أوقات كتير بنكون عايزين الولاد يلعبوا في أوضتهم لوحدهم ويسيبونا نقعد بهدوء وطمأنينة نادرة الحدوث نشرب حاجة بروقان، أو نتفرج على التليفزيون على فيلم أو مسلسل من غير إزعاج و”ماما، ماما، ماما” 60 مرة في الدقيقة. لكن، برضه أوقات بنكون عايزين (وبيكون مهم جدًا) نشارك ولادنا في اللعب، نلعب سوا احنا وهم، وده هيقرّب المسافات كتير وهيعرّفك على صفات كتير يمكن ما كنتيش واخدة بالك منها في ولادك. عشان كده، في المقال ده هاقول لك ألعاب الأسرة في المنزل.
ألعاب الأسرة في المنزل
التليفون المكسور
ألعاب الأسرة في المنزل
كيفية اللعب
هتقعدوا في دايرة، وكل ما يزيد العدد، كل ما بقت أظرف ومضحكة أكتر. هنبدأ من حد منكم وهيهمس في ودن اللي جنبه بكلمة أو عبارة قصيرة، وبعدين المطلوب من الشخص اللي بعده إنه يوصل اللي هو سمعه للي بعده همس برضه في ودنه وهكذا. الظريف في اللعبة إنه عشان مش من حقك تسمعي إلا مرة واحدة، فانتي وحظك في اللي هتسمعيه وهتنقليه وكل ما اتنقلت أكتر، كل ما الكلام ضاع.
طابور الحركة
كيفية اللعب
هتقفوا طابور بحيث ما حدش يشوف اللي وراه. وبالدور من ورا لقدام، حد هيخبط على كتف اللي قدامه ويعمل كذا حركة ورا بعض. المطلوب من اللي قدامه بعد ما شاف الحركات دي، يخبط على كتف اللي قدامه وينقل له الحركات زي ما هي. وزي اللعبة اللي فاتت، معظم الوقت الناس بتنسى حركة أو اتنين في النص وبيكون الموضوع مسلي قوي.
اللعبتين مشتركين في الفايدة وهي تعليم الأطفال إن مش دايمًا اللي بنسمعه أو بنشوفه بيكون صح، وإن كل ما زادت دايرة الكلام عن حاجة، كل ما الحاجة هتفقد معناها وهتتحور.
اعرفي عن إقرار المشاعر وازاي تعمليه مع ولادك هنا
المشاعر Safeelings
ألعاب الأسرة في المنزل
لو أطفالك بيعانوا من عدم القدرة على التعبير عن مشاعرهم، ممكن تكون لعبة المشاعر من Safe Kids هي اللعبة الأفضل اللي تقضوا فيها وقت سوا، وفي نفس الوقت، تساعدهم يعبروا عن مشاعرهم ويعملوا إدارة المشاعر، أو emotional regulation. عشان تعرفي أكتر عن الموضوع ده، ممكن تقري المقال ده.
بالونات
ألعاب الأسرة في المنزل
اللعبة دي بسيطة لكن محتاجة مساحة واسعة نوعًا ما. اللعبة عبارة عن إن كل طفل بيكون مسؤول عن بالونتين وكل كبير عن 3 بالونات والمفروض إنكم تطيروا البالونات في مكانكم من غير ما تقع في الأرض.
أوريجامي
ألعاب الأسرة في المنزل
ألعاب الأوريجامي أو اللعب بالورق وتشكيله لأشكال بتنفع لمراحل عمرية مختلفة كتير. وممكن تختاروا أشكال تنفع تتعمل ببساطة وتخلي الأطفال اللي يعملوها وتتعمل بشكل أعقد وانتي والأب اللي تعملوها.
ألعاب تشتريها
- مونوبولي/بنك الحظ
- السلم والتعبان
- ليدو
- ألعاب الكوتشينة المختلفة
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك