آخر الشهر والمرتب والمصروف قربوا يخلصوا ويتبخروا؟ على دماغك عيل بيزن كل يوم عايز يخرج ويتفسح بس الميزانية مش كبيرة أوي؟ مين قال إن الخروجات لازم تصرفي فيها فلوس كتير عشان خاطر تبسطي ولادك؟ ممكن تروحي مكان مفتوح وفيه ألعاب أطفال وتبقى خروجة بسيطة وولادك يغيروا جو وتتبسطوا وتقضوا يوم لطيف سوا.. في المقال ده جمعنا ليكي 5 أماكن للخروج مع أولادك بأقل من 200 جنيه وكمان هنديكي أفكار إزاي تستمتعي مع ولادك بيوم حلو في مكان بسيط ويكون ممتع ليهم.
أماكن للخروج مع أولادك بأقل من 200 جنيه
- حديقة الدراجات بمدينة المستقبل
- عالم الحيوان الحديقة الدولية
- مدينتي سنترال بارك
- Sea Cinema Arabella
- ملاهي فاميلي لاند
حديقة الدراجات بمدينة المستقبل
- سعر التذكرة 25 جنيه.
- المكان: مدينة المستقبل أمام الأكوا بارك.
- الحديقة من أكبر الحدائق المفتوحة في مصر وفيها تأجير عجل وممكن ولادك يلعبوا بالعجل أو السكوتر بتاعهم، ممكن كمان تجيبي فطار أو تشتري من الكافتريات اللي جوه، وكمان فيه مراجيح وأماكن فيها خضرة كتير تستمتعي بالهوا والشمس مع ولادك جوه.
عالم الحيوان الحديقة الدولية
- سعر التذكرة: 15 جنيه
- المكان: الحديقة الدولية بمدينة نصر.
- المكان جوه الحديقة الدولية في مدينة نصر والحديقة الدولية بيها أماكن فيها خضرة كتير تقدري تقضي وقت لطيف مع ولادك في الشمس والهواء الطلق، بالنسبة للمكان ده فهو هيكون ظريف لولادك اللي بيحبوا الحيوانات، وفيه كمان أنشطة وعروض كتير على التذاكر زي دخول متحف الزواحف وركوب الخيل وعرض البلياتشو وغيرهم كتير.
مدينتي سنترال بارك
- سعر التذكرة: الدخول مجاني.
- المكان: بداخل مدينتي.
- لو إنتي من سكان مدينتي أو الشروق فالسنترال بارك هتبقى مناسبة ليكي جدًا لأنها مكان مفتوح وكله خضرا وفيه أماكن كتير تشتري منها أكل وشرب، وممكن تجيبي مفرش وتعملي بيكنيك، فيه منطقة ألعاب برسوم وكمان بيتعمل فيها بازارات وايفينتات مختلفة.
Sea Cinema Arabella
- سعر التذكرة: 60 جنيه لحفلة الساعة 10 وواحدة الظهر.
- المكان: بداخل مول آرابيلا بلازا بالقاهرة الجديدة.
- لو ولادك بيحبوا أفلام الكارتون، ممكن توديهم سينما في الويك إند في الحفلات الصباحية عشان سعرها بيكون قليل شوية وكمان ممكن يستمتعوا بالعروض على المأكولات اللي بتبقى موجودة في السينما وهيكون تغيير لطيف بعيدًا عن الكيدز إريا والنادي.
هنا ممكن تشوفي 9 حدائق لخروجات الأطفال في الويك إند
ملاهي فاميلي لاند
- السعر: سعر اللعبة 15 حتى 45 جنيه.
- المكان: المعادي أبراج عثمان بجوار السفارة اليابانية وسينما فاميلي لاند.
- لو ولادك مصممين على مكان فيه ألعاب ملاهي، ملاهي فاميلي لاند في المعادي هتكون مناسبة للميزانية وممكن تخصصي لكل طفل فلوس معينة يقدر يلعب بيها العدد اللي يختاره في اليوم ده.
اما هنا بقى 10 أماكن خروج تزوروها لو أولادكم بيحبوا الحيوانات
أفكار تانية لخروجات عائلية في القاهرة أقل من 200 جنيه
- خروجة لمحل الآيس كريم أو الحلويات المفضل ليهم وتخصصي لكل طفل فيهم ميزانية محددة يشتري بيها اللي هو عايزه.
- نزولة حلوة لمكتبة جنب البيت تشتروا منها ألوان للوش وسعرها بسيط بيبدأ من 30 جنيه أو كتاب تلوين.
- تمشية تحت البيت مع ولادك بالعجل في مكان آمن وتروحوا تشتروا سوا حاجة حلوة من الكشك أو السوبر ماركت.
- خروجة في شارع المعز أو خان الخليلي وتعلمي ولادك عن آثار بلادهم.
- خروجة لبانوراما حرب أكتوبر يزوروا المتحف الحربي ويقضوا وقت لطيف في الحديقة اللي بره.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
What’s your Reaction?
التعليق باستخدام حساب فيس بوك