من أكتر الشكاوي اللي بنسمعها من الأمهات دلوقتي – بالذات اللي بيقروا ويتعلموا أكتر عن تربية الأطفال – إنهم مختلفين معظم الوقت في طريقة التربية مع أزواجهم. طرف مقتنع إنه لازم يشد وطرف مقتنع إنه لازم يرخي، واحد مقتنع بطريقة عقاب معينة والتاني مش مقتنع، وطبعًا أول حد بيتأثر بالاختلاف في طريقة التربية ده هو ولادنا!
مثبت علميًا إن طريقة كل واحد فينا في التربية وفي التعامل مع أطفاله جزء كبير منه بيتأثر بالطريقة اللي اتربينا بيها إحنا شخصيًا وبالمعتقدات اللي اتحفرت جوانا من صغرنا، فطبيعي يبقى فيه بعض الاختلافات ما بين أي إتنين بيربوا ولادهم. بس مطلوب مننا إن لو حتى فيه اختلافات ومش متفقين على طريقة واحدة، فعلى الأقل ولادنا ما يحسوش بالاختلاف ده على قد ما نقدر لإنه للأسف بيأثر عليهم سلبيًا وبيخليهم يحسوا بالقلق وعدم الاستقرار وفي بعض الحالات الطفل بيتعلم إنه يكون مستغل أو متلاعب عشان يقدر يوصل للي هو عايزه طول ما هو شايف إن باباه ومامته مش متفقين على طريقة واحدة.
لو انتي وجوزك مختلفين في طريقتكم مع ولادكم، دي مش حاجة تعيب حد فيكم أو تخلّيه مذنب أو مقصر. بالعكس، الاختلاف ده ممكن يكون فرصة كويسة إنكم تستفيدوا من قناعات بعض في التربية بدل ما تختلفوا وتتنافروا والولاد يضيعوا في النص. ممكن تختلفوا وتتناقشوا وتوصلوا لحل وسط مفيد للولاد.
المهم إنكم تأجلوا الاختلافات دي وتتكلموا فيها لما ولادكم يكونوا مش موجودين معاكم. وممكن إنكم كمان تقسموا الأدوار بينكم بحيث كل واحد يكون مسؤول عن جزء في حياة ولاده وأخد القرار فيها لو ما قدرتوش تتفقوا على حل وسط، و مفيد جدًا كمان إنكم تقروا في التربية مع بعض أو تحضروا ورش وكورسات تربية مع بعض عشان تحاولوا تقربوا وجهات النظر بينكم.
مهم قوي إن ولادكم يعرفوا إنكم حتى لو مختلفين مع بعض في طريقة التربية، بتحترموا بعض ومش بتقللوا من دور بعض، وإنكم كأب وأم بتتصرفوا كفربق واحد بيقود البيت. محدش فيكم بيكسر كلام التاني ولا بيقلل من التاني. عشان تقدروا تكبروا ولادكم بنفسية سوية وهم عارفين يعني إيه احترام اختلاف وجهات النظر ويعني إيه علاقة محترمة بين أب وأم.
التعليق باستخدام حساب فيس بوك