لقاح الكورونا بقى حتمي وسط كم الإصابات اللي حوالينا للحماية من فيروس كورونا، خاصةً وإن خطوات حجز لقاح كورونا سهلة جدًا، وفعالية لقاحات كوفيد 19 بقت مؤكدة من جهات علمية محلية وعالمية. كمان تطعيم فيروس كورونا في مصر أصبح متاح وبسهولة. دلوقتي، تقدري تاخدي تطعيم كورونا بسهولة، بمجرد التسجيل من خلال الموقع الرسمي التابع لوزارة الصحة. لكن يبقى السؤال إيه هي أنواع تطعيمات لقاح كورونا عمومًا وإيه الموجود منها في مصر، وهل التطعيم ضد كورونا فعال فعلًا ولا لأ، والأهم إيه هي الأعراض الجانبية المتوقعة بعد التطعيم.
اقرأي أيضًا: دليلك الكامل لـ علاج الكورونا في البيت
أهمية الحصول على تطعيم لقاح الكورونا
رغم كل الهجوم اللي بنشوفه على مواقع التواصل تجاه فكرة التطعيم والكلام عن إنها مؤامرة عالمية ولازم مانخدش التطعيم لأنه بيضر مش بيفيد، لكن في الواقع كل الأدلة العلمية بتقول إن التطعيم ضد فيروس كورونا هو الحل الوحيد عشان الرعب اللي العالم عايش فيه ينتهي، الغالبية العظمى من الناس معرضة إنها تصاب بكوفيد 19 واللي جاله مرة معرض يجيله تاني، واللي خف مرة ممكن ما يخفش التانية خاصةً مع الأعراض الجانبية اللي بتيجي بعد الإصابة، واللي مازال بيعاني منها عدد ضخم من المصابين السابقين.
التطيعم ضد فيروس كورونا مش بيمنع الإصابة، لكن بيدرب الجسم على مكافحة العدوى عن طريق منعه من استقبال الفيروس. وحتى لو حصلت الإصابة، مش بتكون قاتلة زي لو حصلت في غياب التطعيم، يعني بنتكلم في نسب شفاء عالية وعدد وفيات أقل بكتير. باختصار، الكارثة العالمية اللي حاصلة حاليًا نهايتها هتكون مع اللقاح.
أنواع لقاحات كوفيد 19 والفرق بينها
- لقاح جامعة أكسفورد: أسترازينيكا، وده اللقاح اللي أخد اعتماد أواخر 2020، بعد ما التجارب قالت إن نسبة نجاحه 70% في حماية الناس من الإصابة بكوفيد 19 وكمان حمايتهم من ظهور الأعراض عليهم والأبحاث كمان قالت إنه مع الجرعة التانية الحماية بتوصل لـ 90% والاستجابة المناعية عند الناس الكبار في السن كويسة جدًا، وده اللي خلّى انجلترا تطلب 100 مليون جرعة منه. الفاصل بين الجرعة الأولى والتانية حسب وزارة الصحة المصرية حوالي تلات شهور.
- لقاح سينو فارم، تم الموافقة على استخدامه من اللجنة الاستشارية في منظمة الصحة العالمية في حالات الطوارئ، ضد كوفيد 19 كأول لقاح صيني يدخل قايمة اسمها “قائمة استخدام طارئ” وهو ده النوع التاني للقاح الموجود في مصر.
- لقاح فايزر بيونتيك وده ظهر في نوفمبر السنة اللي فاتت فعاليته بتوصل 95% لكنه مش موجود في مصر، هو مستخدم بشكل أساسي في المملكة المتحدة، واللي كانت أول دولة في العالم تعتمده، اللقاح مش من اللقاحات الشائعة لإنه بيحتاج طريقة تخزين معينة، عند 70 درجة تحت الصفر وبيتنقل في صناديق معينة بتجهيزات معينة وده طبعًا بيخلّي استخدامه صعب جدًا.
- لقاح موديرنا وده كمان مش موجود في مصر، الشركة المصنعة بتقول إنه بيحمي من 94.5% من الناس وده اللي خلى انجلترا تطلب منه 17 مليون جرعة هتستلمهم اليومين دول، بيتاخد على جرعتين بفاصل أربع أسابيع، بيتميز عن فايزر إنه أسهل في التخزين.
إيه الفرق بين سينوفارم وأسترازينيكا
وزارة الصحة المصرية وضّحت في تصريحات سابقة لها الفرق بين لقاح سينوفارم وأسترازينيكا في نقطتين:
- لقاح أسترازينيكا المدة بين الجرعة الأولى والثانية 3 أشهر ومش بيتاخد للفئة العمرية أكبر من 65 سنة
- سينوفارم الفرق بين الجرعتين 21 يوم وآمن لكل الفئات ما عدا الأطفال والحوامل.
الأعراض الجانبية للقاح كورونا
زي التطعيمات التانية، لقاحات كوفيد بتسبب بعض الأعراض الجانبية المؤقتة، ممكن تحصل كلها أو بعضها زي:
- الألم أو الاحمرار أو التورم في مكان الحقنة
- السخونية
- الإرهاق
- الصداع
- آلام العضلات
- رعشة
- ألم المفاصل
- الغثيان والقيء
- الشعور بالتعب والإرهاق
- تورّم العقد الليمفاوية
ولو كان ليكي تاريخ مع الحساسية، مفروض تفضل في المركز الطبي بعد اللقاح تحت المراقبة لمدة 15 دقيقة لنص ساعة عشان الاطمئنان، وعمومًا الآثار الجانبية بتحصل خلال أول تلات أيام وغالبًا بتخلص بعد يوم أو اتنين.
طريقة الحصول على لقاح الكورونا
دلوقتي تقدري تسجلي نفسك بسهولة، وكمان والدك ووالدتك وأي حد ما عدا الأطفال والحوامل من خلال الموقع الرسمي التابع لوزارة الصحة من خلال موقع تسجيل لقاح كورونا في مصر. وبمجرد ما تسجلي نفسك وتحددي موقعك وأقرب وحدة ليكي وسنك ورقم بطاقتك وبيجي لك رسالة تأكيدية فيها رقم بتقول لك إن طلبك وصل وبعدها بفترة بييجي لك رسالة تانية تقول لك على معاد التطعيم ومكانه.
اقرأي أيضًا: 10 أسئلة عن الكورونا هيجابك عليها تطبيق صحة مصر
المصادر
Mayoclinc
التعليق باستخدام حساب فيس بوك