محتويات المقال
كل فترة بتطلع مناهج تربية وتعليم جديدة، ورغم إن منهج المنتسوري موجود في أوروبا وأمريكا من سنين طويلة، إلا إنه في بلادنا العربية يعتبر جديد نسبيًا، وزي عادة أي حاجة جديدة بتطلع موضة، وللأسف في ناس بتستغل الموضة دي سلبًا، فبنلاقي مراكز ومشاهير بيقدموا دبلومة منتسوري ويقولوا عنها إنها معتمدة، والطالب مش بيكون عارف هي معتمدة من مين، وبيكتشف إنه دفع فلوس في شهادة مش هيقدر يشتغل بيها، علشان كده هنقولك على 4 أماكن في مصر بتقدم دبلومة منتسوري معتمدة، وإزاي تعرفي بنفسك إذا الشهادة معتمدة ولا لا:
-
أعرف ازاي إن دبلومة المنتسوري في مصر معتمدة؟
- لازم تكون تابعة لمؤسسة دولية، وتدخلي بنفسك على موقع المؤسسة وتقرأي كل التفاصيل، لحد ما تلاقي إن الجهة اللي بتقدمها هنا في مصر موجود اسمها على الموقع، ولو مالقيتهاش ابعتي اسألي المؤسسة.
- مش أي دبلومة من 3 حروف انجليزي تبقى دولية ومعتمدة.
- في دبلومات معتمدة فعلا لكن مش في كل بلاد العالم، فلو هتشتغلي بيها في مكان معين لازم تعرفي معترف بيها ولا لا.
- الدبلومات المعتمدة بيكون سعرها عالي جدًا، فأي دبلومات تبع مراكز مش جامعات سعرها رخيص نسبيًا، فـ دي دلالة أوليّة على إنها مش معتمدة.
- في أماكن بتدي شهادة حضور معتمدة، ودي بتفرق عن الشهادة اللي بيتيجي بعد امتحان، فلازم تعرفي إن في فرق في الشغل.
- الشهادة المعتمدة بتقدم لك تدريب عملي في أماكن معينة.
- اسألي ناس ثقة عن تجاربهم في دراسة دبلومة المنتسوري، وماتاخديش بكلام أي حد على السوشال ميديا، لإن المجال ده فيه نصب كتير.
- في طلاب بيكونوا درسوا دبلومة معتمدة فعلا، وبياخدوا محتواها ويدرّسوه كويس، لكن ده مش هيديكي اعتماد شهادة، ده هيديكي مادة علمية بس.
- جوجل صديق عزيز، هيفيدك جدًا.
-
4 أماكن في مصر بتقدم دبلومة منتسوري معتمدة
-
The Montessori Institute in Cairo
والمعهد بيقدم أهم دبلومة منتسوري في العالم واللي هي معروفة باسم دبلومة الـ AMI ودي معتمدة في كل دول العالم، بحيث تقدري تشتغلي بيها في أي مكان، وعلشان كده سعرها مرتفع جدًا.
تكلفة دبلومة الـ AMI:
160,000 جنيه مصري أو ما يعادلها بالدولار الامريكي او باليورو (حوالي 10,000 دولار)، تدفع على النحو التالي:
رسوم التقديم: رسوم التقديم غير قابلة للاسترداد 10,000 جنيه مصري (حوالي 625 دولار)
رسوم الفصل الدراسي الأول: 71,000 جنيه مصري (حوالي 4,440 دولار)
رسوم الفصل الدراسي الثاني: 71,000 جنيه مصري (حوالي 4,440 دولار)
رسوم الامتحانات: 8,000 جنيه مصري (حوالي 495 دولار)
الموقع الرسمي: https://ar.montessori-cairo.com/
صفحتهم على الفيسبوك: https://www.facebook.com/montessoricairoTMIC
-
The International Montessori Foundation (IMF)
وبيقدم دبلومة بريطانية معتمدة من الـ Maria Montessori Institute (MMI)
ومدة الدراسة بتكون حوالي 9 شهور، وشهادتهم معتمدة في بلاد كتير، ورسوم الدبلومة تعتبر مرتفعة بسبب قيمة الشهادة اللي بتقدمها، لكنها أقل من رسوم الـ AMI
ودي صفحتهم على الفيسبوك: https://www.facebook.com/IMF.Egypt
وده موقع الـ MMI
-
North American Montessori Center (NAMC)
ودي مقرها مش في مصر، لكنها بتقدم ميزة الدراسة أونلاين، وهي دبلومة أمريكية للمنتسوري، معترف بيها في أمريكا وكندا ومصر والدول العربية وبعض الدول التانية، ولو محتاجة تعرفي اعتمادها في بلد معينة، محتاجة تتواصلي معاهم وتسأليهم.
موقعهم الرسمي: https://www.montessoritraining.net/
وتقدري تعرفي تفاصيل الرسوم من هنا ، لإنها بتختلف على حسب المرحلة العمرية للدبلومة.
-
دبلومة منتسوري معتمدة من جامعة عين شمس
ورسوم دبلومة المنتسوري في جامعة عين شمس، أقل من الدبلومات الدولية، وهي معتمدة في مصر، لكن لو ناوية تسافري تشتغلي في بلد معينة، لازم تسألي إذا كانت دبلومة جامعة عين شمس معتمدة عندهم ولا لا.
1 comment
شكرا جدا للتوضيح وحاليا في دبلوما في جامعة عين شمس لمدة سنه ٣٠٠ ساعه لكن تشمل من عمر يوم وحتى عمر ١١ سنه فا هل دا عادي يعترف بيه ؟
لأن اعرف ان لازم يكون مرحله عمريه محدده لكل دبلوما