أنشطة تلوين للآباء والأطفال لمحاربة زهق الحظر

من أول ما بدأت فترة الحجر الصحي بسبب انتشار فيروس كورونا، وكل الأمهات عمالين يقدموا لأطفالهم أنشطة تلوين بخامات ألوان مختلفة، لحد ما الأطفال زهقوا وفيه منهم بقى يرفض يمسك الألوان ويلون أصلًا وخاصةً لو طفل حركي ومالوش في القعدة الطويلة. أمهات تانيين بدأوا هم اللي يلونوا علشان أطفالهم يتشجعوا ويلونوا معاهم، بس الحقيقة إننا كأمهات زهقنا جدًا من فكرة إننا طول الوقت عمالين نبتكر ونخترع حاجات للأطفال عشان يتشغلوا فيها ويقضوا وقتهم فيها. كل ده ما غابش عن تفكير شركات السيارات العالمية، وابتكروا أنشطة رائعة للتلوين ممكن الطفل يقضي فيها وقت طويل وهو مستمتع جدًا، ومن الشركات اللي عملت كده:

ŠKODA:

شركة سكودا من الشركات اللي بتهتم بعمل أنشطة للأطفال، ومن فترة كانت عاملة مسابقة لتصميم السيارات للأطفال في التشيك، ودلوقتي نزلت على موقعها صور لسيارات سكودا، وسيارات سباقات الرالي علشان الأطفال يلونوها. تقدري تعملي داونلود للصور دي من هنا.

Mercedes-Benz:

حلم كل طفل إنه يكون عنده عربية مرسيدس لما يكبر، فأكيد لما يلاقي إن موقع مرسيدس بجلالة قدره منزلين له صور يلونها هيكون مبسوط جدًا. وتقدري تعملي داونلود لصور  التلوين من هنا. والأجمل بقى إن بعد ما ابنك يخلص تلوين الصورة يقدر يشاركها من خلال هاشتاج مرسيدس عاملاه اسمه: #coloryourbenz. مرسيدس كمان قدمت قبل كده نشاط مخصوص للأطفال يعلمهم إشارات المرور وقواعد السلامة عن طريق شخصية اسمها Moki ووفرت كل المواد الخاصة بالسلامة أونلاين هنا.

JCB:

ودي شركة بريطانية للمعدات الثقيلة عاملة مسابقة تلوين للأطفال، وتقدري تدخلي من هنا.

BMW:

بي إم بقى ست الكل، مش معقول هتفوت عليها الأفكار دي، فوفرت صور عربيات بي إم دبليو ممكن تطبعيهم على الورق أو لو بتسمحي لولادك يستخدموا الآيباد أو التابلت ممكن يلونوا من عليهم. شوفي الموديلات من هنا.

Aston Martin:

أتاحت بردو تلوين سيارة رياضية على الموقع الرسمي.

John Pangilinan:

جمّع هنا أعمال مجموعة من الرسامين علشان الأطفال يلونوها، وياريت لو ابنك كبير شوية تقولي له اسم الفنان اللي راسم الصورة علشان تعلمي طفلك معلومة جديدة وفي نفس الوقت تحافظي على حقوق الرسام.

الحلو بقى في كل الأنشطة دي إن الآباء هيكونوا مستمتعين جدًا بيهم لأن السيارات أكيد من اهتماماتهم، فتقدري تطبعي نسختين من نفس النشاط وتخلّي طفلك وباباه يعملوه مع بعض في نفس الوقت، وتستمتعي انتِ بوقت لنفسك شوية.