السواقة بالنسبة للأمهات مش رفاهية، رحلات لا نهائية بين التمرين والمدرسة والدروس والخروجات، بيكون فيها خيار التاكسي أو تطبيقات العربيات مكلف جدًا. لذلك الاحتياج لعربية منجزة وأمان، وفي نفس الوقت بشروط وتكاليف معقولة، مسألة ما فيهاش أي نقاش. في المقال ده، هتلاقي أفضل 10 سيارات مناسبة للأمهات وبأنظمة سداد مختلفة من أول 50 ألف جنيه وانتي طالعة. اقرأي كمان: أهمية تأمين العربية
عربية الأمهات يعني عربية حجمها صغير، غالبًا هاتشباك عشان تعرفي تركنيها، لإنك في الغالب مش هتعملي مشوار واحد بس في اليوم. انتي هتعملي كذا مشوار، وفي النهاية، لازم تضمني إنك هتعرفي تتصرفي فيها وسط الزحمة المرعبة، خاصةً لو انتي من سكان وسط البلد أو مشوايرك في المناطق اللي الركنة فيها بتكون صعبة او شبه مستحيلة.
أفضل أنواع سيارات مناسبة للأمهات بالتقسيط
- سوزوكي ماروتي Maruti Suzuki
- سوزوكي آلتو Alto Suzuki
- كيا بيكانتو Kia Picanto
- سوزوكي سويفت Swift Suzuki
- فيات بونتو Fiat Punto
- كيا ريو Kia Rio
- لادا جرانتا Lada Granta
- بي واي دي BYD
- هيونداي آي 10 – Hyundai i10
- رينو داستر Renault Duster
سيارة ماروتي Maruti Suzuki
الماروتي هي صديقة الأمهات، من أكتر سيارات مناسبة للأمهات .. صحيح هي ما بقيتش بتنزل، لكن لو كانت ميزانيتك صغيرة ومش قادرة تشتري عربية جديدة، وتلتزمي بقسط ثابت، وفي نفس الوقت محتاجة عربية بشكل عاجل، فانتي محتاجة عربية ماروتي، لأنها تعتبر من العربيات اللي تمنها معقول موديلات 2014 لـ 2015 بتوصل أقصى رقم بين 50 لـ 60 ألف جنيه.
لو محتاجة تشتريها، محتاجة الأول تدخلي جروبات الماروتي، على فيسبوك وكمان مواقع فيها عربيات للبيع زي أولكس، وهناك في فئة “عربيات مستعملة” هتلاقي كل الألوان والأسعار اختاري اللي تحبيه حسب المحافظة اللي انتي منها.
سيارة سوزوكي آلتو Alto Suzuki
السوزوكي آلتو هي التطور الطبيعي للماروتي، لكن مع تكييف وكماليات وراحة أعلى وأمان أكبر، سعرها كاش بيبدأ من 126 ألف جنيه. إمكاناتها مش عظيمة مقارنة بباقي العربيات، لكنها بتوفي بالغرض للأمهات اللي بتحتاج تتحرك كتير بالولاد. ممكن تشتريها من المعرض مباشرة لو معاكي تمنها كاش، ممكن برضو تقسطيها مع معارض كتير زي الليثي وتقدري تحسبي قيمة القسط من هنا.
سيارة كيا بيكانتو Kia Picanto
ندخل بقى في إمكانات أعلى شوية، وأفضل لنوعية عربيات محترمة. كيا بيكانتو عربية صغيرة وحلوة ومحندقة، تفيدك جدًا في وسط البلد والشوارع الزحمة والركنات، مع إمكانات لطيفة دلوقتي تقدري تحصلي عليها بطريقة القسم المباشر من هنا.
سيارة سوزوكي سويفت Swift Suzuki
لو انتي من الأمهات اللي بتدور على الشياكة، ومش بيهمها الفلوس، فسوزوكي سويفت هي العربية المثالية ليكي وللولاد، صغننة يعني ركنتها مقدور عليها، شكلها عبقري، ألوانها تحفة، وسعرها مش مرعب زي باقي العربيات العالية. بنتكلم عن سعر بين 210 لـ 220 ألف جنيه، حسب أسعار شهر يونيو 2021. وتقدري تقسطيها على مهلك بقرض تمويل السيارة من أي بنك تكوني بتتعامل معاه زي البنك الأهلي أو بنك إسكندرية أو بنك سي أي بي.
