محتويات المقال
لو هتقضي شم النسيم في البيت، فبالتأكيد هتحبي تعملي أنشطة سهلة ومسلية مع أطفالك، ومن ضمن الأنشطة أكيد هتكون تلوين بيض شم النسيم بس ممكن كمان تعملي لهم كمان أعمال يدوية عشان تفرحيهم اليوم ده وكل اللي هتحتاجيه أدوات بسيطة جدًا. ودي شوية أفكار عشان تقضوا يوم لطيف كله لعب وتسلية مع ولادك في شم النسيم وبنتمنى إنها تعجبكم.
اعرفي طرق تلوين البيض في شم النسيم بألوان طبيعية من هنا
أرنب شم النسيم
الأدوات:
- أقلام تلوين.
- ورق ملون.
- صمغ أو دباسة.
- مقص.
- أطباق كرتون.
- قطن.
الطريقة:
- هتلفي بكرة التواليت بورق أبيض وتلزقيه عليها.
- هتعملي من الورق الملون الودان والرجلين بتاعته وتلزقيها.
- هتستخدمي الألوان عشان تعملي العين بتاعته.
- هتلزقي القطن عشان يدي شكل ديل الأرنب.
أنشطة للأطفال في شم النسيم. المصدر: Pinterest
الطريقة 2:
- هتجيبي الطبق الكرتون وتقصيه على شكل ودان الأرنب وتلزقيه على الطبق التاني أو ممكن تدبسيه.
- هتعملي مناخير الأرنب من القطن وتلزقيه.
- هتلوني مكان العين والبق بالألوان الفلوماستر.
أنشطة للأطفال في شم النسيم. المصدر: Practikideas
والفيديو ده هيوضحلك طرق تانية عشان تعملي نشاط أرنب شم النسيم مع ولادك بسهولة
بيضة شم النسيم من الورق
الأدوات:
- ورق أبيض وملون.
- ألوان.
- مقص
- لاصق قوي أو مسدس شمع.
الطريقة:
- هترسمي شكل البيضة على الورق الأبيض وتلونيه بالشكل اللي عاوزاه وبعدين هتقصيه.
- هتقطعي الورق الملون على شكل السلة الخاصة بالبيض وتلزقيهم من الطروف.
الفيديو ده هيعرفك الطريقة بوضوح:
سلة شم النسيم
الأدوات:
- عيدان ملونة
- خيط ملون عريض
- ورق ملون
- بكر تواليت
- ألوان
- مقص
- لاصق قوي
الطريقة:
- هترصي العيدان الملونة جنب بعض على بكرة التواليت.
- هتلزقي من تحت قاعدة كرتون.
- هتلفي حول السلة اللي عملتيها خيط ملون.
- ممكن ترسمي وردة على الورق الملون وتلزقيه على السلة اللي عملتيها كزينة.
- هتجيبي خيط ملون عريض عشان تلزقيه على شكل إيد السلة.
أنشطة للأطفال في شم النسيم. المصدر: Pinterest
ممكن كمان تطبعي لولادك من على النت رسومات مختلفة على شكل الأرنب والبيض وهم يلونوه وتقصيهم وتعلقيهم معاهم كزينة ملونة في أوضتهم وكل سنة وانتم طيبين وبخير 🙂
وهنسيبكم مع شوية فيديوهات حلوة ممكن تاخدي منها شوية أفكار لأنشطة شم النسيم مع ولادك
التعليق باستخدام حساب فيس بوك