محتويات المقال
أنا منار سعد، من فريق راحة بالي.. وفي سلسلة مقالات “أنا وعالية” هاخدكم للعالم بتاعي أنا وبنتي عالية.
اتعلمت في دبلومة المنتسوري إن مينفعش نجيب لعبة للطفل مهما كان عمره بدون هدف أو مهارة جديدة يتعلمها من اللعبة دي، علشان كده بقضي في محلات الألعاب وقت طويل جدًا، لأني بقرأ كل كلمة على العلبة وبشوف فعلا هل هي مناسبة لعمر وإمكانيات بنتي ولا لا -بصرف النظر عن العمر المكتوب على العلبة- وهل هي مكررة أو شبه لعب موجودة عندها أصلا ولا لا..
ومن الخبرة دي عاوزه أنقل لكم النهاردة ريفيو عن 5 ألعاب مفيدة جبتها من edu fun:
Edu fun شركة عريقة في مصر، من أهم الحاجات اللي بتميزها إنها بتقدم لعب تعليمية وأغلب خاماتها خشب، وبتقدم كمان أدوات مناسبة لمنهج منتسوري وفعلًا كتير من الحضانات المعروفة بتجيب حاجاتها من edu fun
Puzzle:
طبعًا مفيش طفل ما بيحبش البازل، وهي لعبة قديمة جدًا ومفيدة لكل الأعمار، أنا نفسي بتبسط لما بنتي بتطلب مني ألعب معاها بيها ?
جربت وجبت من أماكن تانية ألعاب بازل مصنوعة من الكرتون المقوى وكنت فاكرة إنها هتستحمل، بس للأسف اتقطعت بسرعة جدًا خاصةً إن الأطفال ممكن يجربوا يحطوها في فمهم أو تقع عليها سوائل تبوظها، لحد ما لقيت بازل خشبي من edu fun والحقيقة عجبتني جدًا وعاشت معانا واستحملت حاجات ما تتوصفش بما فيها فترة البوتي تريننج ☹
ألعاب تعليمية – Edufun
ألعاب تعليمية – Edufun
Play and Learn:
واللعبة دي جمعت هدفين في وقت واحد، تعليم الأرقام وتركيب البازل، ومن أجمل الحاجات اللي نفعتي فيها هو حجمها الصغير، ولما بكون رايحة مكان عارفة إن مفيش فيه ترفيه لعالية وممكن تزهق باخد لها معايا اللعبة دي، وممكن أشيلها في شنطتي أو شنطتها، واللعبة على شكل صندوق وده بيخليها تحافظ على القطع مع الضياع، ولو طفلك لسا أصغر من 3 سنين متقوليش مش هجيبها، هاتيها وحطي فيها مثلا أرقام لحد 3 ولما يفهمهم ويخلصهم زودي لحد ما توصلي لـ 10 بالتدريج.
لعبة لتعليم التصنيف:
اللعبة دي مغرية جدًا للأطفال لأن حجمها كبير وملياااانة قطع، فالطفل ما بيكونش مصدق نفسه إنه مسموح له يلعب بالكم ده كله ?، ووزنها تقيل نسبيًا فبيحس كمان إنه قادر يشيل حاجة مهمة زي الكبار.
اللعبة دي بتاخد وقت معقول وتنفع أوي في الظروف الكورونا ووجودنا في البيت، ولو طفلك زهق ومش قادر يكمل القطع كلها ساعديه، ولو أصغر من السن المناسب ممكن تشيلي نص كمية القطع مثلا لحد ما يتعود وبعدين ترجعيهم بالتدريج.
لعبة لتعليم تصنيف الأشكال:
اللعبة دي لازم تكون موجودة عند الأطفال من سن صغير لأنها مفيدة جدًا في تعليمهم الفرق ما بين الدائرة والمثلث والمربع والمستطيل، وممكن تعمليها معاه مرة بالعربي ومرة بالإنجليزي أو باللغة التانية اللي تحبيها، لأن ده هيخليه يكتسب مفردات مهمة من بدري، وبعد ما هيتعلم يحط كل شكله مكانه ممكن يزهق وما يلعبش بيها تاني، ساعتها تقدري تخليه يصنف الألوان، أو تبنوا أشكال جديدة مع بعض، وطبعا خامتها خشب فمفيش خوف على سلامة طفلك من الزوايا بتاعت الأشكال.
ألعاب تعليمية – Edufun
ألعاب تعليمية – Edufun
لعبة دورة حياة الفرخة ?:
ألعاب تعليمية – Edufun
ألعاب تعليمية – Edufun
ودي بالنسبة للطفل معجزة إنه يعرف إن البيضة بتيجي من الفرخة وإن الكتكوت بيجي من البيضة، والجميل إن في أشكال متعددة منها عند edu fun وفي منها فكرته قائمة على الفرق بين الأحجام مثلا، وإنتي تختاري المناسب لطفلك ولإمكانياته.
الحلو كمان إن edu fun بيبيع مستلزمات تانية للأطفال غير الألعاب الصغيرة، فبيبيع مثلا المطابخ الخشبية والكراسي والترابيزات وبعض التجهيزات الأساسية اللي بنحتاجها لأولادنا.
أما بالنسبة للأسعار فهي في أغلب الألعاب معقولة جدًا وفي مستوى ميزانية معظم الأمهات، والشركة بتعمل تخفيضات كتير في أوقات ومختلفة، وكمان تقدري تستخدمي كارد راحة بالي اللي عامل تخفيض 10% طول السنة.
وتقدري تشوفي صفحة edu fun على الفيسبوك من هنا، وموقعهم من هنا
بتمنى يكون الريفيو ده كان مفيد بالنسبة لكم، واستنوني في ريفيوهات تانية هتعجبكم ?.
1 comment
المقال حلو والهدف جميل .. انا جربت لعبة الاشكال الهندسية …. مفيدة جدا فعلا
بس للاسف اخراج المقال سيئ … الصور المحطوطة للعبة الثانية والثالثة غير واضحة بالمرة