محتويات المقال
فيه أسطورة قديمة بتتقال إن حبوب القهوة تم اكتشافها لما كالدي – راعي غنم في منطقة الهضبة الأثيوبية – لاحظ إن الغنم والماعز نشاطهم بيزيد وما بيناموش بالليل بعد ما بياكلوا من شجرة معينة بتطرح ثمرة مشابهة للتوت، اكتشفوا بعد كده طبعًا إن الشجرة دي بتطرح حبوب القهوة تخيلوا! الطاقة الصباحية، والفوقان والمود الحلو ومتعة الحواس، كل دي حاجات بتعملها كل أنواع مشروبات القهوة بأنواعها المختلفة اللي بيعشاقها الملايين في كل مكان في العالم وبيروحلها ستار بكس مخصوص، لأن مشروبات القهوة أوفى صديق لكل أم مرهقة وتعبانة.
ولو انتي من عشاق القهوة، المقال ده هيفيدك جدًا، لإن من خلاله هنتعرف مع بعض على الفرق بين المسميات المختلفة لأشهر مشروبات القهوة اللي بتكون موجودة في أي كافيه. وبكده هتقدري تطلبي قهوتك المفضلة وتختاري من المنيو بمنتهى الثقة وكمان تتشجعي وتجربي اختيارات جديدة.
أشهر أنواع مشروبات القهوة والفرق بينهم
- إسبريسو Espresso
- الأميريكان كوفي
- الكورتادو
- الكابيتشينو
- اللاتيه
- الموكا
- فلات وايت
- فرابيه أو فرابوتشينو
إسبريسو Espresso
إسبريسو Espresso – المصدر dailygrind
- كلمة إسبريسو مش بس بتشير لنوع المشروب، لكن كمان بتشير لطريقة التحضير نفسها.
- الإسبرسو بتتحضر عن طريق مرور المياه السخنه تحت ضغط معين على حبيبات القهوة المطحونة فبتستخلص منها النكهة والطعم، وبتنزل في صورة فنجان صغير الحجم من القهوة الكريمية، على وشها طبقة خفيفة من الرغوة.
- نسبة الكافيين في فنجان الإسبرسو بتكون عالية بالنسبة لباقي مشروبات القهوة. عشان كده، الفنجان بيكون حجمه صغير وكميته قليلة، والإسبريسو ممكن تكون شوت واحد أو دوبل شوت.
- الإسبريسو هي الأساس لمشروبات قهوة تانية كتير زي الكابوتشينو واللاتيه والموكا والأميريكانو وغيرها كتير.
- من الآخر، الإسبريسو هي الأساس، وتأثيرها للصحيان والفوقان الصباحي هو الأقوى.
الأميريكان كوفي
أنواع مشروبات القهوة – الأميريكان كوفي – المصدر inhabitat
- هي عبارة عن قهوة متحضرة بطريقة الإسبريسو، وبعدين يضاف لها مياه ساخنة. قوامها بيكون أخف طبعًا وشفاف أكتر وبدون أي رغوة.
- قوة الأميريكان كوفي بتختلف حسب عدد شوتات الإسبريسو ونسبة المياه اللي اتخففت بيها، وطبعًا هي مذاقها أخف من الإسبريسو ومحبب عند كتير من الناس.
الكورتادو
المصدر pinterest
المصدر pinterest
- مشروب قهوة أصوله أسبانية، يمكن ما يكونش دارج قوي ومعروف في مصر، بس هو الحقيقة مشروب رائع الجمال.
- الكورتادو عادة بيتقدم في كوباية زجاجية صغيرة، وهو بيتكون من إسبريسو دوبل شوت مع كمية تقريبا متساوية للإسبريسو مع اللبن المحضر بالتبخير (باستخدام ماكينة الإيسبريسو)، والطريقة دي بتقلل شوية من مرارة الإيسبريسو وبتديها نكهة كريمية لذيذة.
- طريقة تحضير الحليب للكورتادو بتحافظ على شخصية القهوة وطعمها. وطبقة الفوم على وش الكورتادو بتكون بسيطة جدًا.
الكابيتشينو
الكابيتشينو – المصدر tellerreport
- واحد من أشهر مشروبات القهوة وأكترها طلبًا في الكافيهات، أساس نشأته إيطاليا.
- هو عبارة عن إسبريسو مضاف عليه الحليب المحضر بالبخار (باستخدام ماكينة الإسبريسو) مع الفوم بنسبه محددة. والكابوتشينو من المشروبات اللي تقدري تضيفي لها إضافات زي بودرة الكاكاو أو بودرة القرفة، أو النكهات المركزة المتنوعة.
