أنواع اللولب لمنع الحمل وإيه أفضلهم

اللولب هو جهاز بيتركب في الرحم عشان يمنع وصول الحيوانات المنوية وبالتالي بيمنع الحمل. تأثيره طويل، ممكن يمتد لعشر سنين. لكن مش بيمنع الحمل للأبد طبعًا. ونسبة نجاحه عالية جدًا، تصل لـ99%.

أنواع اللولب

• اللولب الهرموني
• اللولب النحاسي

اللولب الهرموني

اللولب الهرموني له 4 أنواع أشهرهم وأكترهم استخدامًا هو Mirena. اللولب الهرموني بيفرز هرمون البروجيستين (يشبه جدًا هرمون البروجيستيرون) لمنع الحمل. الهرمون ده بيعمل حاجتين: (1) بيتخّن المخاط في عنق الرحم عشان يمنع الحيوانات المنوية من الوصول للبويضة وتخصيبها، (2) بيرفّع سمك بطانة الرحم عشان ما يحصلش تبويض أصلًا. ميرينا عمره من 5 – 7 سنين.

اللولب النحاسي

اللولب النحاسي ما بيستخدمش هرمونات. بيكون اللولب معدن على شكل حرف T، ملفوف عليه نحاس، وده بيحميكي من الحمل لمدة من 10-12 سنة. هو بيمنع الحمل عن طريق إنه بينفّر الحيوانات المنوية لإن خلاياها ما تقدرش تحتك بالنحاس، وبيخليها ما تدخلش للبويضة. وطبعًا لو الحيوان المنوي ما وصلش للبويضة مش هيحصل حمل.

أفضل أنواع لولب منع الحمل

مفيش حاجة تنفع كل الناس طبعًا، ومفيش وسيلة منع حمل هتنفع لكل الستات. لكن لو بتفكري في اللولب، فلازم تقرري بناء على أكتر من عامل عشان تعرفي الأفضل ليكي:

1. نسبة الهرمونات في جسمك: لو جسمك فيه خلل هرموني، أو فيه نسبة بروجيستيرون أعلى من الطبيعي، فيفضل تختاري اللولب النحاسي مش الهرموني لإن كتر الهرمونات في جسمك ممكن يزود احتمالية الإصابة بالسرطان.
2. وجود أورام أو أورام ليفية أو تشوهات في الرحم: ما ينفعش معاهم وجود لولب، خاصةَ الهرموني.
3. وجود سرطان في الجسم: لو عانيتي أو بتعاني من سرطان الرحم أو عنق الرحم، مش هينفع تركبي لولب في العموم. ولو عانيتي أو بتعاني من سرطان الثدي، ما ينفعش تستخدمي الهرموني.
4. لو فيه أي التهابات في الحوض: سواء التهابات في الحوض أو عدوى منقولة جنسيًا، ما ينفعش لولب معاهم.
5. لو حصل التهاب في الحوض بعد الولادة أو الإجهاض، ما ينفعش يكون فيه لولب وإلا ممكن يسبب التهاب مماثل.

لو ما مريتيش بالعوامل دي، فممكن جدًا تركبي لولب. اللولب، وخاصة النحاسي، آمن جدًا وطويل المدى وناجح.

اعرفي هنا أعراض الحمل المبكرة في الأسبوع الأول

مصدر ساعدنا في كتابة المقال:
Planned Parenthood