أنواع التوابل والبهارات واستخداماتها الصحيحة

مين فينا دولاب التوابل بتاعها أو رف الفريزر مافيهوش مجموعة متنوعة من التوابل اللي غالبًا مش عارفين نستخدمها صح، أو بنستخدمها غلط. زمان كان كل اللي نعرفه هو الملح والفلفل والكمون والكزبرة الناشفة والشطة. وكان فيه سلام عالمي في مطبخنا إن دايرة التوابل بتاعتنا ضيقة، لكن مع قنوات الطبخ وبرامجه اللي في كل قناة، وطبعًا مع تعرفنا على مطابخ من دول تانية، دايرة توابلنا وسعت جدًا. بس المشكلة إن لما نكون مش عارفين نستخدمها صح، النتيجة مش بتكون زي ما هو متوقع، وده أوقات بيخلي عندنا مخزون من التوابل اللي مش بنستخدمها. علشان كده في المقال ده، هنتعلم مع بعض الاستخدامات الصح لشوية توابل قاعدة عندنا في المطبخ.

 

أنواع التوابل

 

• الينسون النجمي

النوع ده من الينسون شكله بيكون جميل، بس الحقيقي هو مش بيتناسب غير مع الأكلات الآسيوية من الصينية والهندية والماليزية والإندونيسية. كمان تقدري تغليه وتشربيه كمشروب مهديء بالليل.

 

• الكوبيبة الصيني

احنا بنسميها بالاسم ده، بس في الحقيقة هي اسمها Allspice أو كل التوابل. وسبب الاسم ده إن طعمها خليط ما بين الفلفل وجوزة الطيب والقرفة. بتكون جميلة مع المخبوزات لو أضفنا شوية بسيطة منها، وحلوة جدًا لو انتي من النوع اللي بيحب ياكل قرع العسل سواء حلو أو شوربة. وبيستخدم في تخليل الخيار بالذات في دول أمريكا الجنوبية. وفي دول الخليج، بيضيفوه على رز الكبسة وبيخليه لذيذ جدًا.

 

• القرنفل

من التوابل اللي بتستخدم في الوصفات الحلوة والمالحة، بيستخدم في المخبوزات، في طواجن اللحمة سواء بقري أو ضاني.

 

• مسحوق الكاري

الكاري مش نبات. إنما خلطة توابل عبارة عن كزبرة وكمون وكركم وجنزبيل والخردل والحلبة والقرفة والحبهان والفلفل الأسود والشطة. هو معمول أساسًا علشان الاطباق الهندية، بس انتي تقدري تستخدميه مع اللحم البقري أو الضاني أو السمك والبطاطس المشوية مع شوية ملح هيدي تتبيلة مميزة ليهم. جربي الكاري مع شوربة كريمة الجزر أو البطاطا الحلوة.

 

• بذور الشمر

ليها طعم حلو خفيف قريب من طعم العرقسوس، بيستخدم مطحون مع اللحمة والصلصات والسمك والسجق، ومشهور جدًا في أطباق دول البحر المتوسط سواءً في الجانب الأوروبي أو العربي.

 

• الجارة ماسالا

مزيج توابل هندي شبه الكاري بس من غير كمون أو كراوية. بس زيادة فيها الشمر والجوزة الطيب، وهي من التوابل اللي بتتحط في نهاية الطبخة مش في التتبيل.

 

• جوزة الطيب

من التوابل الجميلة جدًا في الأكل، وبتدي نكهة عطرية للأكل تقدري تميزيها بسهولة، تقدري تستخدميه في الطبخ والتتبيل. تقريبًا بيتناسب مع كل الخضار. ولو عايزة تستخدميه في مطبخنا المصري، جربيه مع الحمام المحشي أو الفراخ المحشية في تتبيلة الرز أو الفريك، وجربيه مع طواجن اللحمة. هتلاقي طعم رائع ومختلف تمامًا.

 

• الكركم

من التوابل اللي له نكهة دافية وترابية شوية. هو بيستخدم في الأساس لإضافة اللون الأصفر المشرق في الأكل. جربيه مع شوربة العدس وتدميس الفول، والمخلل والقرنبيط، بيتماشى معاهم جدًا.

 

• الريحان المجفف

من التوابل المستحدثة بالنسبة لنا. غالبًا جاية من المطبخ الإيطالي. الريحان المجفف بيتماشى جدًا مع الطماطم والجبنة. وهو المكون الأساسي لصلصة البيستو. تقدري تضيفيها لصلصة المكرونة وتتبيلة الفراخ المشوية للحصول على طعم مطبخ إيطالي.

 

• البابريكا

احنا غالبًا بنتعامل معاها من باب جبر الخاطر ولونها الجميل. في الحقيقة، هي طعمها خفيف لكنها بتدي نكهة مدخنة ولون منعش للأكل. حطيها في تتبيل لحم الشوي، صلصة المكرونة، وتتبيل بطاطس الشوي.

 

• إكليل الجبل/روز ماري

لما بنجيبه بشكله الطازة، بيكون إضافة جميلة لأي شوربة كريمة وتتبيل الشوي. بس لو هتستخدميه مجفف، فالأفضل تطحنيه. استخدميه في شوربة سلق الفراخ مع ورق اللورى والحبهان.

 

• الزعتر

غالبًا بنلاقيه مجفف، بس في أي سوبر ماركت كبير أو هيبر، تقدري تلاقيه طازة. استخدميه مع الخضروات الجذرية زي البطاطس والبطاطا والجزر. وهو نكهة فرنسية بجدارة.

 

دي أكتر توابل مش بنعرف نستخدمها صح، لو انتي عندك نوع توابل عايزة تعرفي الاستخدام الصح إيه. اكتبي لنا في الـComments اسمها واحنا هنجيب لك الاستخدام الصح.

نصيحة أخيرة، التوابل بتستخدم علشان تبين نكهة العناصر المطبوخة وتخليها أجمل، استخدميها باعتدال، لإن المبالغة في استخدامها ممكن يبوظ الأكلة كلها.

 

المصادر
www.indiaparenting.com
www.unlockfood.ca
www.instructables.com
www.food.ndtv.com

هل عندك تعليق على المقال ده؟ شاركينا هنا

Leave a Comment Cancel Reply

التعليق باستخدام حساب فيس بوك