- طعم القهوة موجود فيه ومميز، لكن اللبن ونسبة الفوم والإحساس الكريمي اللي بيديه الفوم هو اللي بيضيف للمشروب ده شخصيته المميزة.
- نقدر نقول إن نسبة القهوة للحليب للفوم بتكون متساويه في الكابوتشينو.
- الكابوتشينو في إيطاليا بيتقدم في حجم واحد متوسط من الفناجين الواسعة المميزة. لكن كتير من الكافيهات في مصر بتقدمه بأحجام مختلفة.
- في إيطاليا، نسبة الفوم للكابوتشينو بتكون أكتر من الحليب نفسه، والغريبة إن الإيطاليين بيشربوا دايمًا الكابوتشينو الصبح، وبوجه عام، ما بيحبوش يشربوا أي نوع قهوة مضاف لها اللبن بعد الساعة 12 الظهر.
ممكن تشوفي هنا 9 طرق مختلفة لعمل الإندومي بدل الزهق!
اللاتيه
أنواع مشروبات القهوة – اللاتيه
- اللاتيه مشابه للكابيتشينو، لكن الفرق بينهم بيكون في نسبة اللبن والفوم المضاف للإسبريسو.
- اللاتيه كميته بتكون أكبر من الكابوتشينو وبيتقدم في مج طويل شفاف. نسبة اللبن فيه للقهوة بتكون أعلى من الكابوتشينو، أما بالنسبة للفوم، بيكون في اللاتيه أقل من الكابوتشينو.
- اللاتيه هو المشروب الأخف من ناحية مذاق القهوة نفسه، لإن نسبة اللبن فيه عالية.
الموكا
الموكا – مشروبات ستار بكس – المصدر athome.starbucks
- بالإيطالي اسمها Mocaccino، مشابهة للاتيه لكن مع إضافة الشوكولاتة اللي بتكون في صورة كاكاو خام مع التحلية بالسكر أو سيرب شوكولاتة محلى.
- عادة بتتقدم مع الكريمة المخفوقة على الوش ورشة من الكاكاو أو سيريب الشوكولاتة. يعتبر مشروب الموكا أقرب لمشروب الكاكاو الساخن مع إضافة شوت إسبريسو، لكنها لذيذة لمحبي نكهة الشوكولاتة.
فلات وايت
- هو برضه مشروب قهوة معمول من الإسبريسو واللبن المحضر بالتبخير، لكنه بيتعمل باتنين شوت إسبريسو عشان كده نكهة القهوة فيه قوية، وكمان نسبة الفوم فيه قليلة مقارنة بالكابوتشينو اللي بيتميز برغوته المرتفعة في الفنجان.
- الفلات وايت بيتقدم بحجم واحد في فنجان زي بتاع الكابوتشينو بكميه محددة ومفيش منه مقاسات في أغلب الكافيهات. هو مقاس واحد فقط، للحفاظ على النسبة والتناسب بين القهوة واللبن والفوم.
فرابيه أو فرابوتشينو
فرابوتشينو – أنواع مشروبات القهوة – المصدر diethood
- في بداية ابتكار الفرابيه، كان بيتعمل من القهوة سريعة التحضير مع السكر والميه واللبن، لكنه دلوقتي تطور جدًا، وبقى يتقدم كنوع من أنواع القهوة المثلجة. وبيكون مزيج من الإسبريسو مع التلج واللبن وبيضاف له منكهات متنوعة كتير زي نكهات البندق والكراميل ويتخلط كل ده في خلاطات مخصصة لعمل مشروبات الفرابيه والميلك شيك. وأحيانًا كمان بيضاف له الآيس كريم كبديل للبن. وعادةً بيتقدم مع الكريمة المخفوقة على الوش.
- الفرابيه أو الفرابوتشينو زي ما بيسموه في ستار باكس، واحد من أكتر مشروبات القهوة الباردة المحبوبة في مصر، منعش ومسكر ونكهاته متنوعة ومليان ابتكارات.
القهوة ومشروباتها عالم كبير قوي مليان معلومات وتفاصيل، وابتكارات كتير عشان تناسب كل أذواق عشاق القهوة في كل مكان. استنونا في مقالات تانية كتير ومعلومات عن القهوة، ياترى قهوتك كانت إيه النهارده؟
1 comment
✨✨✨✨✨🌷