لو فعلًا مطبخك هو مملكتك وانتي إللي بتتحكمي فيها، يبقى أكيد يا ملكة يلزمك شوية مساعدين يساعدوكي ويسهروا على خدمتك، من أهم المساعدين دول الفريزر! الفريزر يا جماعة أهميته لأي أم ولأي ست خصوصًا لو كانت بتشتغل لا تقدر بثمن. لكن للأسف بعضنا ما يعرفش ازاي نقدر نستغله صح، وازاي نخليه يقدم لنا المساعدة المظبوطة إللي فعلًا تنقذنا في الأزمات وتوفر علينا وقت ومجهود كبير.
في المقال ده، هنساعدك تستغلي الفريزر الاستغلال الأمثل وهنقول لك على 10 حاجات ممكن تتشال في الفريزر، كتير ما يعرفوش إنها ممكن تتفرز، وهنعرّفك كمان ازاي تفرزنيها بالشكل المظبوط إللي يحافظ على جودتها وكمان ازاي تفكي تجميدها عشان تكون جاهزة للاستخدام في أفضل حالاتها.
10 أكلات ممكن تفريزها
- المشروم
- الأعشاب الطازة
- المكرونة
- الصلصات
- البيض
- الرز
- الكيك المستوي
- عجينة التارت والكوكيز
- عجينة البيتزا
- الفراخ المطبوخة
المشروم:
أكلات ممكن تفريزها – المصدر: theyummylife
أكيد مفيش أحلى من المشروم الطازة، طعمه وقوامه أفضل كتير من المعلبات، بس مشكلته إن عمره قصير جدًا لو حفظتيه في التلاجة: بالكتير 5 أيام وتبدأ طزاجته تروح ولونه يتغير. أفضل طريقة تحفظي بيها المشروم الطازة لأطول مدة ممكنة هي إنك تفرزيه، كل إللي عليكي إنك تشوحيه في معلقة من الزيت أو الزبدة على نار عالية جدًا عشان ما يفقدش مياته وبعدين تسيبيه يبرد تمامًا وتحفظيه في أكياس محكمة الغلق في الفريزر. هيكون جاهز ومتوفر عندك أي وقت، ومدة حفظه 3 شهور في الفريزر.
الأعشاب الطازة:
أطعمة ممكن تفريزها – المصدر: youtube
بدل ما تدبل وتموت وتسوَد ممكن بحيلة بسيطة تحفظي أي نوع من الأعشاب الطازة، روزماري، زعتر، ريحان، بقدونس، كزبرة، أي حاجة من الأعشاب العطرية الخضراء.
خطوات حفظ الأعشاب الخضراء العطرية في الفريزر:
- كل إللي عليكي إنك تغسليها وتنشفيها كويس جدًا من السوائل.
- تفرميها ناعم بالسكينة أو تضربيها في الكبة ضرب خشن.
- تخلطيها مع أي نوع من الزيت النباتي بحيث يغلفها تمامًا.
- صبي المزيج ده في قوالب التلج، وبكده بقى عندك مكعبات الأعشاب بالزيت، ودي بتكون بمثابة قنبلة من النكهات تضيفيها لأكلاتك، سواء صلصات أو شوربات أو حتى خضار مطبوخ.
تقدري كمان تحفظي الكرفس الفرنسي إللي بتكون نكهته روعة مع الشوربات واليخنات وطبخات كتير قوي، بإنك تغسليه وتجففيه وتقطعي أعواد الكرفس مكعبات وتحفظيها في أكياس أو علب الفريزر محكمة الغلق. مدة حفظه 3 شهور وهيسعفك جدًا في المطبخ.
المكرونة:
أطعمة تتفرز – المصدر: dontwastethecrumbs
لو سلقتي مكرونة وفاض منها كمية كبيرة وعاوزة تخزنيها، ما تقلقيش، الفريزر برضه هو الحل. يمكن مش كتير مننا يعرف إن المكرونة ممكن تتفرز، ومطاعم كتير قوي بتعمل كده، وبتفرز المكرونة المسلوقة بكميات فردية عشان توفر وقت السلق في زحمة الأوردرات. يُفضَّل طبعًا المكرونة ماتكونش مسلوقة سلق كامل لو هتفرزيها يعني تكون (Aldente) عشان لما نفكها من التجميد ونطبخها تاني مع صوص ما تستويش زيادة وتتهري.
ودا يترتب عليه برضه إنك تقدري تخزني صينية مكرونة بالبشاميل أو لازانيا أو نيجريسكو جاهزة تمامًا على التسوية، مع مراعاة إن تكون المكرونة نص سوا.
ملحوظة مهمة جدًا: لازم المكرونة تبرد تمامًا قبل التفريز ويفضل إنك تضيفلها كمية بسيطة من الزيت وتقلبيه معاها لو كانت مجرد مكرونة مسلوقة عشان ما تمسكش في بعض ويبقى فكها سهل.
فك التجميد يفضل يكون في التلاجه، وتقدري كمان تنزليها في ميه مغلية لحد ما تفك معاكي، بشرط تكوني متأكده إنها مستويه نص سوا.
