علماء اللغة والنفس واجهوا صعوبة كبيرة في تعريف الحب.. صعب قوي تعرّف حاجة كل واحد فينا بيحسها بطريقته.. تعريفات الحب كتير قوي وصعب إننا نقولها هنا كلها.. علشان كدة هحاول أبسّط الموضوع بقدر الإمكان..
في كتابه، عن قرب، الطبيب النفسي شهاب الدين الهواري اتكلم عن التقسيم السداسي اليوناني للحب واعتبر إنه واحد من أقوى التعريقات والتقسيمات للحب.. تعالوا نشوفها سوا:
الحب غير المشروط (الأجابي Agabe)
هو الحب إللي مليان قبول وهو الحب من الله جل جلاله لخلقه، أو الحب إللي المفروض الآباء يمنحوه لأولادهم.
حب الإخلاص والولاء (الفيليا Philia)
وهو حب بلا شهوة وده إللي بيسموه الحب الأفلاطوني زي الحب الموجود بين الأصدقاء والحب ما بين الأبناء والآباء.
حب النزوة (اللودس Ludas)
بيعتبر البعض النوع ده من الحب زي حب المراهقة وهو مرحلة أولى من الحب قد تسبق الإيروس وتنتهي بإنتهاء النزوة.
الحب الشهواني أو الرغبة (إيروس Eros)
وده على اسم إله الخصوبة عند اليونان.. بعاطفة الإيروس بينجذب فردين وبيبقوا كيان واحد في جسدين..
الحب الدائم (براجما Pragma )
بيعتبره البعض الحب الناضج، حب الموازنات إللي بسببه بنعمل مواءمات وتضحيات .. حب المشاركة والتفاهم وده بيكون بين الأزواج إللي متجوزين بقالهم كتير.. إذا كانت قوة الإيروس تعني الوقوع في الحب فإن قوة البراجما تعني الاستمرار فيه.
حب النفس (فيلوتشيا Philutchia)
وده بينقسم لقسمين: الحب النرجسي إللي بيحمل معنى الأنانية والكبر والتمحور حول الذات والنوع التاني هو حب النفسي الصحي وإللي بيقول عنه أرسطو : “إن كل حب تمنحه للغير هو امتداد لما منحناه لأنفسنا منه”.
دكتور شهاب اتكلم كمان عن الفرق بين الحب و “التشافي”.. ناس كتير قوي بتدخل في علاقات عاطفية كرد فعل اتجاه اساءة قديمة أو علاقة تانية أو لاشباع احتياج داخلي .. احتياج تاني غير الحب.. هنا العلاقة مش بتكون حب بين انسان وانسان، بتكون علاقة متألم ومحاولة شفاء وأسوأ الأمثلة وأشهرها هي:
1-علاقة الشخص النرجسي بالآخر لإنه الشخص النرجسي بيكون عنده شعور عميق بعدم الاستحقاق من تجاربه وحياته في الطفولة فبنلاقيه بيطلب من كل علاقة جديدة إنها تحسسه بنفسه وبأهميته وهو بيدخل العلاقة بس علشان يشوف نفسه حلو في عين حد تاني.. وكثيرا ما بيحاول النرجسي شفاء نفسه من خلال الإساءة لغيره.
2-علاقة المواقف غير المنتهية: وهنا إحنا بندخل العلاقة وإحنا واقعين تحت تأثير علاقة تانية.. فبنلاقي إننا بنختار شخص جديد فيه صفات شبه الشخص القديم أو أحد صفاته زي ما حد يختار شريك شبه باباه وماماته علشان يحل السيناريوهات غير المنتهية معاهم مع الشريك الجديد، أو زي ما بنت بتختار شاب جديد شبه طليقها إللي أذاها.
الشكلين دول في الحب عبارة عن سراب وهما مش حب حقيقي والشخص عادة بيخرج من التجارب دي وهو يا آذي نفسه يا آذي غيره وساعات العلاقات دي بتكمل وبتقعد فترة طويلة وساعتها بنسميها “علاقات سامة”.
التعليق باستخدام حساب فيس بوك