي الزيت النباتي وشوحي البصل لحد ما يصفر لونه.
- ضيفي التوم المفروم على البصل، وشوّحيه لحد ما تظهر ريحته.
- ضيفي صلصة الطماطم وقلبيها.
- ضيفي الطماطم الطازة والملح والفلفل والكمون والكزبرة (وقليل من المياه لو احتاجتي) وسيبي الصلصة تغلي.
- بعد الغليان، غطي الحلة وسيبي الصلصة تتسبك على نار هادية لحد ما يتقل قوامها.
مقادير وطريقة عمل دقة الخل والتوم
- 5 فصوص توم مفرومين
- 1/4 كوب خل
- 1/2 كوب ماء
- ملح وفلفل
- زيت نباتي
الطريقة
- شوحي التوم في كمية من الزيت النباتي لحد ما يبقى لونه ذهبي.
- ضيفي الخل والماء والملح والفلفل. وسيبي الدقة تغلي لمدة 5 دقايق على نار متوسطة.
- برديها وقدميها جنب الكشري.
مقادير وطريقة الصلصة الحارة (الشطة)
- 1 فص توم مفروم
- 2 معلقة كبيرة شطة بودرة
- زيت نباتي
- 1 كوب ماء
- 2 معلقة كبيرة خل
- ملح
الطريقة
- في معلقتين من الزيت النباتي، شوحي فص التوم لحد ما تظهر ريحته.
- ضيفي الشطة البودرة، وقلبيها كويس في الزيت لمدة دقيقة.
- ضيفي المياه والخل ورشة ملح، وسيبي المزيج على نار هادية لمدة 5 دقايق لحد ما يتكثف قوامه.
- برديها وقدميها جنب الكشري
لتجميع طبق الكشري
- اغرفي الكشري بالترتيب اللي تحبيه. بس جرت العادة إننا نحط الرز والعدس، فوقهم المكرونة، فوقهم الصلصة، وعلى الوش الحمص والبصل المقلي. وقدمي دقة الخل والشطة على جنب واستمتعي.
What’s your Reaction?
التعليق باستخدام حساب فيس بوك