الصلصات والشوربات:
المصدر: ohmyveggies
صوص البشاميل، تسبيكة المحشي أو الخضار المطبوخ، صلصة المكرونة، الشوربات بأنواعها، كل دي حاجات تقدري تحفظيها في الفريزر لمدة 3 شهور بمنتهى البساطة في أكياس أو علب خاصة بالحفظ في الفريزر محكمة الغلق.
أهم حاجة التبريد السريع، يعني لازم تبردي الصلصة أو الشوربة في حمام مايه باردة جدًا أو تلج، ولما تدخل الفريزر تكون بارده تمامًا في حرارة الغرفة.
البيض:
المصدر: youtube
أحيانًا كتير بيكون في وصفات حلويات بتطلب فصل البياض عن الصفار واستعمال الصفار فقط، طب البياض هنعمل في إيه؟؟
الفريزر هو الحل، ممكن جدًا نفرز البيض الني سواء البياض أو الصفار منفصلين أو كاملين، أهم حاجه هي إحكام الغلق ودي قاعدة عامة لسلامة أي حاجة متفرزة. تخيلي إنك تقدري تفرزي البيض الني لمدة سنة كاملة من غير ما يحصله أي حاجة!!!
الرز:
المصدر: simplyrecipes
يمكن يكون من أكتر الحاجات إلي بتترمي في البيوت المصرية، وخصوصًا في العزومات دايمًا بيكون في بواقي من الرز بأنواعه وأشكاله.
برضه الفريزر هيحل المشكله دي، أهم حاجه إنك تبردي الرز تمامًا وتقدري توزعيه لكميات حسب الوجبه وحسب إستهلاكك.
أما بالنسبة لفك التجميد، أفضل طريقة إنه يفك في التلاجه، أو الميكروويف، وبعد كده عيدي تسخينه على البوتجاز مع إضافه شويه من الميه لو حسيتي إنه ناشف ومحتاج رطوبة.
هنا هتلاقي أفكار لإستغلال بواقي الطعام بدون هدر
الكيك المستوي:
المصدر: bhg
كل أنواع الكيك ممكن تتفرز، سواء كيك كثيف معمول بالزبدة، أو كيك اسفنجي، أو كاب كيك المهم يكون كيك سادة من غير أي فروستينج أو أي حشوات.
لفي الكيك كويس جدًا في البلاستيك الشفاف ( cling film) وتقدري كمان تقسمي الكيك لقطع فردية وتشيلي كل قطعة ملفوفه كويس لوحدها، ووقت الحاجه تفكيها. ولو بتحبي تحضري تورته عيد ميلاد ولادك بنفسك تفريز الكيك هيسعفك ويساعدك على عمل تحضيرات مسبقة وهيسهل معاكي عمليه تزيين الكيك.
لو بتحبي تخبزي الكيك هتعرفي هنا كل حاجة عن أسرار نجاح الكيك زي المحترفين
عجينة التارت والكوكيز
تفريز عجينة الكوكيز
أغلب عجاين الكوكيز والبسكوت وكمان عجينة التارت ممكن تحفظ في الفريزر، ودي بتبقى كنز بيخليكي في أي وقت الولاد نفسهم في حاجة حلوة سخنه وطازة تقدري تخرجي العجينة وتفكيها في المايكروييف وتخبزيلهم أحلى كوكيز أو تجهزي أحلى تارت.
التارت ممكن يتفرز في صورة عجينه نيه، وممكن تخبزيها بدون ما تحشيها وتسيبيها تبرد تمامًا وتغلفيها كويس بالبلاستيك وتفرزيها.
أغلب العجاين مده صلاحيتها في التفريز بتوصل 6 شهور.
-
عجينة البيتزا
المصدر: thursdaynightpizza
ناس كتير بتفتكر إن العجينة إلي فيها خميرة ما ينفعش تتشال في الفريزر، الحقيقة ده اعتقاد خاطيء وممكن جدًا أي بواقي من عجينة البيتا تتشال في الفريزر. أهم حاجه في العملية دي هي فك التجميد، لام يكون في التلاجه لحد مالعجينة تفك تجميدها، وبعدها تخرج من التلاجة عشان توصل لحرارة الغرفة وترجع الحياة للخميرة من تاني وتأدي وظيفتها قبل دخولها الفرن للخبز. تقدري تحتفظي بعجينة البيتزا في الفريزر لمدة 3 شهور بشرط إنك تغلفيها مظبوط.
-
الفراخ المطبوخة
المصدر: eatathomecooks
كتير بيتبقى عندنا فراخ مسلوقة، أو مشوية وبنخاف طعمها يتغير لما بنحفظها في التلاجة، عشان كده أفضل حل هو الفريزر.
غلفي الفراخ كويس وشيليها في الفريزر سواء كاملة بالعضم أو مخلية، وفكيها في التلاجة، وعيدي استخدامها براحتك طعمها هيكون أفضل بكتير من إنك تحفظيها في التلاجة.
هنا بقى هتتعرفي على الأطعمة الممنوع تخزينها في الفريزر خلي بالك
التعليق باستخدام حساب فيس بوك