اقري كمان: دليلك لفهم كروت الدفع الإلكترونية في مصر
سيارة فيات بونتو Fiat Punto
الفيات البونتو دي بقى مزاج لناس كتير، رفاهية من جوه وشكل أنيق من بره. نقدر نقول عربية الأم المستعجلة. لو الولاد بيعيطوا هيهدوا تمامًا جوه مع فيلم كارتون حلو وتكييف يروق لهم الجو، وأم قاعدة مرتاحة وقاعدة تسوق بهدوء، تقدري تقسطيها تبع البنك اللي انتي تبعه زي البنك الأهلي أو بنك إسكندرية أو بنك سي أي بي.
اقري كمان: 9 ألعاب ممكن تلعبيهم مع أولادك في العربية
سيارة كيا ريو Kia Rio
آخر مرة ركبت فيها كيا ريو، حسيت إني جوه طيارة: كماليات مرعبة، وحالة عامة من الرفاهية الشديدة جدًا. بارشحها لأي أم حابة فعلًا تركب عربية محترمة وعالية ومريحة بشكل عبقري. كمان فيها كماليات للولاد تخليهم هم في عالم تاني ورا أمان، وانتي قدام قادرة تشوفي الطريق وتسوقي براحة وهدوء.
سيارة لادا جرانتا Lada Granta
اللادا جرانتا واحدة من العربيات الرشيقة واللذيذة جدًا، شكل تحفة، وإمكانات مريحة وكمان من مميزاتها إنها ضمن مبادرة الرئيس السيسي لإحلال وتجديد السيارات، باختصار الدولة بتوفر مزايا مالية للمواطنين اللي هيقدموا للمبادرة، يعني بنتكلم عن حافز للسيارات الملاكي 10% من قيمة السيارة الجديدة وبحد أقصي 22 ألف جنيه، وتقدري تعرفي أكتر عن المبادرة والمحافظات المتاحة فيها، وطرق التقديم من هنا.
سيارة بي واي دي BYD
البي واي دي يعني كماليات بلا حدود، وكمان من مميزاتها إنها ضمن مبادرة الرئيس السيسي لإحلال وتجديد السيارات، باختصار الدولة بتوفر مزايا مالية للمواطنين اللي هيقدموا للمبادرة، يعني بنتكلم عن حافز للسيارات الملاكي 10% من قيمة السيارة الجديدة وبحد أقصي 22 ألف جنيه، وتقدري تعرفي أكتر عن المبادرة والمحافظات المتاحة فيها، وطرق التقديم من هنا.
سيارة هيونداي آي 10 – Hyundai i10
الكتكوتة اللهلوبة السريعة المريحة اللي عربية بنات بجد، بنتكلم عن تجهيزات اقتصادية وقدرة على السفر لمسافات وتسارع عالي، 1200 سي سي، غير عوامل الأمان، والعزل الصوتي الداخلي أسعارها بين 229 لـ 249 ألف جنيه. دلوقتي تقدري تقرري ممكن تجيبيها ازاي بقرض من البنك أو بالاتفاق مع معرض عربيات زي أبو غالي.
سيارة رينو داستر Renault Duster
لو انتي ربة الأسرة والمسؤولة عن عدد كبير من الأفراد زي أب وأم وأطفال ومفيش غيرك، فانتي محتاجة رينو داستر عشان تقدري تلبي احتياجات الأسرة بالكامل بدون تقصير. رينو داستر من شركة رينو الفرنسية، حققت نجاحات كبيرة على مستوى العالم، المحرك سعة 1600 سي سي بقوة 115 حصان، مع سواقة سهلة ومناسبة، سواءً هتشتريها قسط من المعرض أو كاش أو من خلال البنك فانتي كسبانة في كل الحالات.
التعليق باستخدام حساب فيس بوك