خلال الـ 3 شهور الأخيرة من الحمل بيزداد حجم الطفل بشكل كبير، وتتطور العينان والرئتان والعظام وأعضاء الجسم المختلفة. في الوقت نفسه، بيستعد جسمك للولادة. علشان كده، مهم جدًا الاهتمام باتباع نظام غذائي صحي بالكامل ومعرفة أكثر أكلات ممنوعة للحامل خلال الثلث الأخير من الحمل للحفاظ على صحتك وصحة الجنين.
هتحتاجي في الثلث الأخير في الحمل (بهدف تلبية احتياجات نمو دماغ الطفل) إنك من الشهر السابع تتغذي على أكل الأطعمة الغنية بأحماض أوميغا 3 الدهنية، زي المكسرات وزيت الزيتون، وأكل اللبن (الزبادي) قليل الدسم وشرب الحليب.
أما فيما يخص السعرات، فإنتي خلال رحلة الحمل كلها بيزيد وزنك ما بين 11.3 و15.8 كيلوجرام، وخلال الثلث الثالث والأخير من الحمل هيزيد وزنك بمعدل أكبر من بداية الحمل. علشان كده، كتير من الأطباء بينصحوا إن زيادة السعرات الحرارية بمعدل من 400 لـ 450 سعر حراري في الثلث الأخير من الحمل.
نيجي عند نقطة نوعية الطعام نفسها، مهم جدًا إنك تحرصي على تناول كوبين إلى 3 أكواب من الفاكهة كل يوم على الأقل، و3 أكواب من الخضروات يوميًا، ومش أقل من 225 غرام من الحبوب الكاملة زي الخبز الأسمر، و185 غرام من البروتين الخالي من الدهون، مع شرب 3 أكواب من الحليب قليل الدسم أو الزبادي. ما تنسيش تاكلي المكسرات والبقوليات والبيض لتنويع مصادر البروتين. ولو كنتي مش بتحبي تشربي الحليب تقدري تعملي سموثي من الفاكهة والحليب.
أكلات ممنوعة للحامل في التلت الأخير من الحمل
- الدهون والمقليات.
- الأكلات المالحة.
- الأكلات الحارة.
- الأكلات المدخنة واللحوم المصنعة.
- اللحوم غير الناضجة.
- الحليب غير المبستر.
- البيض الغير مطبوخ تماما.
- الأسماك التي تحتوي على زئبق.
- الكركديه.
- النعناع أو الحلبة أو القرفة.
- الكافيين.
- الوجبات السريعة.
- الخضار والفاكهة الغير مغسولة.
الشعور بالارتجاع والإمساك وأعراض مزعجة تانية بتزيد في الثلث الأخيرمن الحمل. علشان كده، لازم تجنبي بعض الأكلات اللي بتزود من الأعراض دي، بجانب الأكلات التانية اللي بتضر الجنين أو قد تتسبب في الولادة المبكرة. ودي بعض الأطعمة اللي لازم جدًا الامتناع عن تناولها في آخر ثلاثة شهور من الحمل.
هنا ممكن تشوفي أسباب الولادة المبكرة وأعراضها
الدهون والمقليات
وده علشان ما يحصلش زيادة في وزنك وتتراكم في جسمك الدهون غير المرغوب فيها، ده مجرد أكل عالي السعرات الحرارية وغير صحي بالمرة، وما فيش منها تغذية ليكي ولا لابنك ده غير إنها ممكن تسبب لك شعور بالحرقان وبالحموضة.
الأكلات المالحة
زي المخللات والأسماك المملحة، وده للتقليل من احتباس الماء في جسمك، اللي ممكن تحسي بيه خلال الشهور الأخيرة أكثر من أي فترة تانية في الحمل، وبالتالي تورم رجلك، وممكن جدًا ضغطك يعلى وده ممكن يعرضك لولادة مبكرة. ارتفاع ضغط الدم في الحمل
الأكلات الحارة
بتسبب حرقان المعدة والارتجاع، فحاولي تتجنبيها قدر الإمكان.
الأكلات المدخنة واللحوم المصنعة
لأنها بتحتوي على البكتيريا، اللي ممكن يكون لها أثر مضر جدًا على الجنين.
اللحوم غير الناضجة
ممكن تحتوي على بكتيريا، اللي بدورها ممكن تصيب الأم وجنينها بأمراض مختلفة.
الحليب غير المبستر
رغم فوائد الحليب العظيمة للحامل في الشهور الأخيرة، إلا إنه لازم تختاري الحليب المبستر، لتجنب الإصابة بالبكتيريا الموجودة في الحليب الغير المبستر.
البيض غير المطبوخ تمامًا
البيض النيء من الأكلات الممنوعة للحامل لأن البيض النيىء من الممكن أنه يصابك ببكتيريا السالمونيلا، واللي بتصيب الإنسان بالتسمم الغذائي. البيض النيء موجود ببعض الصوصات زي المايونيز، فتجنبي تناولها هو كمان.
الأسماك التي تحتوي على زئبق
زي التونة والسالمون، والسمك النيء زي بعض أنواع السوشي اللي ممكن يكون محمل بأنواع مختلفة من البكتيريا، اللي بتضر الجنين، فهي أكلات ممنوعة للحامل.
الكركديه
خصوصا لو إنتي طول حملك ضغط دمك مش مستقر لأن ممكن يكون له تأثير سلبي عليكي خلال الولادة.
النعناع أو الحلبة أو القرفة
لأنهم بيسببوا انقباضات في الرحم، ممكن تسبب ولادة المبكرة.
الكافيين
كالشاي والقهوة والكاكاو والنسكافيه والمياه الغازية. أولًا هم هيسببوا لك الأرق ولجنينك الحركة الكثيرة، ولكن يمكنك تناولها بما لا يزيد عن 200 جم من الكافيين في اليوم أو كوب صغير ويكون في فترات النهار.
الوجبات السريعة
تجنبي تمامًا تناول الوجبات السريعة لاحتوائها على كميات كبيرة من الدهون الضارة والنشويات والسعرات الحرارية العالية والملح والبهارات يعني كل الممنوعات، وده لأنها فعلا ممكن تضر بصحتك وصحة جنينك.
الخضار والفاكهة غير المغسولة
احرصي على غسل الخضار والفاكهة كويس جدًا بالماء الدافئ قبل تناولها، لتتخلصي من البكتيريا والطفيليات الضارة، ممكن تنقعي الخضار والفاكهة لمدة ربع ساعة في مياة مع معلقة خل صغيرة علشان تضمني نضافتها.
نصائح لتغذية الحامل في الشهور الأخيرة
مهم إنك تتبعي النصائح اللي جاية دي علشان تحصلي على نظام غذائي مناسب لكي علشان تحافظي على صحتك وصحة جنينك وتتجنبي زيادة الوزن في الشهور الأخيرة:
- تناولي وجبات غنية بالفاكهة والخضار والحبوب الكاملة والألياف ومنتجات الألبان والبروتين قليل الدسم والأسماك.
- احرصي على شرب الماء من لترين ونصف إلى ثلاثة لترات لتجنب الإمساك والجفاف.
- تناولي الأطعمة والمشروبات قليلة السكر والملح والدهون المشبعة البسيطة، زي الخبز الأسمر.
- تناولي الفيتامينات والمكملات الغذائية تحت إشراف الطبيب.
- مارسي تمارين الحوض والأنشطة اليومية، زي تمارين كيجل والمشي.
- احصلي على قسط كافي من النوم والراحة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك