محتويات المقال
الأجبان عالم كبير قوي ولذيذ قوي الحقيقة، تخيلوا كده معايا البيتزا من غير جبنة، أو البرجر من غير جبنة، أو اللازانيا من غير جبنة، أكلات كتير قوي صعب نتخيل وجودها من غير الجبنة بدسامتها، ولونها وقوامها ونكهتها اللذيذة.
عادةً، لما بازور السوبر ماركت عشان أشتري مستلزمات البيت، بتستوقفني قوي تلاجة الأجبان، بافضل واقفة قدامها استكشف واسأل البياع واخليه يدوّقني من كل نوع وباحب دايمًا أغامر واجرّب أنواع جديدة أنا مش متعودة عليها ودايمًا بانبهر وبتعلم. اللي نكهتها حادقة شوية، واللي فيها شيء من المرارة، واللي فيها نكهة مسكرة، واللي متوازنة بين التلات نكهات حادقة، وحلوة ومرة، أطعمة ونكهات لا تنتهي موجودة في عالم الأجبان.
النهارده، هندخل العالم ده ونتعرف مع بعض على أنواع كتير من الأجبان، وإيه أكتر الأكلات اللي بتليق معاها، المرة الجاية وانتي بتشتري طلبات بيتك، خليكي مغامرة وجربي نوع جديد.
1. أجبان صلبة
زي أغلب الأجبان الإيطالية منها مثلا:
البارميجانو ريجيانو
المصدر castellocheese
وهي ملكة النوع ده من الأجبان، قوامها صلب ومتماسك، نكهتها: حادة، مالحة، قوية وبتليق جدًا مع:
- أطباق الباستا بأنواعها
- الفواكه المجففة والمكسرات
- التين والعنب
- السلطات، وأشهرها سلطة السيزر
الجرانا بادانو
المصدر castellocheese
طعمها قريب جدًا للبارميزان لكنها أقل حدة، وسعرها أرخص من البارميزان في الأسواق، بتليق جدًا مع:
- التين والفواكه بوجه عام
- العسل الأبيض
البيكورينو رومانو
المصدر castellocheese
طعمها فيه حدوقية خفيفة وقريب للجبنة الرومي المصرية، أما قوامها مشابه جدًا للبارميجانو، بتليق جدًا مع:
- التفاح
- الكمثرى
- التين
- العسل الأبيض
2. الأجبان شبه الصلبة
دي بقى فيها أغلب الأجبان اللي كلنا بنحبها والموجودة في أغلب البيوت المصرية، هي الأنسب للساندويتشات وهي اللي قوامها بيخليها تسيح وتمط بدرجات متفاوتة، زي مثلًا الشيدر بأنواعها، الجودة، الفلمنك أو الإيدام، الجرويير، البروفولون، الإيمنتال، التاليجو، وغيرها كتير أنواع مالهاش عدد هنتكلم عن بعض منها:
الجودة
المصدر castellocheese
بتليق جدًا مع:
- الساندويتشات بأنواعها وبتسيح كويس جدًا وتدي مط لذيذ.
- ابشري منها شوية مع الأومليت أو البيض المخفوق.
- كليها زي ما هي مع الفواكه وخصوصًا التوت والفراولة.
- ضيفيها لأطباق المكرونة المعمولة بالصوص الأبيض خصوصًا الماك أند شيز.
- ضيفي شوية جودة مبشورة على صوص البشاميل.
الشيدر
أشهر أنواع الأجبان شبه الصلبة، فيه منها الأبيض والأحمر، وفيه منها مضاف لها أطعمة ونكهات كتير جدًا زي رقائق الفلفل الحار، الأعشاب المتنوعة، التوم، والفلفل الأسود.
نسبة الدهون في الجبنة الشيدر عالية جدًا عشان كده يفضل أكلها باعتدال.
تليق قوي مع:
- ملكة التسييح في الساندويتشات والمكرونات وخصوصًا الأكل الأمريكي الأصل، زي الهوت دوج والبرجر وأغلب مطاعم الوجبات السريعة بتستخدمها وبقت تريندي جدًا في صوصات الجبنة اللي بتتقدم كغموس مع مقبلات كتير.
- وكمان الشيدر الحمرا بتستخدم بكثرة في مطاعم الأكل المكسيكي، بالرغم إن الشيدر مش هي الجبنة الأصلية اللي بتستخدم في المطبخ المكسيكي، لكن تجاريًا هي الأكتر شهرة في المطاعم خصوصًا مع الفاهيتا، وصوص الجبنة للناتشوز والكاساديا.
الإيمنتال
المصدر castellocheese
واحدة من أشهر الأجبان السويسرية، جبنة توم وجيري الشهيرة المليانة خروم وشكلها لذيذ جدًا، كريمية وفيها نكهة مرارة بتديها شخصية مميزة وبتخليها تليق مع حاجات كتير زي مثلًا:
- رائعة مع الساندويتشات اللي فيها cold cuts سواء كانت سايحة أو باردة.
- بتليق جدًا مع الفواكه والمكسرات خصوصًا البندق
- بتليق جدًا مع ساندويتشات البرجر مع البصل المكرمل، النكهات المسكرة بتبرز طعمها.
3. الأجبان الطازة
بتتسم بالقوام الطري الناعم والكريمي، أنواع وأصناف كتير لكل منها شخصيته المميزة منها مثلًا:
الكريم شيز
المصدر castellocheese
- معروف طبعًا من اسمها قد إيه هي كريمية وفيها نسبة عالية من الدهون
- سهلة الفرد على أنواع العيش المختلفة، وبتستخدم بكثرة في تحضير الحلويات زي الشيز كيك مثلًا، وكمان الفروستينج للكيكات والكب كيك.
- تقدري تنكههيها بالأعشاب أو التوم أو أي نكهة تحبيها وتضيفيها للصوصات المطبوخة زي البشاميل عشان تدي نكهة وطعم كريمي دسم ولذيذ.
الموتزاريلا والبوراتا
المصدر castellocheese
- الاتنين مذاقهم خفيف جدًا، كل اللي هتحسي بيه وانتي بتاكليهم نكهة اللبن والقشطة الدسمة.
- البوراتا هي زي الموتزاريلا بالظبط لكن من الداخل ليها قوام كريمي جدًا، مشهورة جدَا بإضافتها للسلطات وبتليق جدًا مع الحمضيات والخل البلسمي.
- الاتنين بيليقوا جدًا مع الطماطم، والأعشاب منها الريحان على وجه التحديد.
- تقدري تستخديهم على البارد مع الساندويتشات والسلطات أو تسيحيهم فوق أكلاتك زي البيتزا.
الفيتا اليوناني
المصدر castellocheese
- مشهورة جدًا بإضافتها للسلطة اليوناني الشهيرة، قوامها صلب من الداخل لكن إحساسها في الفم بيكون كريمي.
- نكهتها مملحة وفيها مزازة. عشان كده، بنخلي بالنا من إضافتها للأكل لإنها بتضيف ملوحة.
- بتليق جدًا مع الطماطم، الزيتون، والفلفل الألوان والفواكه، وأغلب أنواع الخضراوات وزيت الزيتون اللي بيبرز طعمها جدًا.
بعد كل ده، لسه فيه أنواع وأشكال كتير من الأجبان ما اتكلمناش عنها، لكل واحدة شخصيتها وطعمها، ياترى إيه أكتر نوع جبنة بتحبيه؟
التعليق باستخدام حساب فيس بوك