“مصر واسعة يا صابرين بس إحنا اللي حابسين نفسنا وسطيها” جملة من أشهر جمل الفنان محمد صبحي من فيلم هنا القاهرة لما كان بيكلم زوجته الفنانة سعاد نصر رحمة الله عليها بعد تجربته الحزينة في القاهرة والحقيقة إنه بالرغم من إن الجملة دي اتقالت في آخر الفيلم، لكن وقعها كان حقيقي بشكل مخيف! قد إيه فعلًا مصر جميلة وواسعة وإحنا منعرفش عنها غير القليل.. معظم خروجاتنا وقعداتنا بتنحصر في الكافيهات والمطاعم والسفريات كمان يا إما ساحل يا إما دهب؛ بس في الحقيقة في أماكن تانية كتير تستاهل تتراح حتى لو مرة واحدة بس في العمر.. أماكن تثقيفية وكلها تاريخ وحضارة مش متعودين عليها.. اقري المقال ده عشان تعرفي إيه هي الأماكن دي وبنتمنى إنك تزوريها عشان تعرفي عظمة وحلاوة بلدك حتى لو في خروجة بسيطة جوه القاهرة.
المتحف القومي للحضارة المصرية
ومين فينا منبهرش لما شاف موكب المومياوات في الحدث الضخم اللي شافه كل العالم لافتتاح متحف الحضارة المصرية، خروجة ممتعة وجديدة هتتعلمي فيها كتير عن تاريخ بلدك ولو ولادك سنهم كبير شوية هتكون فرصة لطيفة عشان هما كمان يتعلموا عظمة بلدهم.
مواعيد المتحف كل يوم من 9 ص حتى 5م
سعر التذكرة:60 جنيه والطالب 30 جنيه ومجانًا لكبار السن فوق الستين سنة ولطلبة الهندسة والفنون الجميلة والفنون التطبيقية.
10 أماكن خروج تزوروها لو أولادكم بيحبوا الحيوانات
قصر البارون إدوارد إمبان
بعد سنين كتيرة من الإهمال، تم إفتتاح قصر البارون للسياح عشان يتفرجوا على عظمة وجمال القصر اللي اتبنى على طراز المعابد الهندوسية وتتصميمه العجيب اللي بيخلي الشمس متغيبش ابدًا عن كل الغرف المتواجدة فيه، تحفة فنية في قلب مصر الجديدة متفوتكيش.
مواعيد القصر من 9ص حتى 4م
سعر التذكرة: 20 جنيه و10 جنيه للطلبة.
بيت السحيمي
معظمنا راح شارع المعز بس عمرك سمعتي عن بيت السحيمي قبل كده؟ بيت السحيمي موجود في حارة الدرب الأصفر المتفرع من شارع المعز وهو بيت من البيوت الأثرية الإسلامية القديمة وبيتعمل فيه أنشطة فنية وثقافية كتير.
مواعيد الزيارة من 9ص ل 5م
سعر التذكرة 10 جنيه و5 جنيه للطلبة.
مجمع الأديان
مش هتلاقي في أي بلد في العالم غير مصر مكان بيجمع الجامع والكنيسة والمعبد، مكان هتلاقي فيه تاريخ أديان بلدك والطراز القبطي والإسلامي في المعمار هتلاقي هناك جامع عمرو بن العاص والكنيسة المعلقة والمعبد اليهودي.. بننصحك بلبس الملابس المحتشمة إحترامًا لقدسية الأماكن.
قصر المانسترلي
قصر عبارة عن تحفة معمارية وخيالي أكنك هترجعي للزمن الجميل زمن الهوانم والباشاوات، القصر شبه جوه النيل وفيه كمان زي كوبري خاص بيه وهو خاص بحسن باشا المانسترلي اللي كان محافظ القاهرة.. القصر مكانه في المنيل ومفتوح للزيارات من ٩ ص ل ٤ م.
قصر محمد علي
أحد قصور العهد الملكي الخاص بمحمد علي والقصر تحفة معمارية رائعة بتضم تصاميم أندلسية وطراز إسلامي فريد، القصر مكانه في المنيل ومفتوح للزيارة من ٩ ص ل ٣ م.
متحف قصر عابدين
مينفعش تروحي قصر محمد علي من غير ما تروحي قصر عابدين كمان، القصر كان مقر الحكم في عهد الخديوي اسماعيل وتحفة معمارية بتضم متاحف كتير زي متحف السلام ومتحف مقتنيات اسرة محمد علي باشا.. القصر مكانه في عابدين ومفتوح للزيارة من ٩ ص حتى ٥ م وسعر الدخول ٢٠ جنيه.
بنتمنى إن إقتراحات الأماكن تكون عجبتك وتخرجي فيهم كفسحة جديدة ولطيفة 🙂
9 حدائق لخروجات الأطفال في الويك إند
المصادر:
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك